Suġġett

Dawn il-linji gwida jispeċifikaw il-proċeduri u l-metodoloġiji komuni għall-funzjonament tal-proċess ta’ reviżjoni u evalwazzjoni superviżorji (SREP) imsemmija fl-Artikoli 48n, 97 u 107(1)(a) tad-Direttiva 2013/36/UE² , inklużi dawk għall-valutazzjoni tal-organizzazzjoni u t-trattament tar-riskji, inklużi l-ħasil tal-flus u l-finanzjament tat-terroriżmu, imsemmija fl-Artikolu 76 sa 87 ta’ dik id-Direttiva u l-proċessi u l-azzjonijiet imwettqa b’referenza għall-Artikoli 48o, 98, 100, 101, 102, 104, 104a, 104b, 104c, 105, 107(1)(b) u 117 ta’ dik id-Direttiva. Dawn il-linji gwida għandhom l-għan li jipprovdu metodoloġiji komuni li għandhom jintużaw mill-awtoritajiet kompetenti meta jwettqu testijiet tal-istress superviżorji fil-kuntest tal-SREP tagħhom imsemmi fl-Artikolu 100(2) tad-Direttiva 2013/36/UE. Barra minn hekk, dawn il-linji gwida jispeċifikaw ukoll f’konformità mal-Artikolu 104a(7) tad-Direttiva (UE) 2024/1619 kif għandhom jitħaddmu r-rekwiżiti meta istituzzjoni tkun intrabtet bil-minimu tal-output.

² Id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE, (ĠU L 176, 27.6.2013, p. 338, ELI: http://data.europa.eu/eli/dir/2013/36/oj).

Dawn il-linji gwida ma jistabbilixxux metodoloġiji għat-testijiet tal-istress imwettqa mill-EBA f’kooperazzjoni ma’ awtoritajiet kompetenti oħrajn f’konformità mal-Artikolu 22 tar-Regolament (UE) Nru 1093/2010; madankollu, dawn jiddeskrivu l-firxa tat-testijiet tal-istress u jgħinu biex jiġi stabbilit il-kuntest xieraq għall-kunsiderazzjoni ta’ testijiet tal-istress futuri tal-EBA bħala parti waħda mit-testijiet tal-istress superviżorji.