Airteagal 140 2.

an líon eisiúintí cripteashócmhainní san Aontas, an líon páipéar bán maidir le cripteashócmhainní a cuireadh faoi bhráid na n-údarás inniúil nó ar tugadh fógra ina leith do na húdaráis inniúla, cineál na gcripteashócmhainní a eisíodh agus a gcaipitliú margaidh, agus líon na gcripteashócmhainní a ligeadh isteach chun a dtrádála;

tuairisc ar an taithí ar aicmiú cripteashócmhainní lena n-áirítear éagsúlachtaí a d’fhéadfadh a bheith sna cuir chuige a bheidh ag na húdaráis inniúla;

measúnú ar an ngá atá le sásra formheasa a thabhairt isteach le haghaidh páipéir bhána cripteashócmhainne maidir le haghaidh cripteashócmhainní seachas comharthaí sócmhainn-tagartha agus comharthaí ríomh-airgid;

meastachán ar líon áitritheoirí an Aontais a úsáideann nó a infheistíonn i gcripteashócmhainní arna n-eisiúint san Aontas;

i gcás inar féidir, meastachán ar líon áitritheoirí an Aontais a úsáideann nó a infheistíonn i gcripteashócmhainní arna n-eisiúint lasmuigh den Aontas agus míniú ar infhaighteacht na sonraí ina leith sin;

líon agus luach na calaoise, na gcamscéimeanna, na haiceála, úsáid na gcripteashócmhainní le haghaidh íocaíochtaí a bhaineann le hionsaithe bogearraí éirice, le cibirionsaithe, gadaíocht nó caillteanais cripteashócmhainní a thuairiscítear san Aontas, na cineálacha iompraíochta calaoisí, an líon gearán arna bhfáil ag soláthraithe seirbhísí cripteashócmhainní agus eisitheoirí comharthaí sócmhainn-tagartha, an líon gearán arna bhfáil ag na húdaráis inniúla agus ábhair na ngearán arna bhfáil;

líon na n-eisitheoirí comharthaí sócmhainn-tagartha, agus anailís ar chatagóirí na gcúlsócmhainní, méid na gcúlchistí sócmhainní agus méid na n-íocaíochtaí a dhéantar i gcomharthaí sócmhainn-tagartha;

líon na n-eisitheoirí comharthaí sócmhainn-tagartha suntasacha, agus anailís ar chatagóirí na gcúlsócmhainní, méid na gcúlchistí sócmhainní agus méid na n-íocaíochtaí a dhéantar i gcomharthaí sócmhainn-tagartha suntasacha;

líon na n-eisitheoirí comharthaí ríomh-airgid agus anailís ar na hairgeadraí oifigiúla atá faoi thagairt ag na comharthaí ríomh-airgid, comhdhéanamh agus méid na gcistí arna dtaisceadh nó arna n-infheistiú i gcomhréir le hAirteagal 54 agus méid na n-íocaíochtaí a dhéantar i gcomharthaí ríomh-airgid;

líon na n-eisitheoirí comharthaí ríomh-airgid suntasacha agus anailís ar na hairgeadraí oifigiúla atá faoi thagairt ag na comharthaí ríomh-airgid suntasacha agus, i gcás institiúidí ríomh-airgid a eisíonn comharthaí ríomh-airgid suntasacha, anailís ar chatagóirí na gcúlsócmhainní, méid na gcúlsócmhainní, agus méid na n-íocaíochtaí a dhéantar i gcomharthaí ríomh-airgid suntasacha;

líon na soláthraithe seirbhísí cripteashócmhainní suntasacha;

measúnú ar fheidhmiú mhargaí na gcripteashócmhainní san Aontas, lena n-áirítear forbairt agus treochtaí an mhargaidh, taithí na n-údarás maoirseachta, an líon soláthraithe seirbhísí cripteashócmhainní údaraithe agus a sciar faoi seach den mhargadh á cur san áireamh;

measúnú ar leibhéal na cosanta do shealbhóirí cripteashócmhainní agus do chliaint soláthraithe seirbhísí cripteashócmhainní, go háirithe sealbhóirí miondíola;

measúnú ar chumarsáid chalaoiseach mhargaíochta agus camscéimeanna a bhaineann le cripteashócmhainní a tharlaíonn trí líonraí meán sóisialta;

measúnú ar na ceanglais is infheidhme maidir le heisitheoirí cripteashócmhainní agus soláthraithe seirbhísí cripteashócmhainní agus an tionchar atá acu ar athléimneacht oibríochta, ar shláine an mhargaidh, ar chobhsaíocht airgeadais, agus ar chosaint cliant agus sealbhóirí cripteashócmhainní;

meastóireacht ar chur i bhfeidhm Airteagal 81 agus ar an bhféidearthacht tástálacha oiriúnachta a thabhairt isteach in Airteagail 78, 79 agus 80 chun cosaint níos fearr a thabhairt do chliaint soláthraithe seirbhísí cripteashócmhainní, go háirithe sealbhóirí miondíola;

measúnú i dtaobh an bhfuil raon feidhme na seirbhísí cripteashócmhainní a chumhdaítear leis an Rialachán seo iomchuí agus an bhfuil gá le haon choigeartú ar na sainmhínithe a leagtar amach sa Rialachán seo, agus ar ghá aon fhoirmeacha cripteashócmhainní nuálacha breise a áireamh i raon feidhme an Rialacháin seo;

measúnú lena chinneadh an bhfuil na ceanglais stuamachta maidir le soláthraithe seirbhísí cripteashócmhainní iomchuí agus ar cheart iad a ailíniú leis na ceanglais maidir le caipiteal tosaigh agus cistí dílse is infheidhme maidir le gnólachtaí infheistíochta faoi Rialachán (AE) 2019/2033 ó Pharlaimint na hEorpa agus ón gComhairle ( 21 ) agus faoi Threoir (AE) 2019/2034 ó Pharlaimint na hEorpa agus ón gComhairle ( 22 );

measúnú ar oiriúnacht na dtairseach chun comharthaí sócmhainn-tagartha agus comharthaí ríomh-airgid a aicmiú mar chomharthaí suntasacha mar a leagtar amach in Airteagal 43(1), pointí (a), (b) agus (c), agus measúnú ar cibé ar cheart meastóireacht a dhéanamh go tréimhsiúil ar na tairseacha;

measúnú ar fhorbairt an airgeadais dhíláraithe i margaí i gcripteashócmhainní agus ar láimhseáil rialála iomchuí na gcóras cripteashócmhainní díláraithe;

measúnú ar oiriúnacht na dtairseach chun a mheas go bhfuil soláthraithe seirbhísí cripteashócmhainní suntasach de bhun Airteagal 85, agus measúnú i dtaobh ar cheart meastóireacht a dhéanamh ar na tairseacha go tréimhsiúil;

measúnú i dtaobh ar cheart córas coibhéise a bhunú faoin Rialachán seo d’eintitis a sholáthraíonn seirbhísí cripteashócmhainní, d’eisitheoirí comharthaí sócmhainn-tagartha nó d’eisitheoirí comharthaí ríomh-airgid ó thríú tíortha;

measúnú lena chinneadh an bhfuil na díolúintí faoi Airteagail 4 agus 16 iomchuí;

measúnú ar thionchar an Rialacháin seo ar fheidhmiú cuí an mhargaidh inmheánaigh i leith cripteashócmhainní, lena n-áirítear aon tionchar ar rochtain FBManna ar mhaoiniú agus ar fhorbairt modhanna nua íocaíochta, lena n-áirítear ionstraimí íocaíochta;

tuairisc ar fhorbairtí i samhlacha gnó agus i dteicneolaíochtaí i margaí i gcripteashócmhainní agus béim ar leith á leagan ar thionchar na dteicneolaíochtaí nua a bhaineann leis an gcomhshaol agus an aeráid, chomh maith le measúnú ar roghanna beartais agus, i gcás inar gá, aon bhearta breise a d’fhéadfadh údar a bheith leo chun drochthionchair na dteicneolaíochtaí a úsáidtear i margaí i gcripteashócmhainní ar an aeráid agus drochthionchair eile a bhaineann leis an gcomhshaol a mhaolú agus, go háirithe, ar na sásraí comhthola a úsáidtear chun idirbhearta cripteashócmhainní a bhailíochtú;

breithmheas i dtaobh an bhfuil gá le haon athrú ar na bearta a leagtar amach sa Rialachán seo chun cosaint cliant agus sealbhóirí cripteashócmhainní, sláine an mhargaidh agus cobhsaíocht airgeadais a áirithiú;

feidhmiú na bpionós riaracháin agus bearta eile riaracháin;

meastóireacht ar an gcomhar idir na húdaráis inniúla, ÚBE, ESMA, bainc cheannais, chomh maith le húdaráis ábhartha eile, lena n-áirítear maidir leis an idirghníomhú idir a bhfreagrachtaí nó a gcúraimí, agus measúnú ar na buntáistí agus na míbhuntáistí a bhaineann le húdaráis inniúla na mBallstát agus ÚBE, faoi seach, a bheith freagrach as maoirseacht faoin Rialachán seo;

meastóireacht ar an gcomhar idir na húdaráis inniúla agus ESMA maidir le maoirseacht a dhéanamh ar sholáthraithe seirbhísí cripteashócmhainní suntasacha, agus measúnú ar na buntáistí agus na míbhuntáistí a bhaineann le húdaráis inniúla na mBallstát agus ESMA, faoi seach, a bheith freagrach as an maoirseacht a dhéanamh ar sholáthraithe seirbhísí cripteashócmhainní suntasacha faoin Rialachán seo;

na costais d’eisitheoirí cripteashócmhainní, seachas comharthaí sócmhainn-tagartha nó comharthaí ríomh-airgid, chun an Rialachán seo a chomhlíonadh mar chéatadán den mhéid a cruinníodh trí eisiúintí cripteashócmhainní;

na costais d’eisitheoirí comharthaí sócmhainn-tagartha agus d’eisitheoirí comharthaí ríomh-airgid chun an Rialachán seo a chomhlíonadh mar chéatadán dá gcostais oibriúcháin;

na costais do na soláthraithe seirbhísí cripteashócmhainní chun an Rialachán seo a chomhlíonadh mar chéatadán dá gcostais oibriúcháin;

líon agus méid na bhfíneálacha riaracháin agus na bpionós coiriúil a ghearrtar i leith sáruithe ar an Rialachán seo ag údaráis inniúla agus ag ÚBE.