Airteagal 12 Fáil agus úinéireacht na ríomhairí candamacha agus na n-ionsamhlóirí candamacha

Gheobhaidh an Comhghnóthas ríomhairí candamacha agus ionsamhlóirí candamacha, a bhféadfadh idir chórais phíolótacha agus chórais thurgnamhacha a bheith i gceist leo nó fréamhshamhlacha agus córais oibriúcháin mar innill aonair nó cinn a bhfuil hibridiú déanta orthu nó innill Ríomhaireachta Ardfheidhmíochta lár-raoin atá inrochtana tríd an néal, agus is é a bheidh ina úinéir orthu.

Cumhdóidh an ranníocaíocht airgeadais ón Aontas dá dtagraítear in Airteagal 5(1) suas le 50 % de na costais fála móide suas le 50 % de chostais oibriúcháin na ríomhairí candamacha agus na n-ionsamhlóirí candamacha.

Beidh roghnú sholáthróir na ríomhairí candamacha agus na n-ionsamhlóirí candamacha bunaithe ar shonraíochtaí na tairisceana lena gcuirfear san áireamh riachtanais an úsáideora agus sonraíochtaí ginearálta an chórais arna soláthar ag an eintiteas óstála roghnaithe ina iarratas ar an nglao ar léiriú spéise. Tabharfar aghaidh sa roghnú freisin ar shlándáil an tslabhra soláthair.

Féadfaidh an Comhghnóthas feidhmiú mar chéad úsáideoir agus ríomhairí candamacha agus insamhlóirí candamacha a fháil lena gcomhtháthaítear teicneolaíochtaí a fhorbraítear go príomha san Aontas.

Féadfaidh an Bord Rialaithe cinneadh a dhéanamh sa chlár oibre, má tá údar cuí leis ar chúiseanna slándála, coinníoll a leagan síos do rannpháirtíocht soláthróirí agus ríomhairí candamacha agus na n-ionsamhlóirí candamacha á bhfáil i gcomhréir le hAirteagal 12(6) de Rialachán (AE) 2021/694 nó chun rannpháirtíocht soláthróirí a theorannú ar chúiseanna slándála nó gníomhaíochtaí a bhaineann go díreach le huathriail straitéiseach an Aontais, i gcomhréir le hAirteagal 18(4) den Rialachán sin.

Is in eintiteas óstach sár-ríomhaire EuroHPC a dhéanfar na ríomhairí candamacha agus na hionsamhlóirí candamacha a óstáil, sin nó i lárionad sár-ríomhaireachta a bheidh lonnaithe san Aontas.

Gan dochar d’fhoirceannadh an Chomhghnóthais, dá dtagraítear in Airteagal 23(4) de na Reachtanna, ceithre bliana ar a thúisce tar éis tástáil inghlacthachta rathúil an ríomhaire chandamaigh nó an ionsamhlóra chandamaigh arna suiteáil in eintiteas óstach, féadfar úinéireacht an ríomhaire chandamaigh nó an ionsamhlóra chandamaigh a aistriú chuig an eintiteas óstach sin, é a dhíol le heintiteas eile nó a dhíchoimisiúnú ar chinneadh an Bhoird Rialaithe agus i gcomhréir leis an gcomhaontú óstach. I gcás úinéireacht ríomhaire chandamaigh nó ionsamhlóra chandamaigh a aistriú, déanfaidh an t-eintiteas óstach luach iarmharach an tsár-ríomhaire a aistrítear a aisíoc leis an gComhghnóthas. Mura ndéantar aon aistriú úinéireachta chuig an eintiteas óstach ach má chinntear é a dhíchoimisiúnú, roinnfear na costais ábhartha go cothrom idir an Comhghnóthas agus an t-eintiteas óstach. Ní bheidh an Comhghnóthas faoi dhliteanas i leith na gcostas arna dtabhú i ndiaidh úinéireacht an ríomhaire chandamaigh nó an ionsamhlóra chandamaigh a aistriú nó i ndiaidh a dhíolta nó a dhíchoimisiúnaithe.