5.3 PD calibration

Sabiex tiġi kkalkolata r-rata ta’ inadempjenza ta’ sena definita fil-punt (78) tal-Artikolu 4(1) tar-Regolament (UE) Nru 575/2013, jenħtieġ li l-istituzzjonijiet jiżguraw il-kompletezza tad-data kwantitattiva u kwalitattiva u informazzjoni oħra relatata mad-denominatur u man-numeratur, kif deskritt fil-paragrafi 73 u 74 u użati għall-kalkolu tar-rata ta’ inadempjenza medja osservata. B’mod partikolari, jenħtieġ li l-istituzzjonijiet jiżguraw li mill-inqas id-data li ġejja għall-perjodu ta’ osservazzjoni rilevanti msemmi fil-paragrafi 82 sa 83 tinħażen kif xieraq u tkun disponibbli:

• (a) il-kriterji għall-identifikazzjoni tat-tip ta’ skoperturi rilevanti koperti mill-mudell tal-PD ikkunsidrat;
• (b) il-kriterji għall-identifikazzjoni tas-segmenti tal-kalibrazzjoni;
• (c) il-motivaturi tar-riskju li jintużaw għad-differenzazzjoni tar-riskju; fejn motivatur tar-riskju rilevanti ġdid ikun ġie inkluż fil-mudell li għalih ma jkun hemm ebda data storika disponibbli, jenħtieġ li l-istituzzjonijiet jagħmlu sforz sabiex inaqqsu kemm jistgħu d-data nieqsa dwar il-motivaturi tar-riskju matul iż-żmien, kif deskritt fil-paragrafu 51(a), u japplikaw aġġustament xieraq u MoC skont it-taqsima 4.4;
• (d) in-numri kollha ta’ identifikazzjoni tad-debituri u tal-iskoperturi rilevanti għall-kalkolu tar-rata ta’ inadempjenza, filwaqt li jiġu kkunsidrati s-sitwazzjonijiet fejn in-numru tal-identifikazzjoni jkun inbidel matul iż-żmien, inklużi bidliet minħabba ristrutturar tal-iskoperturi.

Jenħtieġ li l-esklużjoni ta’ osservazzjonijiet mill-kalkolu tar-rata ta’ inadempjenza ta’ sena ssir biss fiż-żewġ sitwazzjonijiet li ġejjin:

• (a) debituri inklużi bi żball fis-sett tad-data tal-inadempjenzi, peress li ma jkunux għamlu inadempjenza fit-tifsira tad-definizzjoni ta’ inadempjenza skont l-Artikolu 178 tar-Regolament (UE) Nru 575/2013, kif speċifikat aktar fil-Linji Gwida dwar l-applikazzjoni tad-definizzjoni ta’ inadempjenza ta’ debitur skont dak l-Artikolu ma għandhomx jiġu inkużi fin-numeratur tar-rata ta’ inadempjenza ta’ sena;
• (b) id-debituri li ġew assenjati bi żball għall-mudell tal-klassifikazzjoni kkunsidrat, minkejja li ma jaqgħux fil-medda ta’ applikazzjoni ta’ dak il-mudell ta’ klassifikazzjoni, jenħtieġ li jiġu esklużi kemm min-numeratur kif ukoll mid-denominatur tar-rata ta’ inadempjenza ta’ sena.

Jenħtieġ li l-istituzzjonijiet jiddokumentaw it-tindif kollu tad-data, skont l-Artikolu 32(3)(b) tal-RTS dwar il-metodoloġija tal-valutazzjoni tal-IRB, fir-rigward tal-kalkolu tar-rata ta’ inadempjenza ta’ sena u b’mod partikolari:

• (a) għal mudelli ta’ PD mhux tal-konsumaturi, lista tal-osservazzjonijiet kollha fi ħdan is-sett tad-data li ġew esklużi, skont il-paragrafu 71, b’ġustifikazzjoni ta’ każ b’każ;
• (b) għal mudelli tal-PD tal-konsumaturi, informazzjoni dwar ir-raġunijiet u l-kwantità tal-esklużjonijiet tal-osservazzjonijiet li saru skont il-paragrafu 71.

5.3.2 Kalkolu ta’ rati ta’ inadempjenza ta’ sena

Sabiex tiġi kkalkolata r-rata ta’ inadempjenza ta’ sena msemmija fil-punt (78) tal-Artikolu 4(1) tar-Regolament (UE) Nru 575/2013, jenħtieġ li l-istituzzjonijiet jiżguraw dawn it-tnejn li ġejjin:

• (a) li d-denominatur ikun jikkonsisti mill-għadd ta’ debituri mhux inadempjenti bi kwalunkwe obbligu ta’ kreditu osservat fil-bidu tal-perjodu ta’ osservazzjoni ta’ sena; f’dan il-kuntest obbligu ta’ kreditu jirreferi għal dawn it-tnejn li ġejjin:
• (i) kwalunkwe entrata li tidher fil-karta bilanċjali, inkluż kwalunkwe ammont ta’ kapital, imgħax u tariffi;
• (ii) kwalunkwe entrata li ma tidhrix fil-karta bilanċjali, inklużi garanziji maħruġin mill-istituzzjoni bħala garanti.
• (b) li n-numeratur jinkludi dawk id-debituri kollha kkunsidrati fid-denominatur li matul il-perjodu ta’ osservazzjoni ta’ sena kellhom mill-inqas avveniment ta’ inadempjenza wieħed.

Meta l-istituzzjonijiet jkunu qegħdin jassenjaw id-debituri jew l-iskoperturi għal gradi jew aggregazzjonijiet għall-kalkolu tar-rata ta’ inadempjenza ta’ sena, jenħtieġ li dawn jikkunsidraw il-prevalazzjonijiet, iżda f’din l-assenjazzjoni ma ’għandhom jirriflettu l-ebda effett ta’ sostituzzjoni minħabba mitigazzjoni tar-riskju ta’ kreditu, u lanqas xi aġġustament konservattiv ex post introdott skont it-taqsima 8.1. Fejn ir-rata ta’ inadempjenza ta’ sena tiġi kkalkolata permezz ta’ grad jew aggregazzjoni ta’ klassifikazzjoni, jenħtieġ li d-denominatur jirreferi għad-debituri kollha assenjati għal grad jew aggregazzjoni ta’ klassifikazzjoni fil-bidu tal-perjodu ta’ osservazzjoni. Fejn ir-rata ta’ inadempjenza ta’ sena tiġi kkalkolata fil-livell tal-portafoll, jenħtieġ li d-denominatur jirreferi għad-debituri kollha assenjati għas-segment ta’ kalibrazzjoni rilevanti fil-bidu tal-perjodu ta’ osservazzjoni.

Jenħtieġ li l-istituzzjonijiet jikkalkolaw ir-rata ta’ inadempjenza ta’ sena anki għas-subgrupp ta’ debituri b’xi obbligu ta’ kreditu li fil-bidu tal-perjodu ta’ osservazzjoni rilevanti ma kellhomx klassifikazzjoni, iżda li kienu jinsabu fil-medda ta’ applikazzjoni tal-mudell ikkunsidrat (“klassifikazzjonijiet neqsin”), anki jekk dawn id-debituri ġew assenjati għal grad jew aggregazzjoni ta’ klassifikazzjoni b’mod konservattiv sabiex jiġu kkalkolati r-rekwiżiti tal-fondi proprji. Id-debituri li l-klassifikazzjonijiet tagħhom ikunu bbażati fuq informazzjoni nieqsa jew parzjalment nieqsa jew fejn il-klassifikazzjoni tkun skadiet iżda għadha titqies valida mill-istituzzjoni ma għandhomx jiġu kkunsidrati bħala klassifikazzjonijiet neqsin.

Għall-finijiet tal-paragrafi 73 sa 75, jenħtieġ li debitur jiġi inkluż fid-denominatur u, fejn rilevanti, fin-numeratur, anki fil-każ ta’ migrazzjoni għal skala ta’ klassifikazzjoni, aggregazzjoni jew mudell ta’ klassifikazzjoni differenti, sistema ta’ klassifikazzjoni jew approċċ għall-kalkolu tar-rekwiżiti kapitali fil-perjodu ta’ osservazjoni jew fejn l-obbligi ta’ kreditu korrispondenti kienu nbiegħu, tħassru, tħallsu lura jew inkella ġew magħluqa matul il-perjodu ta’ osservazzjoni. Jenħtieġ li l-istituzzjonijiet janalizzaw jekk dawn il-migrazzjonijiet jew il-bejgħ tal-obbligi ta’ kreditu jippreġudikawx ir-rata ta’ inadempjenza u, jekk iva, huma jirriflettu dan f’aġġustament xieraq u jikkunsidraw MoC adegwat.

F’kull każ, jenħtieġ li l-istituzzjonijiet jiżguraw li kull debitur inadempjenti jingħadd darba biss fin-numeratur u fid-denominatur tal-kalkolu tar-rata ta’ inadempjenza ta’ sena, anki fejn id-debitur kien sar inadempjenti aktar minn darba matul il-perjodu ta’ sena rilevanti.

Sabiex jagħżlu approċċ ta’ kalkolu xieraq kif meħtieġ bil-paragrafu 80, jenħtieġ li l-istituzzjonijiet jevalwaw ir-rati ta’ inadempjenza ta’ sena osservati fil-perjodu ta’ osservazzjoni storika mill-inqas darba kull trimestru.

5.3.3 Kalkolu tar-rata ta’ inadempjenza medja osservata

Ir-rati ta’ inadempjenza ta’ medja ta’ sena osservati (“rata ta’ inadempjenza medja osservata”) jenħtieġ li jiġu kkalkolati għal kull grad jew aggregazzjoni ta’ klassifikazzjoni u, barra minn hekk, għat-tip ta’ skoperturi koperti mill-mudell rilevanti tal-PD kif ukoll għal kwalunkwe segment tal-kalibrazzjoni rilevanti.

Jenħtieġ li l-istituzzjonijiet jagħżlu approċċ xieraq bejn approċċ ibbażat fuq it-trikkib u approċċ ibbażat fuq perjodu ta’ żmien ta’ sena li ma jirkbux ‘il xulxin, sabiex tiġi kkalkolata r-rata ta’ inadempjenza medja osservata bbażata fuq analiżi dokumentata. Jenħtieġ li din l-analiżi tinkludi mill-inqas dawn li ġejjin:

• (a) analiżi tal-preġudizzju possibbli minħabba l-proporzjon ta’ kuntratti fuq perjodu qasir u mitmuma li ma jistgħux jiġu osservati matul il-perjodi ta’ sena rilevanti;
• (b) analiżi tal-preġudizzju possibbli minħabba d-dati tal-kalkolu speċifiċi li ntgħażlu;
• (c) għall-istituzzjonijiet li jużaw perjodi ta’ żmien ta’ sena li jirkbu ‘l xulxin, analiżi tal-preġudizzju potenzjalment sinifikanti minħabba ppeżar żejjed impliċitu tal-perjodu ta’ żmien ta’ trikkib;
• (d) analiżi tal-preġudizzju potenzjalment sinifikanti minħabba effetti staġunali relatati mad-dati tal-kalkolu li ntgħażlu.

Għall-finijiet tal-paragrafi 79 u 80, jenħtieġ li l-istituzzjonijiet jikkalkolaw ir-rati ta’ inadempjenza medji osservati bħala l-medja aritmetika tar-rati ta’ inadempjenza ta’ sena kollha kkalkolati skont il-paragrafi 73 sa 76. Fil-każ ta’ mudelli tal-PD għall-klassi ta’ skopertura fil-livell tal-konsumatur, l-istituzzjonijiet jistgħu jikkalkolaw ir-rata ta’ inadempjenza medja osservata bħala medja ppeżata ta’ rati ta’ inadempjenza ta’ sena fejn istituzzjoni ma tagħtix l-istess importanza lil data storika għaliex data aktar riċenti tbassar aħjar it-telf, skont l-Artikolu 180(2)(e) tar-Regolament (UE) Nru 575/2013.

5.3.4 Rata ta’ inadempjenza medja fuq perjodu twil

Sabiex jiġi ddeterminat il-perjodu ta’ osservazzjoni storika msemmi fl-Artikolu 180(1)(h) u 180(2)(e) tar-Regolament (UE) Nru 575/2013, osservazzjonijiet addizzjonali għall-aktar 5 snin riċenti, waqt il-kalibrazzjoni tal-mudell, jenħtieġ li jitqiesu rilevanti meta dawn l-osservazzjonijiet ikunu meħtieġa sabiex il-perjodu ta’ osservazzjoni storika jirrifletti l-medda probabbli ta’ varjabbiltà tar-rati ta’ inadempjenza ta’ dak it-tip ta’ skoperturi, kif imsemmi fl-Artikolu 49(3) tal-RTS dwar il-metodoloġija tal-valutazzjoni tal-IRB.

Sabiex tiġi vvalutata r-rappreżentattività tal-perjodu ta’ osservazzjoni storika msemmi fil-paragrafu 82 għall-medda probabbli ta’ varjabbiltà tar-rati ta’ inadempjenza ta’ sena, jenħtieġ li l-istituzzjonijiet jivvalutaw jekk il-perjodu ta’ osservazzjoni storika jkunx fih taħlita rappreżentattiva ta’ snin tajbin u snin ħżiena, u jikkunsidraw dan kollu li ġej:

• (a) il-varjabbiltà tar-rati ta’ inadempjenza ta’ sena osservati kollha;
• (b) l-eżistenza, in-nuqqas jew il-prevalenza ta’ rati ta’ inadempjenza ta’ sena relatati ma’ snin ħżiena, kif rifless mill-indikaturi ekonomiċi li huma rilevanti għat-tip ta’ skoperturi kkunsidrati fil-perjodu ta’ osservazzjoni storika;
• (c) bidliet sinifikanti fl-ambjent ekonomiku, legali jew tan-negozju fil-perjodu ta’ osservazzjoni storika.

Fejn il-perjodu ta’ osservazzjoni storika msemmi fil-paragrafu 82 jirrappreżenta l-medda probabbli ta’ varjabbiltà tar-rati ta’ inadempjenza, ir-rata ta’ inadempjenza medja fuq perjodu twil jenħtieġ li tiġi kkalkolata bħala l-medda osservata tar-rati ta’ inadempjenza ta’ sena f’dak il-perjodu.

Fejn il-perjodu ta’ osservazzjoni storika msemmi fil-paragrafu 82 ma jirrappreżentax il-medda probabbli ta’ varjabbiltà tar-rati ta’ inadempjenza, kif imsemmi fl-Artikolu 49(4) tal-RTS dwar il-metodoloġija tal-valutazzjoni tal-IRB, jenħtieġ li l-istituzzjonijiet japplikaw dan li ġej:

• (a) fejn fil-perjodu ta’ osservazzjoni storika ma jiġux inklużi snin ħżiena jew ma jiġux inklużi biżżejjed snin ħżiena, il-medja tar-rati ta’ inadempjenza ta’ sena osservati jenħtieġ li tiġi aġġustata sabiex tagħti stima ta’ rata ta’ inadempjenza medja fuq perjodu twil;
• (b) fejn is-snin ħżiena jiġu rrappreżentati żżejjed fil-perjodu ta’ osservazzjoni storika, il-medja tar-rati ta’ inadempjenza ta’ sena osservati tista’ tiġi aġġustata sabiex tagħti stima ta’ rata ta’ inadempjenza medja fuq perjodu twil fejn ikun hemm korrelazzjoni sinifikanti bejn l-indikaturi ekonomiċi msemmija fil-paragrafu 83(b) u r-rati ta’ inadempjenza ta’ sena disponibbli.

Jenħtieġ li l-istituzzjonijiet jiżguraw li, bħala riżultat tal-aġġustamenti msemmija fil-punti (a) u (b), ir-rata ta’ inadempjenza medja fuq perjodu twil aġġustata tirrifletti l-medda probabbli ta’ varjabbiltà tar-rati ta’ inadempjenza.

Fil-każ eċċezzjonali fejn ir-rata ta’ inadempjenza fuq perjodu twil tkun aktar baxxa mill-medja tar-rati ta’ inadempjenza ta’ sena osservati kollha minħabba xi aġġustament li jkun sar skont il-paragrafu 85, jenħtieġ li l-istituzzjonijiet iqabblu r-rati ta’ inadempjenza medji fuq perjodu twil bl-ogħla ta’ dawn li ġejjin:

• (a) il-medja osservata tar-rati ta’ inadempjenza ta’ sena tal-aktar 5 snin riċenti;
• (b) il-medja osservata tar-rati ta’ inadempjenza ta’ sena disponibbli kollha.

jenħtieġ li l-istituzzjonijiet jiġġustifikaw id-direzzjoni u d-daqs tal-aġġustament, inkluża l-adegwatezza tal-MoC ikkunsidrat, f’konformità mar-rekwiżit fl-Artikolu 49(4)(b) tal-RTS dwar il-metodoloġija tal-valutazzjoni tal-IRB u t-taqsima 4.4. Barra minn dan, fejn ir-rata ta’ inadempjenza medja fuq perjodu twil aġġustata tkun aktar baxxa mill-ogħla valur taż-żewġ valuri msemmija fil-punti (a) u (b), jenħtieġ li jiġġustifikaw b’mod speċifiku għaliex dawn iż-żewġ valuri ma jkunux xierqa.

5.3.5 Kalibrazzjoni għar-rata ta’ inadempjenza medja fuq perjodu twil

Jenħtieġ li j-istituzzjonijiet ikollhom fis-seħħ proċessi b’saħħithom u definiti sew li jiżguraw kalibrazzjoni b’saħħitha billi jinkludu dawn kollha li ġejjin fil-proċess tal-kalibrazzjoni tagħhom:

• (a) testijiet ta’ kalibrazzjoni kwantitattiva permezz tal-grad jew aggregazzjoni ta’ klassifikazzjoni;
• (b) testijiet ta’ kalibrazzjoni kwantitattiva fuq livell ta’ segment tal-kalibrazzjoni;
• (c) analiżijiet kwalitattivi supplimentari, bħal ġudizzji esperti dwar il-forma tad-distribuzzjoni tad-debituri li tirriżulta, l-għadd minimu ta’ debituri għal kull grad u l-evitar ta’ konċentrazzjoni mhux dovuta f’ċerti gradi jew aggregazzjonijiet.

Jenħtieġ li fid-dokumentazzjoni tal-mudell tal-PD l-istituzzjonijiet jaħżnu u jiddeskrivu l-kampjun tal-kalibrazzjoni assoċjat ma’ kull segment tal-kalibrazzjoni. Sabiex tiġi żgurata konformità mal-Artikolu 180(1)(a) jew 180(2)(a) tar-Regolament (UE) Nru 575/2013, jenħtieġ li l-istituzzjonijiet isibu bilanċ xieraq bejn il-komparabbiltà tal-kampjun tal-kalibrazzjoni mal-portafoll tal-applikazzjoni f’termini tal-karatteristiċi tad-debitur u tat-tranżazzjoni u r-rappreżentattività tiegħu tal-medda probabbli ta’ varjabbiltà tar-rati ta’ inadempjenza, kif imsemmi fit-taqsima 5.3.4.

Jenħtieġ li l-istituzzjonijiet iwettqu l-kalibrazzjoni wara li jkunu kkunsidraw kwalunkwe prevalazzjoni li tkun ġiet applikata fl-assenjazzjoni tad-debituri għal gradi jew aggregazzjonijiet, u qabel l-applikazzjoni ta’ MoC jew limiti għal stimi tal-PD, kif imsemmi fl-Artikoli 160(1) u 163(1) tar-Regolament (UE) Nru 575/2013. Fejn metodu ta’ klassifikazzjoni jew politika ta’ prevalazzjoni jkun/tkun inbidel/inbidlet matul iż-żmien, jenħtieġ li l-istituzzjonijiet janalizzaw l-effetti ta’ dawk il-bidliet fuq il-frekwenza u l-kamp ta’ applikazzjoni tal-prevalazzjonijiet u jikkunsidrawhom b’mod xieraq.

Il-proċess tal-raggruppar ta’ debituri jew skoperturi klassifikati għal gradi jew aggregazzjonijiet, b’mod partikolari fejn l-istituzzjonijiet iwettqu dan ir-ragruppar permezz tal-identifikazzjoni ta’ intervalli ta’ valuri tal-punti li jirriflettu livell tal-PD definit minn qabel assenjat għal grad ta’ skala prinċipiali, jista’ jsir matul il-kalibrazzjoni.

Filwaqt li jikkunsidraw id-disponibbiltà tad-data, l-istruttura tal-mudell u tal-portafoll, kif ukoll ir-rekwiżiti tan-negozju, jenħtieġ li l-istituzzjonijiet jagħżlu metodu xieraq biex iwettqu l-kalibrazzjoni skont il-prinċipji li ġejjin:

• (a) l-istituzzjonijiet jistgħu jagħżlu wieħed mit-tipi ta’ kalibrazzjoni li ġejjin:
• (i) kalibrazzjoni skont l-Artikolu 180(1)(a) jew 180(2)(a) tar-Regolament (UE) Nru 575/2013;
• (ii) kalibrazzjoni skont l-Artikolu 169(3) tar-Regolament (UE) Nru 575/2013 flimkien mal-Artikolu 180(1)(a) jew 180(2)(a) tar-Regolament, jekk tintuża skala ta’ klassifikazzjoni kontinwa;
• (b) għal skoperturi għal korporattivi, istituzzjonijiet, gvernijiet ċentrali u banek ċentrali għal skoperturi ta’ ekwità, fejn istituzzjoni tuża l-approċċ tal-PD/LDG stipulat fl-Artikolu 155(3) tar-Regolament (UE) Nru 575/2013, l-istituzzjonijiet jistgħu jagħżlu wieħed mit-tipi ta’ kalibrazzjoni li ġejjin:
• (i) kalibrazzjoni bbaża fuq assoċjazzjoni għall-iskala tal-klassifikazzjoni li tintuża minn istituzzjoni esterna tal-valutazzjoni tal-kreditu (ECAI) jew organizzazzjoni simili skont l-Artikolu 180(1)(f) tar-Regolament (UE) Nru 575/2013;
• (ii) għal mudell statistiku ta’ tbassir tal-inadempjenza, skont it-Taqsima 4 tal-RTS dwar il-metodoloġija tal-valutazzjoni tal-IRB, fejn il-PDs jiġu stmati bħala medji sempliċi tal-istimi tal-probabbiltà ta’ inadempjenza għal debituri individwali fi grad jew aggregazzjoni partikolari, skont l-Artikolu 180(1)(g) tar-Regolament (UE) Nru 575/2013, kalibrazzjoni fil-livell ta’ segmenti tal-kalibrazzjoni xierqa tal-istimi tal-probabbiltà ta’ inadempjenza rilevanti;
• (c) għal skoperturi fil-livell tal-konsumaturi, l-istituzzjonijiet jistgħu jagħżlu kalibrazzjoni bbażata fuq it-telf u l-LGDs totali, skont l-Artikoli 180(2)(b) u 180(2)(d) tar-Regolament (UE) Nru 575/2013;
• (d) għal riċevibbli korporattivi mixtrija, l-istituzzjonijiet jistgħu jagħżlu kalibrazzjoni bbażata fuq it-telf u l-LGDs mistennija, skont l-Artikoli 180(1)(b) u 180(1)(c) tar-Regolament (UE) Nru 575/2013.

Sabiex jiġu ddeterminati l-istimi tal-PD msemmija fil-paragrafu 91, jenħtieġ li l-kalibrazzjoni jikkunsidra jew:

• (a) ir-rata ta’ inadempjenza medja fuq perjodu twil fil-livell tal-grad jew tal-aggregazzjoni, li f’dan il-każ jenħtieġ li l-istituzzjonijiet jipprovdu testijiet addizzjonali ta’ kalibrazzjoni fil-livell tas-segment tal-kalibrazzjoni rilevanti; jew
• (b) ir-rata ta’ inadempjenza medja fuq perjodu twil fil-livell tas-segment tal-kalibrazzjoni, li f’dan il-każ jenħtieġ li l-istituzzjonijiet jipprovdu testijiet addizzjonali ta’ kalibrazzjoni fil-livell tal-gradi jew tal-aggregazzjonijiet rilevanti jew, fejn jużaw stimi diretti tal-PD skont l-Artikolu 169(3) tar-Regolament (UE) Nru 575/2013, f’livell li jkun xieraq għall-applikazzjoni tal-mudell ta’ probabbiltà.

Irrispettivament mill-approċċi msemmija fil-paragrafu 92 li l-istituzzjonijiet jagħżlu, huma jenħtieġ li jivvalutaw l-effett potenzjali tal-metodu tal-kalibrazzjoni li jintgħażel fuq l-imġiba tal-istimi tal-PD matul iż-żmien.

Sabiex jiġu ddeterminati l-istimi tal-PD bbażati fuq assoċjazzjoni għal skala ta’ klassifikazzjoni esterna, kif imsemmi fil-paragrafu 91(b) ((i)), jenħtieġ li l-istituzzjonijiet jibbażaw ir-rati ta’ inadempjenza osservati għall-gradi tal-organizzazzjoni esterna fuq serje ta’ ħinijiet li jirrappreżentaw il-medda probabbli ta’ varjabbiltà tar-rati ta’ inadempjenza għall-gradi u l-aggregazzjonijiet tal-portafoll partikolari.

Fejn l-istituzzjonijiet jidderivaw l-istimi tal-PD mill-istimi tat-telf u tal-LGDs skont l-Artikoli 161(2) u 180(2)(b) tar-Regolament (UE) Nru 575/2013, jenħtieġ li jużaw RDS li jinkludi t-telf realizzat fuq l-inadempjenzi kollha identifikati matul il-perjodu ta’ osservazzjoni storika speċifikat skont it-taqsima 6.3.2.1 u l-motivaturi rilevanti tat-telf.

Sabiex jintużaw stimi diretti tal-PD għall-kalkolu tar-rekwiżiti tal-fondi proprji skont l-Artikolu 169(3) tar-Regolament (UE) Nru 575/2013, jenħtieġ li l-istituzzjonijiet juru li s-suppożizzjonijiet teoretiċi tal-mudell tal-probabbiltà li jkunu bbażati fuq il-metodoloġija tal-istima jiġu ssodisfati sa punt suffiċjenti fil-prattika u li tinżamm ir-rata ta’ inadempjenza medja fuq perjodu twil. B’mod partikolari, jenħtieġ li jiġu ssodisfati r-rekwiżiti kollha dwar id-data u r-rappreżentattività, inklużi dawk fl-Artikolu 174(c) tar-Regolament (UE) Nru 575/2013, u tiġi applikata d-definizzjoni ta’ inadempjenza skont l-Artikolu 178 tar-Regolament (UE) Nru 575/2013. L-użu ta’ PDs kontinwi jew kwalunkwe livellar tar-rati ta’ inadempjenza sabiex jingħelbu n-nuqqas ta’ data, kapaċità diskriminatorja baxxa jew kwalunkwe nuqqas ieħor fl-assenjazzjoni tal-klassifikazzjoni jew fil-proċess tal-istima tal-PD, jew sabiex jitnaqqsu r-rekwiżiti tal-fondi proprji ma għandu jiġi adottat taħt l-ebda ċirkostanza.

L-istituzzjonijiet jistgħu jaqsmu l-iskoperturi koperti mill-istess mudell tal-PD f’ħafna segmenti tal-kalibrazzjoni differenti skont kif ikun meħtieġ, fejn subgrupp wieħed jew aktar ta’ dawn l-iskoperturi jġorru livell ta’ riskju differenti b’mod sinifikanti. Għal dan il-għan, jenħtieġ li l-istituzzjonijiet jużaw motivaturi rilevanti ta’ segmentazzjoni u jiġġustifikaw u jiddokumentaw l-użu u l-kamp ta’ applikazzjoni tas-segment tal-kalibrazzjoni.

Fejn jintużaw metodi ta’ għoti ta’ punteġġ, jenħtieġ li l-istituzzjonijiet jiżguraw li:

• (a) fejn ikun hemm bidla fil-metodu tal-għoti ta’ punteġġ li jintuża, l-istituzzjonijiet jikkunsidraw jekk ikunx meħtieġ li jiġu kkalkolati mill-ġdid il-punteġġi tad-debituri jew tal-iskoperturi abbażi tas-sett tad-data oriġinali minflok ma jintużaw punteġġi li kienu ġew ikkalkolati abbażi ta’ verżjonijiet preċedenti tal-metodu tal-għoti ta’ punteġġ, u, fejn dan il-kalkolu mill-ġdid ma jkunx possibbli, li l-istituzzjonijiet jivvalutaw l-effetti potenzjali u jikkunsidraw dawk l-effetti permezz ta’ żieda xierqa tal-MoC għall-istimi tagħhom tal-PD;
• (b) fejn japplika l-Artikolu 180(1)(g) tar-Regolament (UE) Nru 575/2013, l-istimi tal-PD li kienu ġew idderivati bħala medja sempliċi ta’ stimi individwali tal-PD ikunu adegwati għal gradi rilevanti, permezz tal-applikazzjoni ta’ testijiet tal-kalibrazzjoni għal dawn l-istimi f’livell ta’ grad, abbażi tar-rati ta’ inadempjenza ta’ sena li jirrappreżentaw il-medda probabbli ta’ varjabbiltà tar-rati ta’ inadempjenza.

Il-kalibrazzjoni ma għandhiex tinfluwenza l-ordni tal-klassifikazzjoni tad-debituri jew tal-iskoperturi f’segment tal-kalibrazzjoni, għajr f’kull grad jew aggregazzjoni.