Airteagal 1 Ábhar agus raon feidhme

bunús a leagan síos chun spriocanna an Aontais Fuinnimh agus an cuspóir go mbeadh aeráidneodracht ann faoi 2050 ar a dhéanaí a bhaint amach go héifeachtúil, go háirithe an creat aeráide agus fuinnimh do 2030, trína fhágáil gur féidir comharthaí margaidh a chur ar fáil chun go mbaintear amach éifeachtúlacht mhéadaithe, sciar níos airde d’fhuinneamh in-athnuaite, slándáil an tsoláthair, solúbthacht, comhtháthú an chórais tríd an iliomad iompróirí fuinnimh, an inbhuanaitheacht, an dícharbónú agus an nuálaíocht;

prionsabail bhunúsacha a leagan síos do mhargaí leictreachais comhtháite a fheidhmíonn go maith, lena ndéantar rochtain neamh-idirdhealaitheach ar an margadh a thabhairt do gach soláthraí acmhainní agus gach custaiméir leictreachais, forbairt margaí todhchaíochta leictreachais a chumasú chun ligean do sholáthróirí agus do thomhaltóirí iad féin a fhálú nó iad féin a chosaint ar an riosca go mbeadh luaineacht ann amach anseo i bpraghsanna leictreachais, tomhaltóirí a chumhachtú agus a chosaint, iomaíochas ar an margadh domhanda a áirithiú, slándáil an tsoláthair agus an tsolúbthacht a fheabhsú trí fhreagairt don éileamh, stóráil fuinnimh agus réitigh sholúbthachta neamhiontaise eile, éifeachtúlacht fuinnimh a áirithiú, comhbhailiú éilimh agus soláthair dháilte a éascú, agus comhtháthú margaidh agus earnála agus luach saothair margadhbhunaithe as leictreachas a ghintear ó fuinneamh in-athnuaite a chumasú;

rialacha córa a shocrú maidir le malartuithe trasteorann leictreachais, agus feabhas a chur, sa tslí sin, ar iomaíocht sa mhargadh inmheánach sa leictreachas, agus saintréithe áirithe na margaí náisiúnta agus réigiúnacha á gcur san áireamh, lena n-áirítear air sin bunú sásra cúitimh do shreafaí trasteorann leictreachais, socrú prionsabal comhchuibhithe maidir le muirir tarchurtha trasteorann agus maidir le leithdháileadh acmhainneachta atá ar fáil sna hidirnaisc idir córais tarchurtha náisiúnta;

teacht chun cinn margaidh mórdhíola sa leictreachas a éascú ar margadh é a bheidh trédhearcach agus a fheidhmeoidh go maith agus a rannchuideoidh le leibhéal ard slándála soláthair leictreachais agus foráiltear ann do shásraí chun na rialacha do mhalartuithe trasteorann sa leictreachas a chomhchuibhiú;

tacú le hinfheistíocht fadtéarmacha i nginiúint fuinnimh in-athnuaite, leis an tsolúbthacht agus le heangacha chun cur ar chumas tomhaltóirí a mbillí fuinnimh a dhéanamh níos inacmhainne agus níos neamhspleáiche ar luaineachtaí i bpraghsanna gearrthéarmacha ar an margadh leictreachais, go háirithe praghsanna breoslaí iontaise sa mheántéarma agus san fhadtéarma;

creat a leagan síos chun bearta a ghlacadh chun aghaidh a thabhairt ar ghéarchéimeanna praghsanna leictreachais.