Artikolu 1 Suġġett u kamp ta’ applikazzjoni

1.   Dan ir-Regolament jistabbilixxi regoli uniformi li jindirizzaw l-użu ħażin ta’ servizzi ta’ hosting għad-disseminazzjoni ta’ kontenut terroristiku online lill-pubbliku, b’mod partikolari dwar:

2.   Dan ir-Regolament japplika għal fornituri ta’ servizzi ta’ hosting li joffru servizzi fl-Unjoni, irrispettivament mill-post tal-istabbiliment prinċipali tagħhom, sa fejn huma jiddisseminaw informazzjoni lill-pubbliku.

3.   Il-materjal disseminat lill-pubbliku għal finijiet edukattivi, ġurnalistiċi, artistiċi jew ta’ riċerka jew għal finijiet tal-prevenzjoni jew tal-ġlieda kontra t-terroriżmu, inkluż il-materjal li jirrappreżenta espressjoni ta’ fehmiet polemiċi jew kontroversjali matul dibattitu pubbliku, ma għandux jitqies bħala kontenut terroristiku. Għandha ssir valutazzjoni li tiddetermina l-fini veru ta’ dik id-disseminazzjoni u jekk il-materjal huwiex disseminat lill-pubbliku għal dawk il-finijiet.

4.   Dan ir-Regolament ma għandux ikollu l-effett li jimmodifika l-obbligu tar-rispett għad-drittijiet, il-libertajiet u l-prinċipji msemmija fl-Artikolu 6 TUE u għandu japplika mingħajr preġudizzju għall-prinċipji fundamentali relattivi għal-libertà ta’ espressjoni u ta’ informazzjoni, inklużi l-libertà u l-pluraliżmu tal-media.

5.   Dan ir-Regolament għandu jkun mingħajr preġudizzju għad-Direttivi 2000/31/KE u 2010/13/UE. Għas-servizzi tal-media awdjoviżiva kif definiti fil-punt (a) tal-Artikolu 1(1) tad-Direttiva 2010/13/UE, għandha tipprevali d-Direttiva 2010/13/UE.