Artikolu 1 Suġġett u kamp ta’ applikazzjoni

Artikolu 1

Dan ir-Regolament jistabbilixxi qafas biex jitnaqqsu bil-mod il-mod u b’mod irriversibbli l-emissjonijiet antropoġeniċi ta’ gassijiet b’effett ta’ serra minn fonti u biex jitjieb l-assorbiment permezz ta’ bjar irregolati mil-liġi tal-Unjoni.

Dan ir-Regolament jistabbilixxi objettiv vinkolanti ta’ newtralità klimatika sal-2050 fl-Unjoni sabiex jinkiseb l-għan fit-tul dwar it-temperatura stabbilit fil-punt (a) tal-Artikolu 2(1) tal-Ftehim ta’ Pariġi, u jipprevedi qafas biex isir progress fl-ilħuq tal-għan ta’ adattament globali stabbilit fl-Artikolu 7 ta’ dak il-Ftehim. Dan ir-Regolament jistabbilixxi wkoll mira vinkolanti tal-Unjoni għat-tnaqqis domestiku nett fl-emissjonijiet tal-gassijiet b’effett ta’ serra għall-2030. ►M1  Dan ir-Regolament jistabbilixxi wkoll mira vinkolanti tal-Unjoni għall-2040. ◄

Dan ir-Regolament japplika għall-emissjonijiet antropoġeniċi minn fonti u l-assorbiment minn bjar ta’ gassijiet b’effett ta’ serra elenkati fil-Parti 2 tal-Anness V tar-Regolament (UE) 2018/1999.