Airteagal 29 ESMA

1.   I gcomhréir le hAirteagal 16 de Rialachán (AE) Uimh. 1095/2010, déanfaidh ESMA treoirlínte a eisiúint agus a thabhairt cothrom le dáta maidir leis an gcomhar idir ESMA agus na húdaráis inniúla chun críocha an Rialacháin seo, lena n-áirítear na nósanna imeachta maidir le, agus na coinníollacha mionsonraithe a bhaineann le, tarmligean cúraimí.

2.   I gcomhréir le hAirteagal 16 de Rialachán (AE) Uimh. 1095/2010, déanfaidh ESMA, i gcomhar le ÚBE agus ÚEÁPC, treoirlínte a eisiúint agus a thabhairt cothrom le dáta maidir le cur i bhfeidhm an chórais formhuiniúcháin dá dtagraítear in Airteagal 11 den Rialachán seo faoin 2 Deireadh Fómhair 2025.

3.   Foilseoidh ESMA tuarascáil bhliantúil maidir le cur i bhfeidhm an Rialacháin seo, lena n-áirítear maidir leis na bearta maoirseachta arna ndéanamh agus fíneálacha agus íocaíochtaí pionósacha tréimhsiúla arna bhforchur ag ESMA faoin Rialachán seo. Beidh sa tuarascáil sin, go háirithe, faisnéis maidir le héabhlóid an mhargaidh rátálacha ESG san Aontas agus measúnú ar chur i bhfeidhm na gcóras tríú tír dá dtagraítear in Airteagail 10, 11 agus 12.

Cuirfidh ESMA an tuarascáil bhliantúil dá dtagraítear sa chéad fhomhír i láthair Pharlaimint na hEorpa, na Comhairle agus an Choimisiúin.

4.   Gach bliain, foilseoidh ESMA ar a shuíomh gréasáin liosta de sholáthraithe rátála ESG a áirítear sa chlár dá dtagraítear in Airteagal 14(1), lena léirítear a sciar iomlán den mhargadh san Aontas. Déanfar machnamh san fhoilseachán ar struchtúr an mhargaidh, lena n-áirítear leibhéil chomhchruinnithe agus éagsúlacht soláthraithe rátála ESG.

5.   Chun críocha mhír 4, déanfar an sciar den mhargadh a thomhas trí thagairt a dhéanamh don láimhdeachas bliantúil arna ghiniúint ó ghníomhaíochtaí rátála ESG ar leibhéal an ghrúpa san Aontas.

6.   Comhoibreoidh ESMA le ÚBE agus ÚEÁPC agus a chúraimí á gcur i gcrích aige agus rachaidh sé i gcomhairle le ÚBE agus ÚEÁPC sula ndéanfaidh sé treoirlínte a eisiúint agus a thabhairt cothrom le dáta agus sula gcuirfidh sé isteach dréachtchaighdeáin theicniúla rialála faoin Rialachán seo.