|
Trealamh raidió a thagann faoi na catagóirí nó na haicmí a shonraítear i gCuid I d’Iarscríbhinn Ia, déanfar é sa tslí go gcomhlíonfaidh sé na sonraíochtaí a bhaineann le cumais luchtúcháin a leagtar amach san Iarscríbhinn sin le haghaidh na catagóire ábhartha nó na haicme ábhartha de threalamh raidió. Maidir le trealamh raidió is féidir a athluchtú trí bhíthin luchtú sreinge, tugtar de chumhacht don Choimisiún gníomhartha tarmligthe a ghlacadh i gcomhréir le hAirteagal 44 chun Cuid I d’Iarscríbhinn Ia a leasú i bhfianaise dul chun cinn eolaíoch agus teicneolaíoch nó forbairtí sa mhargadh chun idir-inoibritheacht uilíoch íosta a áirithiú idir trealamh raidió agus a ghléasanna luchtúcháin agus chun an áisiúlacht do thomhaltóirí a fheabhsú, chun dramhaíl chomhshaoil a laghdú agus chun ilroinnt an mhargaidh a sheachaint, tríd an méid seo a leanas:
(a)
catagóirí nó aicmí de threalamh raidió a mhodhnú, a chur léi nó a bhaint;
(b)
sonraíochtaí teicniúla a mhodhnú, a chur léi nó a bhaint, lena n-áirítear tagairtí agus tuairiscí, i ndáil leis an ngabhdán luchtúcháin nó na gabhdáin luchtúcháin agus leis an bprótacal cumarsáide luchtúcháin nó na prótacail chumarsáide luchtúcháin, le haghaidh gach catagóire nó aicme lena mbaineann de threalamh raidió.
Déanfaidh an Coimisiún measúnú leanúnach ar fhorbairtí sa mhargadh, ar ilroinnt an mhargaidh agus ar an dul chun cinn teicneolaíoch d’fhonn catagóirí nó aicmí de threalamh raidió a shainaithint ar féidir iad a athluchtú trí bhíthin luchtú sreinge a bhfágfadh a áireamh i gCuid I d’Iarscríbhinn Ia go méadófaí an áisiúlacht do thomhaltóirí go suntasach agus go laghdófaí dramhaíl chomhshaoil go suntasach. Cuirfidh an Coimisiún tuarascáil ar an measúnú dá dtagraítear sa tríú fomhír faoi bhráid Pharlaimint na hEorpa agus na Comhairle, den chéad uair faoin 28 Nollaig 2025 agus gach 5 bliana ina dhiaidh sin, agus glacfaidh sé gníomhartha tarmligthe de bhun an dara fomhír, pointe (a), dá réir. Maidir le trealamh raidió is féidir a athluchtú trí mhodhanna eile seachas luchtú sreinge, tugtar de chumhacht don Choimisiún gníomhartha tarmligthe a ghlacadh i gcomhréir le hAirteagal 44 chun Cuid I d’Iarscríbhinn Ia a leasú i bhfianaise dul chun cinn teicneolaíoch agus eolaíoch nó forbairtí sa mhargadh chun idir-inoibritheacht uilíoch íosta a áirithiú idir trealamh raidió agus a ghléasanna luchtúcháin agus chun an áisiúlacht do thomhaltóirí a fheabhsú, chun dramhaíl chomhshaoil a sheachaint agus chun ilroinnt an mhargaidh a sheachaint, tríd an méid seo a leanas:
(a)
catagóirí nó aicmí de threalamh raidió a thabhairt isteach, a mhodhnú, a chur léi nó a bhaint;
(b)
sonraíochtaí teicniúla a thabhairt isteach, a mhodhnú, a chur léi nó a bhaint, lena n-áirítear tagairtí agus tuairiscí, i ndáil le comhéadan luchtúcháin nó comhéadain luchtúcháin agus prótacal cumarsáide luchtúcháin nó prótacail chumarsáide luchtúcháin, le haghaidh gach catagóire nó aicme lena mbaineann de threalamh raidió.
Iarrfaidh an Coimisiún, i gcomhréir le hAirteagal 10(1) de Rialachán (AE) Uimh. 1025/2012, agus faoin 28 Nollaig 2024, ar cheann amháin nó níos mó d’eagraíochtaí Eorpacha um chaighdeánú caighdeáin chomhchuibhithe a dhréachtú lena leagtar síos sonraíochtaí teicniúla maidir leis an gcomhéadan luchtúcháin nó na comhéadain luchtúcháin agus maidir leis an bprótacal cumarsáide luchtúcháin nó na prótacail chumarsáide luchtúcháin do threalamh raidió is féidir a athluchtú trí mhodhanna eile seachas luchtú sreinge. I gcomhréir leis an nós imeachta a leagtar síos in Airteagal 10(2) de Rialachán (AE) Uimh. 1025/2012, rachaidh an Coimisiún i gcomhairle leis an gcoiste a bunaíodh faoi Airteagal 45(1) den Treoir seo. Beidh na ceanglais maidir le hinneachar na gcaighdeán comhchuibhithe arna n-iarraidh bunaithe ar mheasúnú arna dhéanamh ag an gCoimisiún ar staid reatha na dteicneolaíochtaí luchtúcháin gan sreang do threalamh raidió, lena gcumhdaítear, go háirithe, forbairtí sa mhargadh, dul i bhfód ar an margadh, ilroinnt an mhargaidh, feidhmíocht theicneolaíoch, idir-inoibritheacht, éifeachtúlacht fuinnimh agus feidhmíocht luchtúcháin. Agus na gníomhartha tarmligthe dá dtagraítear san Airteagal seo á n-ullmhú i ndáil le trealamh raidió is féidir a athluchtú trí bhíthin luchtú sreinge, agus maidir le trealamh raidió is féidir a athluchtú trí mhodhanna eile seachas luchtú sreinge, cuirfidh an Coimisiún san áireamh a mhéid a ghlacann an margadh leis na sonraíochtaí teicniúla atá á mbreithniú, an áisiúlacht do thomhaltóirí a bhíonn mar thoradh air sin agus a mhéid a laghdófar dramhaíl chomhshaoil agus ilroinnt an mhargaidh lenar féidir a bheith ag súil mar gheall ar shonraíochtaí teicniúla den sórt sin. Maidir le sonraíochtaí teicniúla atá bunaithe ar chaighdeáin Eorpacha nó idirnáisiúnta ábhartha atá ar fáil, measfar go gcomhlíontar leo na cuspóirí a leagtar amach san abairt roimhe seo. Mar sin féin, i gcás nach ann do chaighdeáin Eorpacha nó idirnáisiúnta den sórt sin, nó i gcásanna ina gcinneann an Coimisiún, bunaithe ar a mheasúnú teicniúil, nach gcomhlíontar leo na cuspóirí sin ar bhealach optamach, féadfaidh an Coimisiún sonraíochtaí teicniúla eile a leagan amach lena gcomhlíontar na cuspóirí sin ar bhealach níos fearr.
|