Artikolu 2 2

(a)

“fornitur tar-roaming” tfisser impriża li tipprovdi servizzi tar-roaming bl-imnut regolati lil klijent tar-roaming;

(b)

“fornitur domestiku” tfisser impriża li tipprovdi servizzi domestiċi tal-komunikazzjoni mobbli lil klijent tar-roaming;

(c)

“network tal-pajjiż tal-oriġini” tfisser network pubbliku tal-komunikazzjoni mobbli li jinsab fi Stat Membru u li jintuża mill-fornitur tar-roaming għall-forniment ta’ servizzi tar-roaming bl-imnut regolati lil klijent tar-roaming;

(d)

“network miżjur” tfisser network pubbliku tal-komunikazzjoni mobbli terrestri li jinsab fi Stat Membru li mhux dak tal-fornitur domestiku tal-klijent tar-roaming u li permezz tiegħu, il-klijenti tar-roaming ikunu jistgħu jagħmlu jew jirċievu telefonati, jibgħatu jew jirċievu messaġġi SMS, jew jagħmlu komunikazzjonijiet ta’ data bil-kommutazzjoni ta’ pakketti, permezz ta’ arranġamenti mal-operatur tan-network tal-pajjiż tal-oriġini;

(e)

“roaming madwar l-Unjoni” tfisser l-użu ta’ apparat mobbli minn klijenti tar-roaming biex jagħmlu jew jirċievu telefonati fl-Unjoni, biex jibgħatu jew jirċievu messaġġi SMS fl-Unjoni, jew biex jagħmlu komunikazzjonijiet ta’ data bil-kommutazzjoni ta’ pakketti, meta jkunu fi Stat Membru li mhux dak fejn jinsab in-network tal-fornitur domestiku, permezz ta’ arranġamenti bejn l-operatur tan-network tal-pajjiż tal-oriġini u l-operatur tan-network miżjur;

(f)

“klijenti tar-roaming” tfisser klijenti ta’ fornitur tar-roaming ta’ servizzi tar-roaming regolati, permezz ta’ network pubbliku tal-komunikazzjoni mobbli terrestri li jinsab fl-Unjoni, li l-kuntratt bl-imnut jew l-arranġament tagħhom ma’ dak il-fornitur tar-roaming jippermettu roaming madwar l-Unjoni;

(g)

“telefonata tar-roaming regolata” tfisser telefonata bil-vuċi mobbli magħmula minn klijenti tar-roaming li tkun toriġina fuq network miżjur u tintemm fuq xi network pubbliku tal-komunikazzjoni madwar l-Unjoni, jew li jirċievu klijenti tar-roaming u tkun toriġina fuq network pubbliku tal-komunikazzjoni madwar l-Unjoni u tintemm fuq xi network miżjur;

(h)

“messaġġ SMS” tfisser messaġġ testwali ta’ Servizz ta’ Messaġġ Qasir li jkun magħmul l-aktar minn karattri alfabetiċi jew numeriċi, jew it-tnejn, li jista’ jintbagħat bejn numri mobbli u/jew fissi assenjati skont pjanijiet nazzjonali tan-numri;

(i)

“messaġġ SMS tar-roaming regolat” tfisser messaġġ SMS mibgħut minn klijenti tar-roaming, li jkun joriġina fuq network miżjur u jintemm fuq network pubbliku tal-komunikazzjoni fi ħdan l-Unjoni, jew li jirċievu klijenti tar-roaming u jkun joriġina fuq network pubbliku tal-komunikazzjoni fi ħdan l-Unjoni u jintemm fuq network miżjur;

(j)

“servizz tar-roaming regolat tad-data” tfisser servizz tar-roaming li permezz tiegħu jkunu jistgħu jsiru komunikazzjonijiet ta’ data bil-kommutazzjoni ta’ pakketti minn klijenti tar-roaming permezz tal-apparat mobbli tagħhom waqt konnessjoni ma’ network miżjur, għajr it-trażmissjoni jew il-wasla ta’ telefonati jew messaġġi SMS tar-roaming regolati, iżda inkluż it-trażmissjoni u l-wasla ta’ messaġġi MMS;

(k)

“aċċess għal roaming bl-ingrossa” tfisser aċċess dirett għal roaming bl-ingrossa jew aċċess għal bejgħ mill-ġdid tar-roaming bl-ingrossa;

(l)

“aċċess dirett għal roaming bl-ingrossa” tfisser id-disponibbiltà ta’ faċilitajiet jew servizzi, jew it-tnejn, minn operatur tan-networks mobbli lil impriża oħra skont kondizzjonijiet definiti, biex dik l-impriża l-oħra tipprovdi servizzi tar-roaming regolati lil klijenti tar-roaming;

(m)

“aċċess għal bejgħ mill-ġdid tar-roaming bl-ingrossa” tfisser il-forniment ta’ servizzi tar-roaming bl-ingrossa minn operatur tan-networks mobbli li huwa differenti mill-operatur tan-networks miżjura lil impriża oħra, biex dik l-impriża l-oħra tipprovdi servizzi tar-roaming regolati lil klijenti tar-roaming;

(n)

“prezz bl-imnut domestiku” tfisser it-tariffa bl-imnut domestika għal kull unità tal-fornitur tar-roaming applikabbli għat-telefonati magħmula u għall-messaġġi SMS mibgħuta li joriġinaw u jintemmu fuq networks differenti tal-komunikazzjoni pubblika fl-istess Stat Membru, u għad-data kkonsmata minn klijent.