Preamble: 1

(1)

Sabiex tiġi żgurata kooperazzjoni effiċjenti u fil-ħin bejn l-awtoritajiet kompetenti tal-Istati Membri tad-domiċilju u dawk ospitanti l-iskambju tal-informazzjoni għandu jkun bidirezzjonali, fi ħdan il-kompetenzi superviżorji rispettivi ta' dawk l-awtoritajiet. Għalhekk għandhom jiġu stabbiliti formoli standard, mudelli u proċeduri operattivi, inklużi l-iskedi taż-żmien għall-iskambju ta' informazzjoni matul sitwazzjonijiet ta' negozju avvjat u s-sitwazzjonijiet ta' stress ta' likwidità. Għandhom jiġu stabbiliti wkoll frekwenzi u dati ta' rimessi massimi armonizzati għall-informazzjoni li trid tiġi skambjata fuq bażi regolari li jipprovdu għal informazzjoni li trid tiġi skambjata fuq bażi annwali jew darbtejn fis-sena. Biex jiġi żgurat li tiġi skambjata l-aktar informazzjoni aġġornata, l-awtoritajiet kompetenti għandhom madankollu jiskambjaw informazzjoni malajr kemm ikun prattikabbli mingħajr wieħed jistenna sakemm jiskadu d-dati massimi ta' rimessi.

(2)

Mingħajr preġudizzju għal proċeduri għal skambju ta' informazzjoni standard stabbiliti f'dan ir-Regolament, l-awtoritajiet kompetenti tal-Istati Membri tad-domiċilju u dawk ospitanti għandhom jgħarrfu lil xulxin mingħajr dewmien dwar kwalunkwe sitwazzjoni potenzjali li taffettwa l-istabbiltà finanzjarja jew il-funzjonament ta' fergħa u jipprovdu kull tagħrif essenzjali u rilevanti dwar dik is-sitwazzjoni.

(3)

Minħabba d-differenzi fid-daqs, fil-kumplessità u s-sinifikat ta' fergħat li joperaw fl-Istati Membri ospitanti, huwa importanti li jiġi applikat il-prinċipju ta' proporzjonalità fl-iskambju ta' informazzjoni. Għal dan l-għan, jeħtieġ li l-awtoritajiet kompetenti fl-Istati Membri ospitanti li jirċievu medda aktar kbira ta' informazzjoni fejn dawn l-awtoritajiet huma responsabbli għal fergħat identifikati bħala sinifikanti skont l- Artikolu 51 tad- Direttiva 2013/36/UE għandhom ikunu riflessi f'forom, mudelli u frekwenzi użati għall-iskambju ta' din l-informazzjoni.

(4)

Sabiex tiġi żgurata t-trażmissjoni effiċjenti ta' informazzjoni lil persuni rilevanti kif ukoll il-kunfidenzjalità tal-informazzjoni, l-awtoritajiet kompetenti għandhom jistabbilixxu, u regolarment jaġġornaw, listi ta' persuni ta' kuntatt.

(5)

L-iskambju ta' informazzjoni bejn l-awtoritajiet kompetenti tal-Istati Membri tad-domiċilju u dawk ospitanti mhux limitat għal it-tipi ta' informazzjoni speċifikati fl- Artikolu 50 tad-Direttiva 2013/36/UE, u għalhekk għat-tipi ta' informazzjoni speċifikati f'dan ir-Regolament. B'mod partikolari, id-Direttiva 2013/36/UE tiffissa d-dispożizzjonijiet għal skambju ta' informazzjoni rigward verifika fuq il-post tal-fergħat, notifiki tal-eżerċizzju tad-dritt ta' stabbiliment u l-libertà li jiġu pprovduti servizzi, u miżuri, inkluż dawk ta' prekawzjoni, meħuda mill-awtoritajiet kompetenti fir-rigward ta' fergħat u l-impriżi prinċipali tagħhom. Dan ir-Regolament għalhekk m'għandhux jistipula rekwiżiti għal skambju ta' informazzjoni f'dawk iż-żoni.

(6)

Formoli, mudelli u proċeduri standard għandhom ukoll jindirizzaw l-iskambji ta' informazzjoni dwar it-twettiq ta' attivitajiet fl-Istat Membru ospitanti permezz tal-provvediment ta' servizzi transfruntiera.

(7)

Minħabba n-natura ta' servizzi transkonfinali, l-awtoritajiet kompetenti tal-Istati Membri ospitanti jkunu kkonfrontati minn nuqqas ta' informazzjoni dwar l-operazzjonijiet kondotti fil-ġurisdizzjonijiet tagħhom, u huwa essenzjali li wieħed jistabbilixxi proċeduri għall-iskambju ta' informazzjoni għall-finijiet tas-salvagwardja tal-istabbiltà finanzjarja u l-kundizzjonijiet ta' monitoraġġ ta' awtorizzazzjonijiet, b'mod partikolari l-monitoraġġ ta' jekk l-istituzzjoni tipprovdix servizzi skont in-notifiki pprovduti. Minkejja l-importanza ta' din l-informazzjoni, minħabba l-ħtieġa li jiġi evitat piż potenzjali fil-ġbir u t-tixrid tagħha lill-awtoritajiet kompetenti kollha tal-Istati Membri ospitanti, l-informazzjoni għandha tingħata wara talba mill-awtoritajiet kompetenti tal-Istati Membri ospitanti aktar milli tiġi skambjata fuq bażi regolari.

(8)

Minħabba l-fatt li t-tip ta' informazzjoni li għandha tiġi skambjata bejn l-awtoritajiet kompetenti hija ddettaljata fir-Regolament Delegat tal-Kummissjoni (UE) Nru 524/2104 (2), dan ir-Regolament ta' Implimentazzjoni għandu jiġi kkunsidrat bħala korollarju meħtieġ tar-Regolament Delegat (UE) Nru 524/2014.

(9)

Dan ir-Regolament huwa bbażat fuq l-istandards tekniċi implimentattivi abbozzati ippreżentati mill-Awtorità Superviżorja Ewropea (Awtorità Bankarja Ewropea) (ABE) lill-Kummissjoni.

(10)

L-ABE wettqet konsultazzjonijiet pubbliċi miftuħa dwar l-abbozz tal-istandards tekniċi ta' implementazzjoni li fuqu huwa bbażat dan ir-Regolament, analizzat il-kosti u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3),