Airteagal 3 Sainmhínithe

ciallaíonn “boinn C1”, “boinn C2” agus “boinn C3” na boinn a bhaineann leis na haicmí faoi seach a leagtar amach in Airteagal 8(1) de Rialachán (CE) Uimh. 661/2009;

ciallaíonn “bonn atráchta” bonn réchaite atá athchóirithe trí ábhar nua a chur in ionad an tráchta chaite;

ciallaíonn “bonn spártha de chineál T le haghaidh úsáid shealadach” aon bhonn spártha le haghaidh úsáid shealadach atá ceaptha lena úsáid ag brúnna teannta atá níos airde ná na brúnna teannta arna mbunú i gcomhair boinn chaighdeánacha agus boinn threisithe;

ciallaíonn “bonn gairmiúil eisbhóthair” bonn úsáide speisialta a úsáidtear go príomha i ndiandálaí eisbhóthair;

ciallaíonn “lipéad boinn” léaráid ghrafach, i bhfoirm chlóite nó leictreonach, lena n-áirítear i bhfoirm ghreamáin, ar a bhfuil siombailí chun úsáideoirí deiridh a chur ar an eolas maidir le feidhmíocht boinn nó feidhmíocht baisce bonn, i dtaca leis na paraiméadair a leagtar amach in Iarscríbhinn I;

ciallaíonn “pointe díola” aon áit a dtaispeántar agus a stóráiltear boinn agus a dtairgtear iad lena ndíol, lena n-áirítear seomraí taispeántais gluaisteán ina ndéantar boinn nach bhfuil feistithe ar na feithiclí a thairiscint lena ndíol le húsáideoirí deiridh;

ciallaíonn “ábhar fógraíochta teicniúil” doiciméadacht i bhfoirm chlóite nó leictreonach arna cur ar fáil ag soláthróir chun ábhar fógraíochta a fhorlíonadh, leis an bhfaisnéis a leagtar amach in Iarscríbhinn IV;

ciallaíonn “bileog faisnéise faoi tháirge” doiciméad caighdeánach ina bhfuil an fhaisnéis a leagtar amach in Iarscríbhinn III i bhfoirm chlóite nó i bhfoirm leictreonach;

ciallaíonn “doiciméadacht theicniúil” doiciméadacht atá leordhóthanach chun a chur ar chumas na n-údarás faireachais margaidh measúnú a dhéanamh ar chruinneas lipéid boinn agus bileoige faisnéise táirge, lena n-áirítear cruinneas na faisnéise a leagtar amach i bpointe (2) d'Iarscríbhinn VII;

ciallaíonn “bunachar sonraí táirgí” an bunachar sonraí arna bhunú de bhun Airteagal 12 de Rialachán (AE) 2017/1369;

ciallaíonn “ciandíolachán” an díol, fruiliú nó fruilcheannach trí phostdíol, trí chatalóg, ar líne, trí theileamhargaíocht nó trí mhodh ar bith eile nuair nach féidir a bheith ag súil leis go bhfeicfeadh an t-úsáideoir ionchasach deiridh an bonn ar taispeáint;

ciallaíonn “monaróir” monaróir mar a shainmhínítear i bpointe (8) d'Airteagal 3 de Rialachán (AE) 2019/1020;

ciallaíonn “allmhaireoir” allmhaireoir mar a shainmhínítear i bpointe (9) d'Airteagal 3 de Rialachán (AE) 2019/1020;

ciallaíonn “ionadaí údaraithe” aon duine nádúrtha nó dlítheanach atá bunaithe san Aontas a bhfuil sainordú i scríbhinn faighte aige ó mhonaróir chun gníomhú thar cheann an mhonaróra i ndáil le cúraimí atá sonraithe maidir le hoibleagáidí an mhonaróra faoi cheanglais an Rialacháin seo;

ciallaíonn “soláthróir” monaróir atá bunaithe san Aontas, ionadaí údaraithe monaróra nach bhfuil bunaithe san Aontas, nó allmhaireoir, a chuireann táirge ar mhargadh an Aontais;

ciallaíonn “dáileoir” aon duine nádúrtha nó dlítheanach sa slabhra soláthair, seachas an soláthróir, a chuireann táirge ar fáil ar an margadh;

ciallaíonn “cur ar fáil ar an margadh” cur ar fáil ar an margadh mar a shainmhínítear i bpointe (1) d'Airteagal 3 de Rialachán (AE) 2019/1020;

ciallaíonn “cur ar an margadh” cur ar an margadh mar a shainmhínítear i bpointe (2) d'Airteagal 3 de Rialachán (AE) 2019/1020;

ciallaíonn “úsáideoir deiridh” aon tomhaltóir, bainisteoir flít nó gnóthas iompair de bhóthar a cheannaíonn bonn, nó a bhfuiltear ag súil go gceannóidh sé bonn;

ciallaíonn “paraiméadar” saintréith bonn a mbíonn tionchar mór aige ar an gcomhshaol, ar shábháilteacht ar bhóithre nó ar an tsláinte le linn an bonn a úsáid, amhail scríobadh bonn, míleáiste, friotaíocht rollta, fliuchghreim, torann seachtrach rollta, greim sneachta agus nó greim oighir;

ciallaíonn “cineál boinn” leagan de bhonn arb ionann do gach aonad den leagan sin na saintréithe teicniúla ar an lipéad boinn, an bhileog faisnéise faoin táirge, agus an t‐aitheantóir cineáil boinn;

ciallaíonn “lamháltas fíoraithe” an diallas uasta is inghlactha idir an tomhas agus na torthaí ríofa de thástálacha fíoraithe a rinne údaráis faireachais margaidh, nó a rinneadh thar a gceann, agus luachanna na bparaiméadar dearbhaithe nó foilsithe, lena léirítear diallas a thagann as inathraitheacht idirshaotharlainne;

ciallaíonn “aitheantóir cineáil boinn” cód, atá alfa-uimhriúil de ghnáth, lena ndéantar dealú idir cineál sonrach boinn agus cineálacha bonn eile a bhfuil an trádainm céanna nó trádmharc céanna orthu is atá ag an soláthróir;

ciallaíonn “cineál boinn comhionann” cineál boinn a chuireann an soláthróir céanna ar an margadh é mar chineál boinn eile nach ionann a aitheantóir cineáil boinn agus arb ionann a shaintréithe teicniúla, atá ábhartha don lipéad, agus an bhileog faisnéise táirge chéanna.