|
D’ainneoin Airteagal 15, maidir le CPL a bhfuil sé beartaithe aige a ghnó a leathnú chun seirbhís bhreise nó gníomhaíocht bhreise a áireamh nach gcumhdaítear leis an údarú atá aige cheana féin, ní cheanglófar air a bheith údaraithe le haghaidh leathnú den sórt sin i gcás nach mbeadh tionchar ábhartha ag an tseirbhís bhreise sin ná ag an ngníomhaíocht bhreise sin ar phróifíl riosca an CPL. Tabharfaidh an CPL fógra do na faighteoirí cláraithe tríd an mbunachar sonraí lárnach i gcás ina gcinneann sé úsáid a bhaint as an díolúine dá bhforáiltear sa chéad fhomhír den mhír seo, lena n-áirítear an tseirbhís nó an ghníomhaíocht atá beartaithe aige a sholáthar. Beidh na hathruithe a chuireann CPL chun feidhme i gcomhréir leis an Airteagal seo faoi réir athbhreithniú agus meastóireachta i gcomhréir le hAirteagal 21. Féadfaidh ESMA athbhreithniú a dhéanamh ar sholáthar seirbhísí agus gníomhaíochtaí imréitigh agus tuairisciú don choláiste dá dtagraítear in Airteagal 18 agus don Choimisiún ar na rioscaí a eascraíonn as seirbhísí agus gníomhaíochtaí a sholáthraíonn CPLanna de bhun an Airteagail seo agus ar a n-oiriúnacht.
|