Preamble: 1

(1)

Ir-Regolament (KE) Nru 549/2004 tal-Parlament Ewropew u tal-Kunsill (3), ir-Regolament (KE) Nru 550/2004 tal-Parlament Ewropew u tal-Kunsill (4), u r-Regolament (KE) Nru 551/2004 tal-Parlament Ewropew u tal-Kunsill (5) ġew emendati b’mod sostanzjali. Peress li għad iridu jsiru iżjed emendi, jenħtieġ li dawk ir-Regolamenti jiġu riformulati fl-interess taċ-ċarezza.

(2)

L-adozzjoni mill-Parlament Ewropew u mill-Kunsill tal-ewwel pakkett tal-leġiżlazzjoni dwar l-Ajru Uniku Ewropew, b’mod partikolari, ir-Regolamenti (KE) Nru 549/2004, (KE) Nru 550/2004, (KE) Nru 551/2004, u (KE) Nru 552/2004 tal-Parlament Ewropew u tal-Kunsill (6), stabbiliet bażi legali soda għal sistema tal-ġestjoni tat-traffiku tal-ajru (ATM) uniformi, interoperabbli u sikura. L-adozzjoni tat-tieni pakkett, b’mod partikolari r-Regolament (KE) Nru 1070/2009 tal-Parlament Ewropew u tal-Kunsill (7), saħħet aktar l-inizjattiva tal-Ajru Uniku Ewropew billi tintroduċi l-kunċetti ta’ “skema ta’ prestazzjoni” u “Maniġer tan-Network” biex ikomplu jtejbu l-prestazzjoni tan-network Ewropew għall-ġestjoni tat-traffiku tal-ajru. Ir-Regolament (KE) Nru 552/2004 tħassar bir-Regolament (UE) 2018/1139 tal-Parlament Ewropew u tal-Kunsill (8), peress li r-regoli meħtieġa għall-interoperabbiltà tas-sistemi, il-kostitwenti u l-proċeduri tal-ATM ġew inkorporati fir-Regolament (UE) 2018/1139.

(3)

Biex jitqiesu l-bidliet introdotti fir-Regolament (UE) 2018/1139, jeħtieġ li dan ir-Regolament jiġi allinjat ma’ dak ir-Regolament u li dan tal-aħħar jiġi emendat.

(4)

Ir-regoli dettaljati dwar l-użu tal-ispazju tal-ajru, id-dispożizzjonijiet operazzjonali dwar is-servizzi u l-proċeduri fin-navigazzjoni bl-ajru u r-regoli u l-proċeduri għad-disinn tal-istrutturi tal-ispazju tal-ajru huma rregolati skont ir-Regolament (UE) 2018/1139, filwaqt li jenħtieġ li l-klassifikazzjoni tal-ispazju tal-ajru tkun irregolata skont dan ir-Regolament.

(5)

Fl-Artikolu 1 tal-Konvenzjoni dwar l-Avjazzjoni Ċivili Internazzjonali, iffirmata f’Chicago fis-7 ta’ Diċembru tal-1944 (il-“Konvenzjoni ta’ Chicago”), l-Istati Kontraenti jirrikonoxxu li kull Stat għandu sovranità kompluta u esklussiva fuq l-ispazju tal-ajru fuq it-territorju tiegħu. Huwa fil-qafas ta’ din is-sovranità li l-Istati Membri tal-Unjoni, soġġetti għal konvenzjonijiet internazzjonali applikabbli, jeżerċitaw is-setgħat ta’ awtorità pubblika meta jikkontrollaw it-traffiku tal-ajru.

(6)

Jenħtieġ li dan ir-Regolament ma jaffettwax id-drittijiet u r-responsabbiltajiet tal-Istati Membri skont il-Konvenzjoni ta’ Chicago.

(7)

L-implimentazzjoni tal-politika komuni tat-trasport teħtieġ sistema tat-trasport bl-ajru effiċjenti li tippermetti tħaddim sikur, regolari u sostenibbli tas-servizzi tat-trasport bl-ajru, li tottimizza l-użu tal-ispazju tal-ajru u l-kapaċità, li tikkontribwixxi għas-sostenibbiltà tal-avjazzjoni u li tiffaċilita l-moviment liberu tal-merkanzija, tal-persuni u tas-servizzi.

(8)

Biex jinkisbu simultanjament l-objettivi tat-tkattir tal-istandards tas-sikurezza tat-traffiku tal-ajru u tat-titjib tal-prestazzjoni ġenerali tas-servizzi tal-ATM u tas-servizzi tan-navigazzjoni bl-ajru (ANS) għat-traffiku tal-ajru ġenerali fl-Ewropa, jeħtieġ jitqies il-fattur uman. Għalhekk, jenħtieġ li l-Istati Membri jħaddmu l-prinċipji ta’ “kultura ġusta”. Jenħtieġ li jiġu kkunsidrati u meqjusa l-opinjonijiet u r-rakkomandazzjonijiet tal-Grupp ta’ Esperti tal-Kummissjoni dwar id-Dimensjoni Umana tal-Ajru Uniku Ewropew stabbilit bid-Deċiżjoni tal-Kummissjoni (UE) 2023/2019 (9).

(9)

It-titjib fil-prestazzjoni klimatika u ambjentali tal-ATM jikkontribwixxi wkoll għall-kisba tal-objettivi li jinsabu fil-Ftehim ta’ Pariġi, fir-Regolament (UE) 2021/1119 tal-Parlament Ewropew u tal-Kunsill (10), fil-Konklużjonijiet tal-Kunsill dwar l-Istrateġija għal Mobbiltà Sostenibbli u Intelliġenti tal-Kummissjoni u fl-Aġenda Diġitali għall-Ewropa, b’mod partikolari permezz tat-tnaqqis tal-emissjonijiet tal-avjazzjoni.

(10)

Użu aktar effiċjenti tal-ispazju tal-ajru, li jippermetti aktar għażliet fir-rigward tal-aħjar trajettorji tat-titjiriet, iwassal għal żieda fl-effiċjenza tal-fjuwil u tnaqqis fl-emissjonijiet. Jenħtieġ li jitqiesu wkoll diversi elementi klimatiċi u ambjentali meta jiġu ottimizzati t-trajettorji tat-titjiriet u l-profili tat-titjiriet, sabiex jitnaqqsu l-emissjonijiet u s-sustanzi niġġiesa tal-arja. Jenħtieġ li tiġi żviluppata metodoloġija dwar kif għandhom jitqiesu dawk id-diversi elementi u l-interdipendenzi tagħhom, b’mod partikolari meta jitfasslu l-indikaturi tal-prestazzjoni.

(11)

L-ispazju tal-ajru huwa riżorsa komuni għall-kategoriji kollha ta’ utenti li jeħtieġ li jintuża b’mod flessibbli minnhom ilkoll, b’mod li jiżgura ġustizzja u trasparenza filwaqt li jittieħed kont tal-ħtiġijiet tas-sigurtà u tad-difiża tal-Istati Membri u tal-impenji tagħhom fi ħdan l-organizzazzjonijiet internazzjonali.

(12)

Fl-2004, l-Istati Membri adottaw dikjarazzjoni ġenerali dwar kwistjonijiet militari relatati mal-Ajru Uniku Ewropew (11), li tennew. Skont dik id-dikjarazzjoni, jenħtieġ li l-Istati Membri jtejbju, b’mod partikolari, il-kooperazzjoni ċivili-militari u, jekk u sa fejn meqjus bħala meħtieġ mill-Istati Membri kollha kkonċernati, jiffaċilitaw il-kooperazzjoni bejn il-forzi armati tagħhom f’dak kollu li għandu x’jaqsam mal-ġestjoni tat-traffiku tal-ajru.

(13)

Id-deċiżjonijiet relatati mal-kontenut, mal-ambitu jew mat-twettiq ta’ operazzjonijiet u taħriġ militari ma jaqgħux fl-isfera ta’ kompetenza tal-Unjoni skont l-Artikolu 100(2) tat-Trattat dwar il-Funzjonament tal-Unjoni Ewropea.

(14)

L-Artikolu 9a tar-Regolament (KE) Nru 550/2004 ippreveda l-istabbiliment mill-Istati Membri ta’ blokok funzjonali tal-ispazju tal-ajru bil-ħsieb li tissaħħaħ il-kooperazzjoni bejn il-fornituri tas-servizzi tan-navigazzjoni bl-ajru sabiex tittejjeb il-prestazzjoni u jinħolqu sinerġiji, u rregola dawn il-blokok tal-ispazju tal-ajru. L-Istati Membri jistgħu jżommu l-kooperazzjoni u l-koordinazzjoni f’tali blokok tal-ispazju tal-ajru stabbiliti preċedentement bil-ħsieb li titrawwem il-prestazzjoni tan-network tal-ġestjoni tat-traffiku tal-ajru fl-Ajru Uniku Ewropew, b’mod partikolari billi jippreżentaw pjanijiet konġunti ta’ prestazzjoni, dment li, b’mod partikolari, dan ma jaffettwax l-implimentazzjoni effiċjenti ta’ dan ir-Regolament.

(15)

Jenħtieġ li l-Istati Membri jinnominaw awtorità superviżorja nazzjonali sabiex tassumi l-kompiti assenjati lil din l-awtorità skont dan ir-Regolament. Biex tkun żgurata sorveljanza konsistenti u tajba tal-forniment tas-servizzi madwar l-Ewropa, jenħtieġ li l-awtoritajiet superviżorji nazzjonali jkunu garantiti indipendenza u riżorsi suffiċjenti. B’mod partikolari, jenħtieġ li l-finanzjament ta’ dawk l-awtoritajiet jiggarantixxi l-indipendenza tagħhom, u jenħtieġ li jippermettilhom joperaw skont il-prinċipji tal-ġustizzja, tat-trasparenza, tan-nondiskriminazzjoni u tal-proporzjonalità. Jenħtieġ li dan ma jipprevjenix lil awtorità superviżorja nazzjonali milli tingħaqad ma’ awtorità regolatorja oħra, bħall-awtorità kompetenti nazzjonali jew l-awtorità nazzjonali tal-kompetizzjoni, jekk l-awtorità konġunta tissodisfa r-rekwiżiti ta’ indipendenza u dment li d-deċiżjonijiet relatati mal-kompiti kkonferiti lill-awtorità superviżorja nazzjonali skont dan ir-Regolament jittieħdu indipendentement minn kompiti oħra kkonferiti lill-awtorità konġunta.

(16)

Jenħtieġ li proċeduri xierqa għall-ħatra tal-persunal tal-awtoritajiet superviżorji nazzjonali jikkontribwixxu għall-garanzija tal-indipendenza ta’ dawk l-awtoritajiet. Jenħtieġ li l-persunal tal-awtoritajiet superviżorji nazzjonali jaġixxi indipendentement, b’mod partikolari billi jevita kunflitti ta’ interess bejn il-forniment ta’ servizzi tan-navigazzjoni bl-ajru u t-twettiq tal-kompiti tagħhom. Jenħtieġ li r-regoli dwar il-kunflitti ta’ interess għall-persunal u l-persuni li jieħdu deċiżjonijiet li jeżerċitaw is-setgħat definiti f’dan ir-Regolament jipprevjenu wkoll kunflitti ta’ interess possibbli li jirriżultaw mill-assenjazzjoni attiva tagħhom lil awtorità superviżorja nazzjonali b’rabta ma’ pożizzjoni ġdida f’entità regolata għaż-żmien immedjatament wara t-tmiem tal-assenjazzjoni tagħhom lil dik l-awtorità superviżorja nazzjonali.

(17)

Jenħtieġ li jiġu stabbiliti proċeduri biex jiġu żgurati l-kooperazzjoni u l-iskambju ta’ informazzjoni bejn l-awtorità superviżorja nazzjonali u l-awtorità kompetenti nazzjonali bil-ħsieb li tiġi żgurata l-applikazzjoni xierqa ta’ dan ir-Regolament.

(18)

Ir-rekwiżiti għall-għoti ta’ ċertifikazzjoni rigward ir-robustezza finanzjarja, ir-responsabbiltà, il-kopertura tal-assigurazzjoni u s-sjieda u l-istruttura organizzazzjonali għandhom rabta qawwija mar-rekwiżiti tas-sikurezza u tas-sigurtà għall-forniment tas-servizzi u mas-sorveljanza operazzjonali u teknika li għandha titwettaq minn awtorità kompetenti nazzjonali. Fir-rigward tal-attivitajiet ta’ ċertifikazzjoni, sorveljanza u infurzar relatati mar-rekwiżiti rigward ir-robustezza finanzjarja, ir-responsabbiltà, il-kopertura tal-assigurazzjoni, is-sjieda u l-istruttura organizzazzjonali elenkati fil-punt 7 tal-Anness VIII tar-Regolament (UE) 2018/1139, jenħtieġ li l-Istati Membri jorganizzaw il-proċessi amministrattivi tagħhom f’konformità mal-arranġamenti nazzjonali tagħhom biex jiżguraw l-eżekuzzjoni xierqa u effiċjenti tal-kompiti kemm tal-awtoritajiet kompetenti nazzjonali kif ukoll ta’ dawk superviżorji nazzjonali.

(19)

L-awtoritajiet superviżorji nazzjonali jaqdu rwol ewlieni fl-implimentazzjoni tal-Ajru Uniku Ewropew u għalhekk jenħtieġ li jikkooperaw bejniethom biex jippermettu l-iskambju tal-informazzjoni dwar il-prinċipji tagħhom tal-ħidma u tat-teħid tad-deċiżjonijiet, l-aqwa prattiċi u proċeduri u fir-rigward tal-applikazzjoni ta’ dan ir-Regolament u biex jiżviluppaw approċċ komuni, inkluż permezz ta’ kooperazzjoni msaħħa fil-livell reġjonali. Jenħtieġ li din il-kooperazzjoni sseħħ fuq bażi regolari fil-kuntest tal-Bord ta’ Kooperazzjoni tal-Awtoritajiet Superviżorji Nazzjonali.

(20)

Il-kooperazzjoni bejn il-fornituri tas-servizzi tan-navigazzjoni bl-ajru hija għodda importanti għat-titjib tal-prestazzjoni ġenerali tas-sistema Ewropea tal-ATM u jenħtieġ li tiġi mħeġġa.

(21)

Jenħtieġ li fornitur tas-servizzi tan-navigazzjoni bl-ajru jkun jista’ joffri servizzi fl-Unjoni taħt kundizzjonijiet nondiskriminatorji meta jkollu ċertifikat jew dikjarazzjoni skont l-Artikolu 41 tar-Regolament (UE) 2018/1139.

(22)

F’konformità mal-Artikolu 2(5) tar-Regolament (UE) 2018/1139 u soġġett għall-kundizzjonijiet stipulati fih, jenħtieġ li l-Istati Membri jkunu jistgħu jippermettu l-forniment tas-servizzi tan-navigazzjoni bl-ajru msemmija fl-Artikolu 2(3), il-punt (c) tar-Regolament (UE) 2018/1139 taħt ir-responsabbiltà tagħhom mill-militar mingħajr ċertifikazzjoni meta l-militar joffri tali servizzi primarjament lill-movimenti tal-inġenji tal-ajru għajr it-traffiku tal-ajru ġenerali. F’dawn il-każijiet, jenħtieġ li l-Istat Membru kkonċernat jinforma lill-Kummissjoni u lill-Istati Membri l-oħra bid-deċiżjoni tiegħu.

(23)

Dan ir-Regolament ma jeħtieġx iċ-ċertifikazzjoni tas-sinjali fornuti mis-Sistema Globali ta’ Navigazzjoni bis-Satellita (GNSS).

(24)

Jenħtieġ li ma jkun hemm l-ebda diskriminazzjoni bejn l-utenti tal-ispazju tal-ajru fir-rigward tal-forniment ta’ servizzi tan-navigazzjoni bl-ajru ekwivalenti.

(25)

Jenħtieġ li s-servizzi tat-traffiku tal-ajru jiġu pprovduti fuq bażi esklussiva. Jenħtieġ li l-fornituri ta’ tali servizzi jkunu soġġetti għal rekwiżiti ta’ deżinjazzjoni u ta’ interess pubbliku. F’dak ir-rigward, jenħtieġ li jittieħed kont tal-fatt li l-forniment ta’ servizzi tat-traffiku tal-ajru, li huma konnessi mal-eżerċizzju tas-setgħat ta’ awtorità pubblika, u mhumiex ta’ natura ekonomika mhuwiex soġġett għall-applikazzjoni tar-regoli tat-Trattati rigward il-kompetizzjoni.

(26)

Jenħtieġ li l-proċess tad-deżinjazzjoni jqis il-ħtieġa għall-kontinwità tas-servizz u l-ippjanar fit-tul tal-investiment mill-fornituri tas-servizzi tat-traffiku tal-ajru. Minkejja dan, il-kuntest tan-navigazzjoni bl-ajru li qed jevolvi malajr jirrikjedi li l-monitoraġġ tad-drittijiet u l-obbligi tal-fornituri deżinjati tas-servizzi tat-traffiku tal-ajru jitwettaq biex jiġi żgurat li dawk id-drittijiet u l-obbligi jibqgħu applikabbli bis-sħiħ u li dawk l-obbligi jiġu ssodisfati. Meta l-Istati Membri jqisu li jkun meħtieġ li jitnieda proċess ġdid ta’ deżinjazzjoni fil-kuntest tal-monitoraġġ tagħhom, jenħtieġ li jkunu jistgħu jiddeżinjaw lill-istess fornitur tas-servizzi tat-traffiku tal-ajru, f’konformità mal-liġi nazzjonali.

(27)

Jenħtieġ li l-Istati Membri jiżguraw li d-deżinjazzjoni ta’ fornitur tas-servizzi tat-traffiku tal-ajru ma tkunx prekluża mil-liġi nazzjonali tagħhom b’mod partikolari abbażi tal-fatt li l-fornitur ta’ servizzi kkonċernat ikollu l-post tan-negozju prinċipali fi Stat Membru ieħor jew ikun proprjetà ta’ ċittadin ta’ dak l-Istat Membru fejn l-applikazzjoni ta’ dik il-liġi nazzjonali tinvolvi restrizzjoni mhux ġustifikata tal-libertà li jiġu pprovduti servizzi jew il-libertà tal-istabbiliment, li jenħtieġ li jiġu vvalutati fuq bażi ta’ każ b’każ fid-dawl taċ-ċirkostanzi rilevanti kollha.

(28)

Il-fornituri tas-servizzi tat-traffiku tal-ajru jistgħu jakkwistaw servizzi ta’ komunikazzjoni, navigazzjoni u sorveljanza (CNS), servizzi ta’ informazzjoni ajrunawtika (AIS), servizzi tad-data dwar it-traffiku tal-ajru (ADS), jew servizzi meteoroloġiċi (MET) f’każijiet fejn l-Istati Membri ma jkunux iddeżinjaw fornitur tal-MET, skont il-kundizzjonijiet tas-suq, jew taħt forom oħra ta’ ftehimiet fejn id-Direttivi 2014/24/UE (12) u 2014/25/UE (13) tal-Parlament Ewropew u tal-Kunsill ma japplikawx, filwaqt li jitqiesu sitwazzjonijiet speċifiċi bħan-nuqqas ta’ soluzzjonijiet disponibbli fis-suq u kunsiderazzjonijiet relatati mal-interess pubbliku. L-Istati Membri jistgħu jippermettu li l-operaturi tal-ajruporti, jew grupp ta’ operaturi tal-ajruporti, jakkwistaw servizzi tat-traffiku tal-ajru fit-terminali għall-kontroll tal-ajrudrom jew servizzi tat-traffiku tal-ajru għall-kontroll tal-avviċinament skont kundizzjonijiet tas-suq.

(29)

Meta jiġu akkwistati servizzi tat-traffiku tal-ajru għall-kontroll tal-ajrudrom u l-kontroll tal-avviċinament, jenħtieġ li dawn ma jkunux soġġetti għall-istabbiliment ta’ mira ta’ prestazzjoni stipulata f’dan ir-Regolament. Madankollu, jenħtieġ li l-fornituri ta’ servizzi jipprovdu data dwar il-prestazzjoni tas-servizzi tan-navigazzjoni bl-ajru. Fejn jiġu akkwistati servizzi tat-traffiku tal-ajru għall-kontroll tal-ajrudrom u l-kontroll tal-avviċinament, jenħtieġ li r-rekwiżiti tekniċi fl-ispeċifikazzjonijiet tal-offerta jinkludu rekwiżiti dwar il-kwalità tas-servizz.

(30)

Jenħtieġ li l-fornituri tas-servizzi tan-navigazzjoni bl-ajru jżommu kontijiet separati għal kull servizz tan-navigazzjoni bl-ajru kif ikunu meħtieġa jagħmlu jekk dawn is-servizzi jitwettqu minn impriżi separati bil-ħsieb li jevitaw id-diskriminazzjoni, is-sussidju inkroċjat u d-distorsjoni tal-kompetizzjoni.

(31)

Meta applikabbli, jenħtieġ li l-akkwist ta’ servizzi tan-navigazzjoni bl-ajru jsir f’konformità mad-Direttiva 2014/24/UE, mad-Direttiva 2014/25/UE, u mal-prinċipji tat-trattament ugwali, in-nondiskriminazzjoni u t-trasparenza kif ukoll mad-dispożizzjonijiet applikabbli tat-Trattat, b’mod partikolari r-regoli tat-Trattat rigward il-libertà li jiġu pprovduti servizzi u l-libertà tal-istabbiliment. Jenħtieġ li l-proċeduri tal-offerti għall-akkwist tas-servizzi kkonċernati jitfasslu b’tali mod li jippermettu l-parteċipazzjoni effettiva ta’ fornituri kompetituri f’dawn il-proċeduri, inkluż bi ftuħ mill-ġdid regolari tal-kompetizzjoni.

(32)

Il-ġestjoni tat-traffiku tal-inġenji tal-ajru mingħajr bdot abbord teħtieġ id-disponibbiltà ta’ servizzi ta’ informazzjoni komuni (CIS). Meta s-CIS jiġu pprovduti minn fornitur uniku tas-CIS deżinjat mill-Istat Membru fir-rigward ta’ spazju tal-ajru speċifiku tal-U-space, jenħtieġ li l-prezzijiet tas-CIS jiġu rregolati sabiex jitrażżnu l-kostijiet ta’ tali ġestjoni tat-traffiku. Għalhekk, jenħtieġ li l-prezzijiet tas-CIS ikunu bbażati fuq il-kost u marġni kummerċjali raġonevoli għall-profitt, u jenħtieġ li jkunu soġġetti għall-approvazzjoni mill-awtoritajiet superviżorji nazzjonali. Meta CIS ma jkunux ipprovduti minn fornitur uniku ta’ CIS, jenħtieġ li s-CIS individwali tiġi pprovduta mingħajr ħlas. Biex ikun jista’ jsir il-forniment tas-servizzi, jenħtieġ li jingħata aċċess għad-data operazzjonali rilevanti lill-fornituri ta’ CIS b’termini ġusti, raġonevoli u nondiskriminatorji.

(33)

Id-disponibbiltà tad-data operazzjonali rilevanti fir-rigward tat-traffiku tal-ajru ġenerali hija essenzjali biex ikun jista’ jitwettaq il-forniment flessibbli ta’ servizzi tad-data dwar it-traffiku tal-ajru, b’mod transfruntier u għall-Unjoni kollha. Għalhekk, jenħtieġ li tali data tkun disponibbli għall-partijiet ikkonċernati rilevanti inkluż għall-entitajiet li jkollhom interess ippruvat li jikkunsidraw il-forniment ta’ servizzi tan-navigazzjoni bl-ajru, b’termini ġusti, raġonevoli u mhux diskriminatorji. L-akkuratezza tal-informazzjoni inkluż dwar l-istatus tal-ispazju tal-ajru u dwar sitwazzjonijiet speċifiċi tat-traffiku tal-ajru u d-distribuzzjoni f’waqtha ta’ din l-informazzjoni lill-kontrolluri ċivili u militari għandha impatt dirett fuq is-sikurezza u l-effiċjenza tal-operazzjonijiet, inkluż l-effiċjenza ambjentali tat-titjiriet. L-aċċess f’waqtu għal informazzjoni aġġornata dwar l-istatus tal-ispazju tal-ajru huwa essenzjali għall-partijiet kollha li jixtiequ jieħdu vantaġġ mill-istrutturi tal-ispazju tal-ajru li jsiru disponibbli meta jimlew jew jimlew mill-ġdid il-pjanijiet tat-titjir tagħhom.

(34)

Jenħtieġ li l-iskemi ta’ prestazzjoni u ta’ imposti ma japplikawx għas-servizzi tan-navigazzjoni bl-ajru fit-terminal ipprovduti f’ajruporti b’inqas minn 80 000 moviment tat-trasport bl-ajru fis-sena mwettqa bl-użu ta’ regoli tat-titjir bl-istrumenti (IFR). L-istabbiliment ta’ miri ta’ prestazzjoni għal servizzi bħal dawn ftit li xejn ikollu valur miżjud peress li tali miri, fil-biċċa l-kbira tal-każijiet, ikunu qrib iż-żero. Barra minn hekk, is-sottomissjoni ta’ dawk is-servizzi għall-iskemi ta’ prestazzjoni u ta’ imposti stabbiliti minn dan ir-Regolament twassal għal piż amministrattiv u finanzjarju sproporzjonat meta mqabbel mal-benefiċċji mistennija mil-lat ta’ titjib fil-prestazzjoni u kwalità aħjar tas-servizz. Madankollu, l-Istati Membri jistgħu jiddeċiedu li tali servizzi tan-navigazzjoni bl-ajru fit-terminal ikunu soġġetti għall-iskemi ta’ prestazzjoni u ta’ imposti.

(35)

Jenħtieġ li l-militari li jipprovdu servizzi tan-navigazzjoni bl-ajru primarjament lill-movimenti tal-inġenji tal-ajru għajr it-traffiku tal-ajru ġenerali, inkluż il-finanzjament tagħhom, ma jkunux soġġetti għall-iskemi ta’ prestazzjoni u ta’ imposti stabbiliti b’dan ir-Regolament. Għalhekk, jenħtieġ li l-kostijiet tas-servizzi tagħhom ma jitqisux bħala kostijiet iddeterminati skont dan ir-Regolament. Madankollu, l-Istati Membri jistgħu jiddeċiedu li japplikaw dawk l-iskemi għall-militari li jipprovdu tali servizzi. Jenħtieġ li l-iskemi ta’ prestazzjoni u ta’ imposti japplikaw għall-militari li jipprovdu servizzi tan-navigazzjoni bl-ajru primarjament lit-traffiku tal-ajru ġenerali.

(36)

Jenħtieġ li l-iskemi ta’ prestazzjoni u ta’ imposti jiżguraw it-tħaddim effiċjenti, sostenibbli u kontinwu tas-sistema Ewropea tal-ATM u huma wkoll maħsuba biex is-servizzi tan-navigazzjoni bl-ajru, li jingħataw skont kundizzjonijiet li mhumiex il-kundizzjonijiet tas-suq, ikunu aktar kosteffiċjenti u biex jippromwovu kwalità aħjar tas-servizz. Għaldaqstant jenħtieġ jinkludu inċentivi rilevanti u xierqa. Fid-dawl ta’ dan l-objettiv, jenħtieġ li l-iskema ta’ prestazzjoni ma tkunx tkopri s-servizzi mogħtija bil-kundizzjonijiet tas-suq. Jenħtieġ li l-iskema ta’ prestazzjoni tkopri s-servizzi tan-navigazzjoni bl-ajru kollha li fornitur deżinjat tas-servizzi tat-traffiku tal-ajru jipprovdi jew jakkwista mingħand fornituri ta’ servizz oħrajn, inkluż meta dak il-fornitur ta’ servizz jipprovdi servizzi tan-navigazzjoni bl-ajru jew servizzi tat-traffiku tal-ajru.

(37)

L-Istati Membri jistgħu jiżviluppaw pjanijiet konġunti ta’ prestazzjoni għas-servizzi tan-navigazzjoni bl-ajru bl-għan li jtejbu l-livell ta’ prestazzjoni tal-ġestjoni tat-traffiku tal-ajru lil hinn mil-livell li jista’ jinkiseb abbażi ta’ Stat Membru individwali, li jkopru mill-inqas it-tul tal-perjodu referenzjarju; Jenħtieġ li l-Istati Membri jinkludu f’dawk il-pjanijiet konġunti mill-inqas mira waħda u inizjattivi dwar il-kooperazzjoni transfruntiera, filwaqt li jqisu l-valur miżjud tal-istabbiliment ta’ miri konġunti oħra, it-twettiq ta’ akkwist konġunt u l-istabbiliment ta’ governanza konġunta.

(38)

Meta tadotta atti ta’ implimentazzjoni biex tistipula skemi ta’ inċentivi, jenħtieġ li l-Kummissjoni tiddefinixxi l-applikabbiltà ta’ tali skemi għal sitwazzjonijiet fejn il-fornituri tas-servizzi tan-navigazzjoni bl-ajru jmorru lil hinn mill-miri ta’ prestazzjoni vinkolanti rilevanti għas-servizzi tan-navigazzjoni bl-ajru matul il-perjodu referenzjarju jew ma jikkonformawx magħhom. Mingħajr preġudizzju għall-miżuri li għandhom jiġu implimentati mill-fornitur tas-servizzi tat-traffiku tal-ajru biex jittaffa l-impatt ta’ tali avvenimenti, jenħtieġ li l-kriterji tal-applikabbiltà jqisu kif xieraq avvenimenti mhux prevedibbli u sinifikanti barra mill-kontroll tal-fornitur tas-servizz tat-traffiku tal-ajru. Sabiex jippromwovu kwalità aħjar tas-servizzi, jenħtieġ li dawk l-iskemi ta’ prestazzjoni u ta’ imposti jinkludu inċentivi rilevanti u xierqa bbażati fuq il-eżiti. Jenħtieġ li jiġu stabbiliti inċentivi finanzjarji bil-għan li jinkoraġġixxu prestazzjoni aħjar tas-servizzi tan-navigazzjoni bl-ajru b’mod ibbilanċjat billi jippremjaw jew jippenalizzaw il-prestazzjoni reali fir-rigward ta’ miri vinkolanti tal-prestazzjoni.

(39)

Id-dħul mill-imposti li jġarrbu l-utenti tal-ispazju tal-ajru jista’ jirriżulta f’surplus jew telf finanzjarji għall-fornituri tas-servizzi tan-navigazzjoni bl-ajru minħabba l-applikazzjoni tal-iskemi ta’ inċentivi u l-mekkaniżmi tal-kondiviżjoni tar-riskju.

(40)

Jenħtieġ li jinħatar Bord ta’ Analiżi tal-Prestazzjoni (PRB) biex jagħti parir u jassisti lill-Kummissjoni fl-implimentazzjoni tal-iskemi ta’ prestazzjoni u ta’ imposti. Jenħtieġ li l-istabbiliment tal-PRB jiggarantixxi li l-kompiti tiegħu jitwettqu bl-għarfien espert u l-indipendenza meħtieġa mill-interessi pubbliċi jew privati, u jkun jista’ jiddependi fuq riżorsi ddedikati. Jenħtieġ li l-PRB jissostitwixxi u jieħu post il-Korp ta’ Analiżi tal-Prestazzjoni stabbilit skont l-Artikolu 11(2) tar-Regolament (KE) Nru 549/2004.

(41)

Jenħtieġ li l-PRB ikun appoġġat minn segretarjat ipprovdut mill-Kummissjoni. Għall-fini tat-tħejjija tal-kontenut u tal-orjentazzjonijiet tal-opinjonijiet, ir-rakkomandazzjonijiet, ir-rapporti u l-materjal ta’ gwida tal-PRB, jenħtieġ li s-segretarjat jaġixxi mingħajr ma jieħu l-ebda direttiva ħlief mill-PRB innifsu sabiex il-PRB ikun jista’ jissodisfa r-rwol konsultattiv tiegħu u jiżgura l-indipendenza tal-PRB. Jenħtieġ li l-kompitu ewlieni tas-segretarjat ikun li jikkontribwixxi għall-eżekuzzjoni indipendenti tal-kompiti tal-PRB.

(42)

Il-persunal tas-segretarjat huwa soġġett għar-regoli dwar is-segretezza professjonali u dwar il-kunflitt ta’ interess inklużi fir-Regolamenti tal-Persunal tal-Uffiċjali u l-Kondizzjonijiet ta’ Impjieg ta’ Uffiċjali Oħra tal-Unjoni, stipulati fir-Regolament tal-Kunsill (KEE, Euratom, KEFA) Nru 259/68 (14), li jiżguraw l-indipendenza tagħhom. Jenħtieġ li l-proċess tal-għażla u l-kriterji tal-eliġibbiltà jkunu dettaljati f’att ta’ implimentazzjoni, li jenħtieġ li ma jinkludix il-ħatra ta’ membri speċifiċi tal-PRB jew jagħmel dik il-ħatra soġġetta għall-approvazzjoni tal-Istati Membri bi kwalunkwe mod.

(43)

Minħabba l-elementi transfruntieri u tan-network inerenti fil-forniment tas-servizzi tan-navigazzjoni bl-ajru en route, jenħtieġ li l-prestazzjoni tiġi vvalutata fil-konfront ta’ miri ta’ prestazzjoni għall-Unjoni kollha.

(44)

Jenħtieġ li l-miri nazzjonali għall-forniment ta’ servizzi tan-navigazzjoni bl-ajru fit-terminal jixprunaw titjib fil-prestazzjoni ta’ dawk is-servizzi maż-żmien u jippermettu approċċ gate-to-gate għar-regolamentazzjoni tas-servizzi tan-navigazzjoni bl-ajru.

(45)

Jenħtieġ li l-Istati Membri, l-awtoritajiet superviżorji nazzjonali u l-Kummissjoni jkollhom kompiti definiti b’mod ċar fl-iskemi ta’ prestazzjoni u ta’ imposti, b’mod partikolari fir-rigward tat-tħejjija tal-pjanijiet ta’ prestazzjoni, l-approvazzjoni ta’ dawk il-pjanijiet u l-monitoraġġ tal-prestazzjoni tal-fornituri tas-servizzi tan-navigazzjoni bl-ajru.

(46)

Jenħtieġ li l-qasam ewlieni ta’ prestazzjoni tal-klima u l-ambjent jindirizza l-impatt tal-avjazzjoni fuq il-klima u l-ambjent li jista’ jiġi influwenzat mill-fornituri tas-servizzi tan-navigazzjoni bl-ajru, b’mod partikolari l-emissjonijiet tas-CO2. Jenħtieġ li l-pjanijiet ta’ prestazzjoni jkun fihom, għal kull perjodu referenzjarju, miri tal-prestazzjoni en route konsistenti mal-miri tal-prestazzjoni għall-Unjoni kollha fl-oqsma ewlenin ta’ prestazzjoni tal-klima u l-ambjent, il-kapaċità u l-kosteffiċjenza, kif ukoll miri tal-prestazzjoni fit-terminal fl-oqsma ewlenin ta’ prestazzjoni tal-kapaċità u tal-kosteffiċjenza. Fid-data tal-adozzjoni ta’ dan ir-Regolament, id-data disponibbli eżistenti ma tippermettix l-istabbiliment, fil-qasam ewlieni ta’ prestazzjoni tal-klima u tal-ambjent, ta’ indikaturi ewlenin tal-prestazzjoni għas-servizzi tan-navigazzjoni bl-ajru fit-terminal li huma validi, affidabbli, li jistgħu jitkejlu u jippermettu l-kejl tal-impatti f’dak il-qasam li jistgħu jiġu influwenzati direttament mill-fornituri tas-servizzi tan-navigazzjoni bl-ajru. Għalhekk, jenħtieġ li l-Istati Membri jkunu obbligati jinkludu fil-pjanijiet ta’ prestazzjoni miri vinkolanti għas-servizzi tan-navigazzjoni bl-ajru fit-terminal fil-qasam ewlieni ta’ prestazzjoni tal-klima u tal-ambjent biss wara li l-Kummissjoni tkun setgħet tistabbilixxi, f’att ta’ implimentazzjoni, l-indikaturi ewlenin tal-prestazzjoni li jissodisfaw dawk il-kundizzjonijiet. Jenħtieġ li l-istabbiliment ta’ miri ta’ prestazzjoni vinkolanti għas-servizzi tan-navigazzjoni bl-ajru fit-terminal inklużi fil-pjan ta’ prestazzjoni jqis iċ-ċirkostanzi lokali, b’mod partikolari r-rekwiżiti tal-politika ambjentali lokali.

(47)

Jenħtieġ li l-prestazzjoni tal-funzjonijiet tan-network tkun soġġetta għal kriterji speċifiċi għalihom, filwaqt li titqies in-natura partikolari ta’ dawn il-funzjonijiet. Jenħtieġ li dawk il-funzjonijiet tan-network ikunu soġġetti għal miri ta’ prestazzjoni fl-oqsma ewlenin ta’ prestazzjoni tal-ambjent, il-kapaċità u l-kosteffiċjenza.

(48)

Jenħtieġ li l-iskema ta’ imposti stabbilita b’dan ir-Regolament tkun konsistenti fost l-oħrajn mal-Artikolu 15 tal-Konvenzjoni ta’ Chicago. Jenħtieġ li dik l-iskema tkun mingħajr preġudizzju għall-possibbiltà li l-Istati Membri jiffinanzjaw il-forniment ta’ servizzi tan-navigazzjoni bl-ajru koperti minn dan ir-Regolament permezz ta’ fondi pubbliċi, dment li tkun konformi mar-regoli tat-Trattat dwar il-kompetizzjoni fejn applikabbli.

(49)

Jenħtieġ li l-iskema ta’ imposti tkun ibbażata fuq il-prinċipju li l-utenti tal-ispazju tal-ajru għandhom iħallsu l-kostijiet imġarrba fir-rigward tas-servizzi u l-funzjonijiet għall-benefiċċju tal-utenti tal-ispazju tal-ajru li mhumiex koperti mod ieħor. Il-kostijiet imġarrba fir-rigward tal-forniment tas-servizzi tan-navigazzjoni bl-ajru mill-awtoritajiet nazzjonali tal-Istati Membri, inkluż l-awtoritajiet kompetenti nazzjonali u l-awtoritajiet superviżorji nazzjonali kif ukoll il-EUROCONTROL u l-Maniġer tan-Network jistgħu jiġu inklużi fil-kostijiet determinati eliġibbli li jridu jiġu ddebitati lill-utenti tal-ispazju tal-ajru. Jenħtieġ li l-imposti jħeġġu l-forniment sikur, effiċjenti, effettiv u sostenibbli ta’ servizzi tan-navigazzjoni bl-ajru bil-ħsieb li jinkiseb livell għoli ta’ sikurezza u kosteffiċjenza u jintlaħqu l-miri ta’ prestazzjoni u jenħtieġ li jappoġġaw it-tnaqqis tal-impatt ambjentali tal-avjazzjoni.

(50)

Il-kostijiet li jirriżultaw mill-Konvenzjoni Internazzjonali tal-Eurocontrol relatata mal-Kooperazzjoni għas-Sikurezza tan-Navigazzjoni bl-Ajru tat-13 ta’ Diċembru 1960, kif emendata l-aħħar, jistgħu jiġu inklużi fil-kostijiet iddeterminati peress li l-attivitajiet kollha koperti minn dik il-Konvenzjoni fiż-żmien tal-adozzjoni ta’ dan ir-Regolament jitqiesu bħala relatati mas-servizzi tan-navigazzjoni bl-ajru.

(51)

Jenħtieġ li l-Kummissjoni twettaq studju tal-fattibbiltà dwar l-impatt tal-modulazzjoni tal-imposti fuq it-traffiku tal-ajru, il-forniment tas-servizzi, il-kostijiet amministrattivi u fuq il-partijiet ikkonċernati, kif ukoll dwar il-kontribut ta’ dik il-modulazzjoni għall-kisba tal-objettivi tal-Ajru Uniku Ewropew. Abbażi ta’ dak l-istudju, jenħtieġ li l-Kummissjoni tiddetermina jekk għandhiex tadotta att ta’ implimentazzjoni biex tiżgura l-applikazzjoni uniformi tal-modulazzjoni tal-imposti biex tħeġġeġ lill-utenti tal-ispazju tal-ajru jappoġġaw it-titjib fil-prestazzjoni klimatika u ambjentali, b’mod partikolari permezz tal-użu tal-aktar rotot effiċjenti fl-użu tal-fjuwil disponibbli, użu akbar ta’ teknoloġiji alternattivi ta’ propulsjoni nadifa, inkluż fjuwils alternattivi sostenibbli, filwaqt li jinżamm livell ottimali ta’ sikurezza. Anke jekk il-Kummissjoni ma tadottax tali att ta’ implimentazzjoni, jenħtieġ li l-Istati Membri jkollhom id-dritt li jimmodulaw l-imposti biex iħeġġu lill-fornituri tas-servizzi tat-traffiku tal-ajru u lill-utenti tal-ispazju tal-ajru jappoġġaw it-titjib fil-kwalità tas-servizz bħal żieda fil-kapaċità, tnaqqis fid-dewmien u żvilupp sostenibbli.

(52)

F’każ ta’ kriżi tan-network, bħal kunflitt ġeopolitiku, kriżi tas-saħħa jew diżastru naturali, li tipprevjeni l-ħruġ ta’ previżjonijiet affidabbli tat-traffiku, jenħtieġ li l-Kummissjoni tkun tista’ tadotta dispożizzjonijiet tranżizzjonali li jinkludu sospensjoni temporanja jew adattament tal-iskema ta’ prestazzjoni sakemm tintemm il-kriżi tan-network u jkun disponibbli tbassir affidabbli ġdid.

(53)

Mingħajr preġudizzju għall-proċedura stabbilita fl-Artikolu 258 TFUE, jenħtieġ li l-Kummissjoni tirrieżamina regolarment il-konformità tal-Istati Membri ma’ dan ir-Regolament. Meta twettaq dak ir-rieżami, jenħtieġ li l-Kummissjoni tivvaluta jekk l-Istati Membri jiżgurawx il-konformità mill-fornituri tas-servizzi tan-navigazzjoni bl-ajru mal-obbligi tagħhom.

(54)

Jenħtieġ li jsir provediment għat-trasparenza tal-kontijiet tal-fornituri tas-servizzi tan-navigazzjoni bl-ajru, bħala mezz wieħed biex ikunu evitati s-sussidji inkroċjati u d-distorsjonijiet riżultanti.

(55)

Jenħtieġ li l-funzjonijiet tan-network tal-ATM jikkontribwixxu għall-iżvilupp sostenibbli tas-sistema tat-trasport bl-ajru u jappoġġaw il-kisba ta’ miri ta’ prestazzjoni għall-Unjoni kollha. Jenħtieġ li dawn iwasslu għall-użu sostenibbli, effiċjenti u ambjentalment ottimali tal-ispazju tal-ajru u tar-riżorsi skarsi, jirriflettu l-ħtiġijiet operazzjonali fl-applikazzjoni tal-infrastruttura tan-network Ewropew għall-ATM u jenħtieġ li jipprovdu appoġġ fl-eventwalità ta’ kriżijiet tan-network.

(56)

Għadd ta’ funzjonijiet tan-network, bħall-ġestjoni tal-fluss tat-traffiku tal-ajru, jeħtieġ li jiġu kkoordinati ċentralment minn korp uniku b’appoġġ għal azzjonijiet meħuda mill-Istati Membri u l-partijiet ikkonċernati operazzjonali rilevanti. Għaldaqstant, jenħtieġ li għadd ta’ kompiti li jikkontribwixxu għat-twettiq ta’ dawn il-funzjonijiet jitwettqu minn Maniġer tan-Network, li l-azzjoni tiegħu jenħtieġ tinvolvi lill-partijiet ikkonċernati operazzjonali kollha. Jenħtieġ li l-kompiti speċifiċi tal-Maniġer tan-Network jiġu stabbilit f’dan ir-Regolament. Jenħtieġ li l-Maniġer tan-Network jinħatar mill-Kummissjoni.

(57)

Fl-2011 u fl-2019, il-Kummissjoni ħatret lill-Eurocontrol bħala Maniġer tan-Network. Sabiex tiġi żgurata l-kontinwità tal-operat fit-twettiq tal-funzjonijiet tan-network tal-ATM, dak il-mandat jista’ jiġġedded soġġett għall-kundizzjonijiet stabbiliti f’dan ir-Regolament.

(58)

F’każ li l-Maniġer tan-Network ikun residenti f’entità oħra, jenħtieġ li jkun hemm separazzjoni funzjonali u ġerarkika kif ukoll kontabilità separata, minn dik l-entità.

(59)

Jenħtieġ li l-partijiet ikkonċernati operazzjonali, li għandhom jimplimentaw il-funzjonijiet tan-network fil-livelli lokali u operazzjonali, u l-Istati Membri jiġu involuti b’mod sħiħ fl-implimentazzjoni ta’ dawk il-funzjonijiet u fil-proċess tat-teħid tad-deċiżjonijiet. Għaldaqstant, jenħtieġ li l-Maniġer tan-Network jieħu miżuri permezz ta’ teħid tad-deċiżjonijiet kooperattiv ibbażat b’mod partikolari fuq il-konsultazzjoni tal-partijiet ikkonċernati operazzjonali u l-Istati Membri u arranġamenti ta’ ħidma dettaljati u proċessi għat-tħaddim. F’tali proċess kooperattiv tat-teħid tad-deċiżjonijiet, jenħtieġ li l-partijiet jaġixxu kemm jista’ jkun bil-ħsieb li jtejbu l-funzjonament u l-prestazzjoni tan-network, inkluż l-ilħuq tal-miri ta’ prestazzjoni għall-Unjoni kollha fil-qasam ewlieni ta’ prestazzjoni tal-klima u tal-ambjent, u jenħtieġ li l-interessi tan-network jipprevalu, mingħajr preġudizzju għall-ħtiġijiet tas-sigurtà u tad-difiża, u jenħtieġ li l-proċess tat-teħid tad-deċiżjonijiet kooperattiv ikun tali li l-kwistjonijiet jiġu solvuti u jintlaħaq kunsens kull meta jkun possibbli. Fil-kuntest tal-proċess tat-teħid tad-deċiżjonijiet kooperattiv għat-twettiq tal-funzjonijiet tan-network, jenħtieġ li l-Istati Membri jiżguraw koordinazzjoni adegwata fil-livell nazzjonali mal-partijiet ikkonċernati operazzjonali ċivili u militari. Barra minn hekk, sabiex tiġi żgurata l-governanza xierqa b’rabta mat-twettiq tal-funzjonijiet tan-network, jenħtieġ li jiġi stabbilit Bord tat-Tmexxija tan-Network li jiżgura rappreżentanza xierqa tal-interessi tal-atturi kollha involuti, b’mod partikolari l-partijiet ikkonċernati operazzjonali, fl-implimentazzjoni ta’ dawk il-funzjonijiet. Mingħajr preġudizzju għall-konsultazzjoni tal-Bord tat-Tmexxija tan-Network rigward deċiżjonijiet regolatorji jew strateġiċi bħall-approvazzjoni tal-Pjan Strateġiku għan-Network, jenħtieġ li l-miżuri adottati permezz tat-teħid tad-deċiżjonijiet kooperattiv u mill-Bord tat-Tmexxija tan-Network ikunu ta’ natura operazzjonali jew teknika, biex jiżguraw it-tħaddim ta’ kuljum tan-network f’konformità mal-objettivi ta’ dan ir-Regolament.

(60)

Sabiex tissaħħaħ l-attenzjoni fuq il-klijenti tal-fornituri tas-servizzi tat-traffiku tal-ajru, jenħtieġ li l-partijiet ikkonċernati jiġu kkonsultati f’deċiżjonijiet operazzjonali ewlenin tal-fornituri tas-servizzi tat-traffiku tal-ajru.

(61)

Il-forniment ta’ informazzjoni ajrunawtika kompluta, ta’ kwalità għolja u fil-ħin għandu impatt sinifikanti fuq is-sikurezza u fuq l-iffaċilitar tal-aċċess għall-ispazju tal-ajru tal-Unjoni u l-possibbiltajiet ta’ moviment fi ħdanu. Għalhekk, jenħtieġ li l-aċċess għal dik id-data jiġi ffaċilitat b’infrastruttura ta’ informazzjoni xierqa.

(62)

L-użu sikur u effiċjenti tal-ispazju tal-ajru jista’ jinkiseb biss b’kooperazzjoni mill-qrib bejn l-utenti tal-ispazju tal-ajru ċivili u militari, li fil-prattika hi bbażata l-aktar fuq il-kunċett ta’ użu flessibbli tal-ispazju tal-ajru u koordinazzjoni ċivili militari effettiva kif stabbilit mill-Organizzazzjoni tal-Avjazzjoni Ċivili Internazzjonali (ICAO). Biex tkun żgurata l-applikazzjoni uniformi ta’ dan il-kunċett, jenħtieġ li l-Kummissjoni tingħata s-setgħa li tadotta atti ta’ implimentazzjoni, fil-limiti tal-politika komuni tat-trasport u mingħajr preġudizzju għar-responsabbiltajiet tal-Istati Membri fir-rigward tal-spazju tal-ajru tagħhom.

(63)

Il-proġett dwar ir-Riċerka dwar il-Ġestjoni tat-Traffiku tal-Ajru Uniku Ewropew (SESAR) għandu l-għan li jippermetti l-iżvilupp sikur, effiċjenti u ambjentalment sostenibbli tat-trasport bl-ajru billi jimmodernizza s-sistema Ewropea u globali tal-ATM. Biex tikkontribwixxi għall-effettività sħiħa tiegħu, jenħtieġ tiġi żgurata koordinazzjoni xierqa bejn il-fażijiet tal-proġett. Jenħtieġ li l-Pjan Regolatorju Ewropew tal-ATM jirriżulta mill-fażi tad-definizzjoni ta’ SESAR, u jenħtieġ li jikkontribwixxi biex jintlaħqu l-miri ta’ prestazzjoni għall-Unjoni kollha. Għall-perjodu 2022-2027, il-Kummissjoni Ewropea u s-Sħubija għall-Implimentazzjoni u l-Infrastruttura tas-SESAR (SDIP) - konsorzju magħmul minn 20 utent ewlieni tal-ispazju tal-ajru Ewropew, fornituri tas-servizzi tan-navigazzjoni bl-ajru u operaturi tal-ajruporti, u EUROCONTROL bħala Maniġer tan-Network - iffirmaw Ftehim Qafas ta’ Sħubija fit-tul, sabiex l-SDIP iwettaq kompiti relatati mal-implimentazzjoni f’waqtha u sinkronizzata ta’ proġetti komuni (ir-Regolament ta’ Implimentazzjoni tal-Kummissjoni (UE) 2021/116 (15) ) u l-monitoraġġ billi jikkoordina u jappoġġa lill-partijiet ikkonċernati.

(64)

Jenħtieġ li l-kunċett ta’ proġetti komuni jkollu l-għan li jimplimenta, f’waqthom, b’mod koordinat u sinkronizzat, il-bidliet operazzjonali essenzjali identifikati fil-Pjan Regolatorju Ewropew tal-ATM li jħallu impatt fuq in-network kollu u jkunu laħqu maturità suffiċjenti għall-implimentazzjoni. B’mod partikolari, jenħtieġ li l-proġetti komuni jippromwovu u jaċċelleraw l-adozzjoni ta’ teknoloġiji diġitali ġodda. Jenħtieġ li l-Kummissjoni tkun inkarigata bit-twettiq ta’ analiżi tal-kostijiet u l-benefiċċji b’rabta mal-finanzjament tal-implimentazzjoni tal-proġetti komuni bil-ħsieb li tiġi aċċellerata l-implimentazzjoni tal-proġett SESAR.

(65)

Jenħtieġ li l-konformità mar-rekwiżiti għas-sistemi u l-kostitwenti tal-ATM stabbiliti bir-Regolament (UE) 2018/1139 tiżgura l-interoperabbiltà ta’ dawk is-sistemi u l-kostitwenti, għall-benefiċċju tal-Ajru Uniku Ewropew.

(66)

Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, b’mod partikolari fir-rigward tal-PRB, l-implimentazzjoni tal-iskemi ta’ prestazzjoni u ta’ imposti, inkluż dwar l-istabbiliment ta’ miri ta’ prestazzjoni għall-Unjoni kollha u valuri ta’ bażi komplementari, livelli limiti ta’ allert, valuri diżaggregati u gruppi ta’ parametri referenzjarji, l-istabbiliment ta’ miri ta’ prestazzjoni u l-kriterji u l-kundizzjonijiet għall-valutazzjoni tagħhom, it-tħejjija, il-valutazzjoni, l-approvazzjoni u r-reviżjoni tal-pjanijiet ta’ prestazzjoni, inkluż il-pjanijiet konġunti tal-prestazzjoni, u l-miri ta’ prestazzjoni, il-monitoraġġ tal-prestazzjoni, inkluż il-prestazzjoni tal-funzjonijiet tan-network, l-allokazzjoni tal-kostijiet bejn is-servizzi tan-navigazzjoni bl-ajru en route u fit-terminal, l-istabbiliment ta’ indikaturi ewlenin tal-prestazzjoni u indikaturi għall-monitoraġġ, metodoloġija għall-valutazzjoni komparattiva, skemi ta’ inċentivi, regoli dwar il-modifika ta’ żona ta’ imposti fit-terminal, regoli għall-għoti ta’ informazzjoni dwar il-kostijiet u l-imposti, il-kontenut u l-istabbiliment tal-bażijiet tal-kost għall-imposti u l-istabbiliment tar-rati unitarji għas-servizzi tan-navigazzjoni bl-ajru, mekkaniżmi ta’ inċentivi u mekkaniżmi għall-kondiviżjoni tar-riskju, il-modulazzjoni tal-imposti, regoli dwar il-modalitajiet tal-forniment ta’ data mill-awtoritajiet superviżorji nazzjonali lill-Kummissjoni, mekkaniżmu biex jiġu indirizzati avvenimenti mhux prevedibbli u sinifikanti li għandhom impatt materjali fuq l-implimentazzjoni tal-iskemi ta’ prestazzjoni u ta’ imposti, regoli dwar l-eżekuzzjoni tal-funzjonijiet tan-network, dwar il-ħatra tal-Maniġer tan-Network u t-termini u l-kundizzjonijiet ta’ tali ħatra, kif ukoll il-kompiti u l-funzjonament tal-Maniġer tan-Network, dwar il-Bord tat-Tmexxija tan-Network, dwar il-proċess tat-teħid tad-deċiżjonijiet kooperattiv u l-mekkaniżmi ta’ governanza tan-network, ir-rekwiżiti dwar id-disponibbiltà tad-data operazzjonali, l-applikazzjoni tal-kunċett tal-użu flessibbli tal-ispazju tal-ajru, l-istabbiliment ta’ proġetti komuni u l-mekkaniżmi ta’ governanza applikabbli għalihom, kif ukoll l-implimentazzjoni tal-klassifikazzjoni tal-ispazju tal-ajru tal-ICAO, jenħtieġ li s-setgħat ta’ implimentazzjoni jingħataw lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (16). Meta l-kumitat ma jagħti l-ebda opinjoni, jenħtieġ li l-Kummissjoni ma tadottax l-abbozz ta’ att ta’ implimentazzjoni.

(67)

Jenħtieġ li l-organizzazzjonijiet soċjali u dawk tal-persunal professjonali jiġu rispettivament kkonsultati dwar il-miżuri proposti kollha li jkollhom implikazzjonijiet sinifikanti relatati mal-elementi soċjali, teknoloġiċi u tad-dimensjoni umana jew tal-prestazzjoni. Fil-livell tal-Unjoni, jenħtieġ li jiġu kkonsultati wkoll il-Kumitat ta’ Djalogu Settorjali stabbilit skont id-Deċiżjoni tal-Kummissjoni 98/500/KE (17) u l-Grupp ta’ Esperti tal-Kummissjoni dwar id-Dimensjoni Umana tal-Ajru Uniku Ewropew.

(68)

Jenħtieġ li l-penali previsti fir-rigward tal-ksur ta’ dan ir-Regolament ikunu effettivi, proporzjonati u dissważivi, mingħajr tnaqqis tas-sikurezza.

(69)

Jenħtieġ li dan ir-Regolament ma jipprekludix l-applikazzjoni mill-Istati Membri ta’ miżuri meħtieġa għas-salvagwardja tal-interessi tal-politika dwar is-sikurezza u d-difiża essenzjali. Barra minn hekk, ma jaffettwax is-setgħa tal-Istati Membri li jadottaw dispożizzjonijiet fir-rigward tal-organizzazzjoni tal-forzi armati tagħhom. Dik is-setgħa tista’ twassal biex l-Istati Membri jadottaw miżuri biex jiżguraw li l-forzi armati tagħhom ikollhom spazju tal-ajru suffiċjenti għal finijiet ta’ edukazzjoni u taħriġ adegwati. Għaldaqstant jenħtieġ li jsir provvediment għal klawżola ta’ salvagwardja li tagħmel possibbli li din is-setgħa tkun eżerċitata.

(70)

Huwa xieraq li fir-Regolament (UE) 2018/1139 jiġu integrati r-rekwiżiti marbuta maċ-ċertifikazzjoni tal-fornituri tas-servizzi tan-navigazzjoni bl-ajru li qabel kienu stabbiliti fir-Regolament (KE) Nru 550/2004, biex ikun possibbli qafas regolatorju ssimplifikat għaċ-ċertifikazzjoni u proċess uniku ta’ ċertifikazzjoni. B’mod partikolari, huwa xieraq li jiġi previst li, sabiex jiġu ċċertifikati, jenħtieġ li l-fornituri tal-ġestjoni tat-traffiku tal-ajru u s-servizzi tan-navigazzjoni tal-ajru (ATM/ANS) juru robustezza finanzjarja suffiċjenti u jiksbu kopertura xierqa ta’ responsabbiltà u assigurazzjoni, jikkonformaw mar-rekwiżiti applikabbli dwar is-sjieda u l-istruttura organizzattiva u jimmaniġġjaw ir-riskji għas-sigurtà. Jenħtieġ li jiġu speċifikati wkoll il-kundizzjonijiet li jistgħu jiġu applikati għaċ-ċertifikati maħruġa.

(71)

Barra minn hekk, jenħtieġ li r-rekwiżiti essenzjali applikabbli għall-ATM/ANS u għall-kontrolluri tat-traffiku tal-ajru jiġu ssupplimentati fir-rigward tar-rekwiżiti applikabbli għas-servizzi tad-data dwar it-traffiku tal-ajru.

(72)

Għall-fini tat-twettiq tal-kompiti tagħhom ta’ ċertifikazzjoni, sorveljanza u infurzar fir-rigward tar-rekwiżiti essenzjali relatati mar-robustezza finanzjarja, ir-responsabbiltà, il-kopertura tal-assigurazzjoni, is-sjieda u l-istruttura organizzazzjonali, jenħtieġ li l-awtorità kompetenti tiddependi fuq il-valutazzjonijiet magħmula mill-awtorità superviżorja nazzjonali, ħlief jekk l-awtorità kompetenti nazzjonali kkonċernata tkun responsabbli għall-kompiti kollha relatati maċ-ċertifikazzjoni.

(73)

Billi r-Regolamenti (KE) Nru 549/2004, (KE) Nru 550/2004 u (KE) Nru 551/2004 huma sostitwiti u mħassra b’dan ir-Regolament, huwa xieraq li jiġu aġġornati r-referenzi li saru fir-Regolament (UE) 2018/1139 għar-Regolamenti (KE) Nru 549/2004, (KE) Nru 550/2004 u (KE) Nru 551/2004.

(74)

Sabiex jiġu żgurati kundizzjonijiet uniformi għall-implimentazzjoni tar-Regolament (UE) 2018/1139, b’mod partikolari fir-rigward tal-kundizzjonijiet li jistgħu jiġu applikati għall-fornituri taċ-ċertifikati tal-ATM/ANS u dwar ir-regoli u l-proċeduri għall-valutazzjoni u s-sorveljanza, mill-awtorità superviżorja nazzjonali, tal-konformità ta’ dawk il-fornituri mar-rekwiżiti essenzjali relatati mar-robustezza finanzjarja, ir-responsabbiltà, il-kopertura tal-assigurazzjoni, is-sjieda u l-istruttura organizzazzjonali, jenħtieġ li l-Kummissjoni tingħata setgħat ta’ implimentazzjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011.

(75)

Għalhekk, jenħtieġ li r-Regolament (UE) 2018/1139 jiġi emendat skont dan.

(76)

Minħabba li l-objettiv ta’ dan ir-Regolament, jiġifieri l-implimentazzjoni tal-Ajru Uniku Ewropew, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala tranżnazzjonali tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak meħtieġ biex jinkiseb dak l-objettiv,