Airteagal 37 1.

Bunóidh CPL, i gcás inarb iomchuí de réir an chineáil táirge a imréitítear, catagóirí na gcomhaltaí imréitigh atá inghlactha agus na critéir iontrála, le comhairle ón gcoiste riosca de bhun Airteagal 28(3). Beidh critéir den sórt sin neamh-idirdhealaitheach, trédhearcach agus oibiachtúil ionas gur féidir rochtain chothrom agus oscailte ar an CPL a áirithiú agus áiritheofar leo go mbeidh acmhainní airgeadais leordhóthanacha agus acmhainneacht oibríochtúil leordhóthanach ag comhaltaí imréitigh chun na hoibleagáidí a eascraíonn as rannpháirtíocht in CPL a chomhlíonadh. Ní cheadófar critéir lena gcuirtear srian le rochtain a úsáid ach amháin a mhéid is gurb é is cuspóir dóibh an riosca atá ann don CPL a rialú. Gan dochar do shocruithe idir-inoibritheachta faoi Theideal V ná do dhéanamh bheartas infheistíochta an CPL i gcomhréir le hAirteagal 47, áiritheofar leis na critéir nach féidir le CPLanna ná na tithe imréitigh a bheith ina gcomhaltaí imréitigh, go díreach nó go hindíreach, den CPL.