Airteagal 3 Oibleagáidí ginearálta

1.   Áiritheoidh oibreoirí eacnamaíocha, iompróirí de chuid an Aontais agus iompróirí nach iompróirí de chuid an Aontais iad go seachnófar caillteanas. I gcás ina dtarlaíonn caillteanas, déanfaidh oibreoirí eacnamaíocha, iompróirí de chuid an Aontais agus iompróirí nach iompróirí de chuid an Aontais iad gníomhaíocht láithreach chun an caillteanas sin a imshrianadh agus a ghlanadh i gcomhréir le cleachtais atá inbhuanaithe ó thaobh an chomhshaoil de.

2.   Tabharfaidh na hoibreoirí eacnamaíocha fógra d’údaráis inniúla an Bhallstáit faoi gach suiteáil atá lonnaithe sa Bhallstát sin a oibríonn siad nó a rialaíonn siad, nó, i gcás inarb infheidhme, ar tarmligeadh cumhacht eacnamaíoch chinntitheach ar a feidhmiú teicniúil chucu. I gcás gach suiteála ar tugadh fógra ina leith, sonróidh siad cé acu a láimhseálann nó nach láimhseálann an tsuiteáil cainníochtaí de mhillíní plaisteacha atá cothrom leis an tairseach 1 500 tona in aghaidh na bliana, nó atá faoina bun nó os a cionn. Sula n-iompraítear millíní plaisteacha san Aontas den chéad uair, tabharfaidh iompróirí de chuid an Aontais nó ionadaithe údaraithe dá dtagraítear in Airteagal 4, mar is infheidhme, fógra d’údaráis inniúla an Bhallstáit ina bhfuil an t-iompróir de chuid an Aontais nó an t-ionadaí údaraithe bunaithe, faoin mbaint atá acu le millíní plaisteacha a iompar san Aontas agus faoin modh iompair atá á úsáid acu chuige.

3.   Tabharfaidh oibreoirí eacnamaíocha, iompróirí de chuid an Aontais agus ionadaithe údaraithe fógra do na húdaráis inniúla dá dtagraítear i mír 2 faoi aon athrú suntasach i ndáil leis an méid ar tugadh fógra faoi roimhe sin i gcomhréir le mír 2 maidir leis na suiteálacha agus na gníomhaíochtaí i dtrácht a bhaineann leis na millíní plaisteacha a láimhseáil agus a iompar, lena n-áirítear aon chás ina ndúntar suiteáil atá ann cheana, ina scoirtear de ghníomhaíochtaí iompair nó nach bhfuil siad faoi réir an Rialacháin seo a thuilleadh, agus faoi aon athrú sna cainníochtaí de mhillíní plaisteacha a bhíonn á láimhseáil agus atá ábhartha i dtaobh chur i bhfeidhm na n-oibleagáidí a bhaineann leis na tairseacha.