Airteagal 76 Rochtain ar chlárlanna nó bunachair sonraí trasteorann sonraí leictreonacha sláinte le haghaidh úsáid thánaisteach

1.   I gcás clárlanna agus bunachair sonraí trasteorann, beidh an comhlacht rochtana sonraí sláinte lena bhfuil an sealbhóir sonraí sláinte don chlárlann shonrach nó don bhunachar sonraí sonrach cláraithe inniúil chun cinneadh a dhéanamh maidir le hiarratais ar rochtain ar shonraí sláinte chun rochtain ar shonraí leictreonacha sláinte a chur ar fáil de bhun cead sonraí. I gcás ina mbeidh rialaitheoirí comhpháirteacha ag clárlanna nó bunachair sonraí den sórt sin, is é comhlacht rochtana sonraí sláinte an Bhallstáit ina bhfuil ceann de na rialaitheoirí comhpháirteacha bunaithe an comhlacht rochtana sonraí a dhéanann cinneadh maidir leis na hiarratais ar rochtain ar shonraí sláinte atá le húsáid chun rochtain a thabhairt ar shonraí leictreonacha sláinte.

2.   I gcás ina ndéanfaidh clárlanna nó bunachair sonraí ó roinnt Ballstát iad féin a eagrú i líonra aonair clárlann nó bunachar sonraí ar leibhéal an Aontais, féadfaidh na clárlanna gaolmhara nó na bunachair sonraí ghaolmhara comhordaitheoir a ainmniú chun soláthar sonraí ó líonra na gclárlann nó líonra na mbunachar sonraí le haghaidh úsáid thánaisteach a áirithiú. Beidh comhlacht rochtana sonraí sláinte an Bhallstáit ina bhfuil comhordaitheoir an líonra bunaithe inniúil chun cinneadh a dhéanamh maidir leis na hiarratais ar rochtain ar shonraí sláinte atá le húsáid chun rochtain a chur ar fáil ar shonraí leictreonacha sláinte le haghaidh líonra na gclárlann nó na mbunachar sonraí.