Airteagal 47 Comhthionscadail

1.   Féadfaidh an Coimisiún comhthionscadail a chur ar bun, bunaithe ar an ngá atá ag na geallsealbhóirí le sioncrónú, chun na hathruithe riachtanacha oibríochtúla a chur chun feidhme, ar athruithe iad a shainaithnítear i Máistirphlean Eorpach BAT mar athruithe a bhfuil tionchar acu ar fud an ghréasáin agus a bhfuil aibíocht leordhóthanach maidir le cur chun feidhme bainte amach acu chun cumais idir-inoibritheacha a chumasú i ngach Ballstát, d’fhonn feidhmíocht an Aerspáis Eorpaigh Aonair a fheabhsú.

2.   Féadfaidh an Coimisiún freisin sásraí rialachais a bhunú le haghaidh comhthionscadal agus a gcur chun feidhme. Beidh gach geallsealbhóir ábhartha sibhialta agus míleata rannpháirteach sna sásraí sin a mhéid is féidir agus, i gcás inar féidir agus más iomchuí, beidh ról ceannasach acu.

3.   Féadfaidh comhthionscadail a bheith incháilithe le haghaidh cistiú ón Aontas faoin gcreat airgeadais ilbhliantúil. Chuige sin, agus gan dochar d’inniúlacht na mBallstát cinneadh a dhéanamh i dtaobh an chaoi a n-úsáidfidh siad a gcuid acmhainní airgeadais, déanfaidh an Coimisiún anailís neamhspleách costais is tairbhe chomh maith leis na comhairliúcháin iomchuí leis na Ballstáit agus leis na geallsealbhóirí ábhartha i gcomhréir le hAirteagal 49, lena bhfiosrófar an ord tosaíochta agus na slite cuí go léir chun a gcur chun feidhme a mhaoiniú.

4.   Glacfaidh an Coimisiún gníomhartha cur chun feidhme lena mbunaítear na comhthionscadail agus na sásraí rialachais dá dtagraítear i míreanna 1 agus 2 den Airteagal seo. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 48(3).