7. Chun críocha mhír 2, pointe (d)(iii), féadfaidh na húdaráis inniúla, ar shampla d’fhachtóirí riosca a n-úsáidtear an cur chuige dá dtagraítear in Airteagal 10(4) de Rialachán Tarmligthe (AE) 2024/397 ina leith, a fhíorú cé acu a chomhlíonann nó nach gcomhlíonann na fachtóirí riosca comhfhreagracha arna roghnú na coinníollacha dá dtagraítear i mír 5 den Airteagal sin.
Le linn do na húdaráis inniúla a fhíorú cé acu atá nó nach bhfuil an dá fhachtóir riosca den chineál céanna i gcomhréir le hAirteagal 10(5), pointe (b), de Rialachán Tarmligthe (AE) 2024/397 agus cé acu atá nó nach bhfuil difríocht idir na fachtóirí riosca sin maidir le gnéithe as a n-eascraíonn gannmheastachán ar an luaineacht i gcomhréir le hAirteagal 10(5), pointe (c), den Rialachán Tarmligthe sin, fíoróidh siad cé acu atá nó nach bhfuil na príomh-shainthréithe céanna ag na fachtóirí riosca, agus cé acu a mheallann nó nach meallann an fachtóir riosca arna roghnú riosca sonrach a bhaineann le hainm más rud é go meallann an fachtóir riosca neamh-insamhaltaithe a leithéid.