Airteagal 13 Scéimeanna deimhniúcháin a aithint

1.   Ní fhéadfaidh oibreoir ná grúpa oibreoirí ach scéim deimhniúcháin atá aitheanta ag an gCoimisiún trí bhíthin cinnidh a úsáid chun comhlíonadh an Rialacháin seo a léiriú. Beidh cinneadh den sórt sin bailí ar feadh tréimhse nach faide ná 5 bliana agus cuirfear ar fáil go poiblí é i gclárlann an Aontais.

2.   Tabharfaidh Ballstát fógra don Choimisiún maidir le hiarratas go n-aithneofaí scéim deimhniúcháin phoiblí.

Tabharfaidh ionadaí dlíthiúil de chuid scéime deimhniúcháin príobháidí fógra don Choimisiún maidir le hiarratas go n-aithneofaí an scéim deimhniúcháin phríobháideach sin.

3.   Féadfaidh an Coimisiún, tar éis dul i gcomhairle go hiomchuí leis an scéim deimhniúcháin, cinneadh lena n-aithnítear an scéim sin de bhun mhír 1 den Airteagal seo a aisghairm i gcás nach gcuireann an scéim deimhniúcháin na rialacha a leagtar amach sna gníomhartha cur chun feidhme dá dtagraítear in Airteagal 11(5) chun feidhme.

I gcás ina n-ardaíonn Ballstát nó aon pháirtí leasmhar eile ábhair imní a bhfuil bunús cuí leo nach n-oibríonn scéim deimhniúcháin i gcomhréir leis na rialacha a leagtar amach sna gníomhartha cur chun feidhme dá dtagraítear in Airteagal 11(5) atá mar bhonn do chinntí faoi mhír 1 den Airteagal seo, déanfaidh an Coimisiún an cás a imscrúdú agus déanfaidh sé gníomhaíocht iomchuí, lena n-áirítear an cinneadh ábhartha a aisghairm.

4.   Glacfaidh an Coimisiún gníomhartha cur chun feidhme lena leagtar amach struchtúr, formáid agus mionsonraí teicniúla na bpróiseas aitheantais agus fógartha dá dtagraítear i míreanna 1 agus 2 den Airteagal seo. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 17.