Airteagal 2 Sainmhínithe

(a)

ciallaíonn “soláthraí seirbhísí fánaíochta” gnóthas a sholáthraíonn seirbhísí fánaíochta miondíola rialáilte do chustaiméir seirbhísí fánaíochta;

(b)

ciallaíonn “soláthraí baile” gnóthas a sholáthraíonn seirbhísí baile cumarsáide soghluaiste do chustaiméir seirbhísí fánaíochta;

(c)

ciallaíonn “líonra baile” líonra poiblí cumarsáide atá lonnaithe laistigh de Bhallstát agus a úsáideann an soláthraí seirbhísí fánaíochta chun seirbhísí fánaíochta miondíola rialáilte a sholáthar do chustaiméir seirbhísí fánaíochta;

(d)

ciallaíonn “líonra a bhfuil cuairt á tabhairt air” líonra trastíre poiblí cumarsáide soghluaiste atá lonnaithe i mBallstát seachas Ballstát sholáthraí baile an chustaiméara seirbhísí fánaíochta agus ar líonra é lena gceadaítear do chustaiméir seirbhísí fánaíochta glaonna a chur nó a fháil, teachtaireachtaí SMS a sheoladh nó a fháil, nó cumarsáidí sonraí paicéadlasctha a úsáid, trí bhíthin socruithe le hoibreoir an líonra baile;

(e)

ciallaíonn “fánaíocht uile-Aontais” an úsáid a bhaineann custaiméir seirbhísí fánaíochta as gléas soghluaiste chun glaonna laistigh den Aontas a dhéanamh nó a fháil, chun teachtaireachtaí SMS laistigh den Aontas a sheoladh nó a fháil, nó chun cumarsáidí sonraí paicéadlasctha a úsáid, fad atá an custaiméir sin i mBallstát seachas an Ballstát ina bhfuil líonra an tsoláthraí baile lonnaithe, trí bhíthin socruithe idir oibreoir an líonra baile agus oibreoir an líonra a bhfuil cuairt á tabhairt air;

(f)

ciallaíonn “custaiméir seirbhísí fánaíochta” custaiméir de chuid soláthraí seirbhísí fánaíochta rialáilte, trí bhíthin líonra trastíre poiblí cumarsáide soghluaiste atá lonnaithe san Aontas, a gceadaíonn an conradh miondíola nó an socrú miondíola atá aige nó aici leis an soláthraí seirbhísí fánaíochta sin dó nó di fánaíocht uile-Aontais a dhéanamh;

(g)

ciallaíonn “glao fánaíochta rialáilte” guthghlao cumarsáide soghluaiste a dhéanann custaiméir seirbhísí fánaíochta, a thosaíonn ar líonra a bhfuil cuairt á tabhairt air agus a chríochnaíonn ar líonra poiblí cumarsáide san Aontas, nó guthghlao a fhaigheann custaiméir seirbhísí fánaíochta a thosaíonn ar líonra poiblí cumarsáide san Aontas agus a chríochnaíonn ar líonra a bhfuil cuairt á tabhairt air;

(h)

ciallaíonn “teachtaireacht SMS” teachtaireacht téacs Seirbhíse Gearrtheachtaireachtaí atá comhdhéanta go príomha de charachtair aibítreacha nó uimhriúla, nó díobh araon, agus ar teachtaireacht í is féidir a sheoladh idir uimhreacha soghluaiste agus/nó uimhreacha socra a shanntar i gcomhréir le pleananna uimhrithe náisiúnta;

(i)

ciallaíonn “teachtaireacht SMS fánaíochta rialáilte” teachtaireacht SMS a sheolann custaiméir seirbhísí fánaíochta agus a thosaíonn ar líonra a bhfuil cuairt á tabhairt air agus a chríochnaíonn ar líonra poiblí cumarsáide laistigh den Aontas nó a fhaigheann custaiméir seirbhísí fánaíochta agus a thosaíonn ar líonra cumarsáide poiblí laistigh den Aontas agus a chríochnaíonn ar líonra a bhfuil cuairt á tabhairt air;

(j)

ciallaíonn “seirbhís fánaíochta sonraí rialáilte” seirbhís fánaíochta trína gcuirtear ar chumas custaiméara seirbhísí fánaíochta cumarsáidí sonraí paicéadlasctha a úsáid trí bhíthin a ghléis shoghluaiste nó a gléis shoghluaiste nuair atá an gléas nasctha le líonra a bhfuil cuairt á tabhairt air, lena n-eisiatar glaonna fánaíochta rialáilte nó teachtaireachtaí SMS fánaíochta rialáilte a tharchur nó a fháil ach lena n-áirítear teachtaireachtaí MMS a tharchur nó a fháil;

(k)

ciallaíonn “rochtain ar fhánaíocht mhórdhíola” rochtain dhíreach ar fhánaíocht mhórdhíola nó rochtain ar fhánaíocht mhórdhíola lena hathdhíol;

(l)

ciallaíonn “rochtain dhíreach ar fhánaíocht mhórdhíola” saoráidí nó seirbhísí, nó an dá rud, a bheith á gcur ar fáil ag oibreoir líonraí soghluaiste do ghnóthas eile, faoi choinníollacha sainithe, ionas go soláthródh an gnóthas eile sin seirbhísí fánaíochta rialáilte do chustaiméirí seirbhísí fánaíochta;

(m)

ciallaíonn “rochtain ar fhánaíocht mhórdhíola lena hathdhíol” seirbhísí fánaíochta a bheith á soláthar ar bhonn mórdhíola ag oibreoir líonraí soghluaiste atá éagsúil le hoibreoir an líonra a bhfuil cuairt á tabhairt air, do ghnóthas eile ionas go soláthródh an gnóthas eile sin seirbhísí fánaíochta rialáilte do chustaiméirí seirbhísí fánaíochta;

(n)

ciallaíonn “praghas miondíola baile” muirear miondíola baile soláthraí seirbhísí fánaíochta in aghaidh an aonaid atá infheidhme maidir le glaonna a dhéantar agus le teachtaireachtaí SMS a sheoltar, ar glaonna agus teachtaireachtaí iad a thosaítear agus a chríochnaítear ar líonraí cumarsáide poiblí éagsúla laistigh den Bhallstát céanna, agus maidir le sonraí arna dtomhailt ag custaiméir.