Maidir le foilsiú leictreonach na réamheolairí formheasta agus na ndoiciméad gaolmhar, féadfaidh na Ballstáit a cheadú dá n-údarás inniúil an foilsiú sin a tharmligean chuig tríú páirtithe.
Má chinntear cúraimí a tharmligean, déanfar é le cinneadh sonrach ina ina leagtar amach an méid seo a leanas:
(a)
na cúraimí atá le cur i gcrích agus na coinníollacha faoina ndéanfar sin
(b)
clásal faoina gcuirfear d'oibleagáid ar an tríú páirtí gníomhú agus a bheith eagraithe chun go seachnófar coinbhleachtaí leasa agus chun a áirithiú nach mbainfear úsáid mhíchothrom as an bhfaisnéis a fhaightear le linn do na cúraimí tarmligthe a bheith á gcur i gcrích nó nach gcuirfear cosc ar iomaíocht; agus
(c)
na socruithe go léir a dhéanann an t-údarás inniúil agus an tríú páirtí a dtarmligtear cúraimí chuige.
Is ar an údarás inniúil atá ainmnithe i gcomhréir le mír 1 a bheidh an fhreagracht chríochnaitheach maidir le comhlíonadh an Rialacháin seo a mhaoirsiú agus réamheolairí a fhormheas.
Cuirfidh na Ballstáit an Coimisiún, ÚEUM agus na húdaráis inniúla sna Ballstáit eile ar an eolas faoi aon chinneadh chun cúraimí a tharmligean amhail dá dtagraítear sa dara fomhír, lena n-áirítear na coinníollacha mionsonraithe faoina rialaítear an tarmligean sin.