+Artikolu 318 Kalkolu tat-telf nett u tat-telf gross
---+Artikolu 318 1.
---+Artikolu 318 2.
---+Artikolu 318 3.
---+Artikolu 318 4.

Artikolu 318 Kalkolu tat-telf nett u tat-telf gross

-

1. Ħarsa ġenerali

,
Artikolu 318 1.

Għall-finijiet tal-Artikolu 316(1), l-istituzzjonijiet għandhom jikkalkulaw għal kull avveniment ta' riskju operazzjonali telf nett kif ġej:

telf nett = telf gross – irkupru

fejn:

telf gross

= telf marbut ma' avveniment ta' riskju operazzjonali qabel l-irkupri ta' kwalunkwe tip;

irkupru

= avveniment indipendenti wieħed jew aktar, relatat mal-avveniment tar-riskju operazzjonali oriġinali, separat fiż-żmien, li fih jiġu riċevuti fondi jew influssi ta' benefiċċji ekonomiċi minn parti terza.

L-istituzzjonijiet għandhom iżommu fuq bażi kontinwa kalkolu aġġornat tat-telf nett għal kull avveniment speċifiku ta' riskju operazzjonali. Għal dak l-għan, l-istituzzjonijiet għandhom jaġġornaw il-kalkolu tat-telf nett fuq il-bażi tal-varjazzjonijiet osservati jew stmati tat-telf gross u l-irkupru għal kull waħda mill-aħħar 10 snin finanzjarji. Meta t-telf, marbut mal-istess avveniment ta' riskju operazzjonali, jiġi osservat matul snin finanzjarji multipli f'dak il-perjodu ta' żmien ta' 10 snin, l-istituzzjoni għandha tikkalkula u żżomm aġġornat:

(a) 

it-telf nett, it-telf gross u l-irkupru għal kull waħda mis-snin finanzjarji tal-perjodu ta' żmien ta' 10 snin fejn dawk it-telf nett, it-telf gross u l-irkupru ġew irreġistrati;

(b) 

it-telf nett aggregat, it-telf gross aggregat u l-irkupru aggregat tas-snin finanzjarji rilevanti kollha tal-perjodu ta' żmien ta' 10 snin.
Artikolu 318 2.

Għall-finijiet tal-paragrafu 1, l-elementi li ġejjin għandhom jiġu inklużi fil-komputazzjoni tat-telf gross:

(a) 

imposti diretti, bħal indebolimenti, saldi, ammonti mħallsa biex jagħmlu tajjeb għad-danni, penali u imgħax f'arretrati u tariffi legali għar-rapporti tal-introjtu tal-istituzzjoni u tniżżil fil-valur minħabba l-avveniment ta' riskju operazzjonali, inkluż:

(i) 

meta l-avveniment ta' riskju operazzjonali jkun relatat mar-riskju tas-suq, l-ispejjeż għat-treġġigħ lura ta' stralċ tal-pożizzjonijiet tas-suq fl-ammont ta' telf irreġistrat tal-elementi tar-riskju operazzjonali;

(ii) 

meta l-pagamenti jkunu relatati ma' nuqqasijiet jew ma' proċessi inadegwati tal-istituzzjoni, penali, imposti tal-imgħax, imposti fuq ħlas tard, tariffi legali u, bl-esklużjoni tal-ammont tat-taxxa oriġinarjament dovut, it-taxxa, ħlief jekk dak l-ammont ikun diġà inkluż taħt il-punt (e);

(b) 

l-ispejjeż imġarrba bħala konsegwenza tal-avveniment tar-riskju operazzjonali, inkluż l-ispejjeż esterni b'rabta diretta mal-avveniment ta' riskju operazzjonali u l-ispejjeż tat-tiswija jew tas-sostituzzjoni, imġarrba biex tiġi rrestawrata l-pożizzjoni li kienet prevalenti qabel ma seħħ l-avveniment ta' riskju operazzjonali;

(c) 

provvedimenti jew riżervi mniżżla fir-rapporti tal-introjtu kontra l-impatt potenzjali tat-telf operattiv, inkluż dawk minn avvenimenti ta' mġiba ħażina;

(d) 

telf li jirriżulta minn avvenimenti ta' riskju operazzjonali b'impatt finanzjarju definittiv li huma temporanjament iddepożitati f'kontijiet tranżitorji jew sospiżi u li jkunu għadhom ma humiex riflessi fir-rapporti tal-introjtu (“telf pendenti”);

(e) 

impatti ekonomiċi negattivi ddepożitati f'sena finanzjarja u li huma dovuti għal avvenimenti ta' riskju operazzjonali li jħallu impatt fuq il-flussi ta' flus jew fuq id-dikjarazzjonijiet finanzjarji tas-snin finanzjarji preċedenti (“telf tat-twaqqit”).

Għall-finijiet tal-ewwel subparagrafu, il-punt (d), it-telf pendenti materjali għandu jiġi inkluż fis-sett ta' data dwar it-telf f'perjodu ta' żmien proporzjonat mad-daqs u mal-età tal-element pendenti.

Għall-finijiet tal-ewwel subparagrafu, il-punt (e), l-istituzzjoni għandha tinkludi fis-sett ta' data dwar it-telf, it-telf tat-twaqqit materjali meta dak it-telf ikun dovut għal avvenimenti ta' riskju operazzjonali li jkopru aktar minn sena finanzjarja waħda. L-istituzzjonijiet għandhom jinkludu fl-ammont ta' telf irreġistrat tal-element tar-riskju operazzjonali ta' telf ta' sena finanzjarja li huwa dovut għall-korrezzjoni ta' żbalji tat-tidħil fil-kotba li jkunu seħħew fi kwalunkwe sena finanzjarja preċedenti, anki meta dak it-telf ma jkunx jaffettwa lil terzi persuni direttament. Meta jkun hemm telf materjali ta' twaqqit u l-avveniment ta' riskju operazzjonali jkun jaffettwa lil terzi persuni direttament, inkluż lil klijenti, lil fornituri u lil impjegati tal-istituzzjoni, l-istituzzjoni għandha tinkludi wkoll id-dikjarazzjoni mill-ġdid uffiċjali ta' rapporti finanzjarji maħruġa qabel.
Artikolu 318 3.

Għall-finijiet tal-paragrafu 1, l-elementi li ġejjin għandhom jiġu esklużi mill-komputazzjoni tat-telf gross:

(a) 

l-ispejjeż ta' kuntratti tal-manutenzjoni ġenerali fuq proprjetà, fuq impjant jew fuq tagħmir;

(b) 

in-nefqa interna jew esterna biex jissaħħaħ in-negozju wara telf mir-riskju operazzjonali, inkluż aġġornamenti, titjib, inizjattivi tal-valutazzjoni tar-riskju u tisħiħ;

(c) 

primjums tal-assigurazzjoni.
Artikolu 318 4.
Għall-finijiet tal-paragrafu 1, l-irkupri għandhom jintużaw biex jitnaqqas it-telf gross biss meta l-istituzzjoni tkun irċiviet pagament. Ir-riċevibbli ma għandhomx jitqiesu bħala rkupri.

Fuq talba mill-awtorità kompetenti, l-istituzzjoni għandha tipprovdi d-dokumentazzjoni kollha meħtieġa biex jiġu verifikati l-pagamenti riċevuti u meqjusin fil-kalkolu tat-telf nett ta' avveniment ta' riskju operazzjonali.

1.1 Referenzi

1.2 Rekwiżiti identifikati

1.3 Standards relatati

2. Rekwiżiti identifikati

Rekwiżiti

3. Standards relatati

Standards
  • Builddate: 01.01.2027 00:00:00 -Doknr: CELEX:32013R0575
  • EULAW -

    EN: Legal acts of the European Union from EUR-Lex, https://eur-lex.europa.eu/. © European Union. Re-use is authorised by Decision 2011/833/EU, provided the source is acknowledged; the consolidated texts are licensed under CC BY 4.0 (EUR-Lex legal notice). Divided into sections and converted into the GRCA format, the wording unchanged. Only the legislation published in the Official Journal of the European Union is deemed authentic.

    DE: Rechtsakte der Europäischen Union aus EUR-Lex, https://eur-lex.europa.eu/. © Europäische Union. Weiterverwendung nach Beschluss 2011/833/EU mit Quellenangabe gestattet; die konsolidierten Fassungen stehen unter CC BY 4.0 (Rechtlicher Hinweis von EUR-Lex). In Abschnitte aufgeteilt und in das GRCA-Format umgewandelt, der Wortlaut unverändert. Verbindlich sind allein die im Amtsblatt der Europäischen Union veröffentlichten Rechtsakte.