Airteagal 52 7.

Le deimhniú Eorpach cibearshlándála lena dtagraítear do leibhéal dearbhúcháin “ard”, tabharfar dearbhú go gcomhlíontar na ceanglais slándála chomhfhreagracha leis na táirgí TFC, na seirbhísí TFC, na próisis TFC agus na seirbhísí slándála bainistithe a bhfuil an deimhniú sin eisithe ina leith, lena n-áirítear feidhmiúlachtaí slándála, agus go ndearnadh meastóireacht orthu ar leibhéal atá beartaithe chun íoslaghdú a dhéanamh ar an riosca go ndéanfadh gníomhaithe a bhfuil scileanna agus acmhainní suntasacha acu cibirionsaithe úrscothacha. Áireofar ar na gníomhaíochtaí meastóireachta atá le déanamh na nithe seo a leanas ar a laghad: athbhreithniú chun easpa leochaileachtaí atá aitheanta go poiblí a léiriú; tástáil chun a léiriú go ndéantar na feidhmiúlachtaí slándála is gá a chur chun feidhme mar is ceart, ar leibhéal na húrscothachta, leis na táirgí TFC, na seirbhísí TFC, na próisis TFC nó na seirbhísí slándála bainistithe; agus measúnú ar a bhfriotaíocht in aghaidh ionsaitheoirí oilte, trí úsáid a bhaint as tástáil treáite. I gcás nach bhfuil aon ghníomhaíochtaí meastóireachta den sórt sin iomchuí, déanfar gníomhaíochtaí ionadaíocha lena ngabhann éifeacht choibhéiseach.