Airteagal 30 Bealaí cumarsáide faoi chosaint

1.   Bunófar córas chun faisnéis a mhalartú idir FIUnna na mBallstát (‘FIU.net’). Áiritheofar le FIU.net go ndéanfar faisnéis a chur in iúl agus a mhalartú ar bhealach slán agus beidh an córas in ann taifead i scríbhinn de na gníomhaíochtaí próiseála uile a chur ar fáil faoi dhálaí inar féidir barántúlacht a fhionnadh. Féadfar FIU.net a úsáid freisin le haghaidh cumarsáid le contrapháirtithe FIUnna i dtríú tíortha agus le húdaráis agus comhlachtaí, oifigí agus gníomhaireachtaí de chuid an Aontais. Is é AMLA a dhéanfaidh bainistiú ar FIU.net.

Úsáidfear FIU.net le haghaidh an mhalartaithe faisnéise idir FIUnna agus AMLA chun críocha anailíseacha comhpháirteacha de bhun Airteagal 32 den Treoir seo agus Airteagal 40 de Rialachán (AE) 2024/1620.

2.   Áiritheoidh na Ballstáit go malartóidh FIUnna faisnéis le chéile de bhun Airteagal 31 agus 32 a trí FIU.net. I gcás cliseadh teicniúil FIU.net, déanfar an fhaisnéis a tharchur trí aon mhodh iomchuí eile lena n-áiritheofar ardleibhéal slándála sonraí agus cosanta sonraí.

Déanfar malartuithe faisnéise idir FIUnna agus a gcontrapháirtithe i dtríú tíortha nach bhfuil nasctha le FIU.net trí bhealaí cumarsáide faoi chosaint.

3.   Áiritheoidh na Ballstáit, chun a gcuid cúraimí a chomhlíonadh mar a leagtar síos sa Treoir seo iad, go rachaidh FIUnna i gcomhar le chéile an méid is mó is féidir i gcur i bhfeidhm teicneolaíochtaí úrscothacha i gcomhréir lena ndlí náisiúnta.

Áiritheoidh na Ballstáit freisin go rachaidh FIUnna i gcomhar le chéile a mhéid is mó is féidir i gcur i bhfeidhm réiteach arna bhforbairt agus arna mbainistiú ag AMLA i gcomhréir le hAirteagal 5(5), pointe (i), Airteagal 45(1), pointe (d), agus Airteagal 47 de Rialachán (AE) 2024/1620.

4.   Áiritheoidh na Ballstáit go mbeidh FIUnna in ann úsáid a bhaint as feidhmiúlachtaí FIU.net chun crosmheaitseáil a dhéanamh, ar bhonn amais/gan amas, ar na sonraí a chuireann siad ar fáil ar FIU.net, leis na sonraí a chuireann FIUnna eile agus comhlachtaí, oifigí agus gníomhaireachtaí eile de chuid an Aontais ar fáil ar an gcóras sin a mhéid a thagann an chrosmheaitseáil sin faoi réim shainorduithe na gcomhlachtaí, na n-oifigí agus na ngníomhaireachtaí sin de chuid an Aontais.

5.   Féadfaidh AMLA rochtain FIU nó contrapháirtí i dtríú tír nó comhlacht, oifig nó gníomhaireacht de chuid an Aontais ar FIU.net a chur ar fionraí i gcás ina bhfuil forais aige chun a chreidiúint go gcuirfeadh an rochtain sin cur chun feidhme na Caibidle seo agus slándáil agus rúndacht na faisnéise atá i seilbh FIUnna agus a mhalartaítear trí FIU.net i mbaol, lena n-áirítear i gcás ina bhfuil ábhair imní ann i ndáil le neamhspleáchas agus uathriail FIU.