Airteagal 10
Oibleagáid chun faisnéis a sholáthar
Gan dochar do Rialachán (CE) Uimh. 1272/2008 ó Pharlaimint na hEorpa agus ón gComhairle (20) agus Rialachán (CE) Uimh. 1907/2006, soláthróidh aon mhonaróir, allmhaireoir, úsáideoir iartheachtach nó dáileoir a chuireann millíní plaisteacha ar an margadh ar micreacháithníní polaiméire sintéisí iad faoi iontráil 78, mír 7, d’Iarscríbhinn XVII a ghabhann le Rialachán (CE) Uimh. 1907/2006, soláthróidh sé an fhaisnéis dá dtagraítear in Iarscríbhinn V a ghabhann leis an Rialachán seo ar an lipéad, ar an bpacáistíocht, ar an mbileog phacáiste, nó ar an mbileog sonraí sábháilteachta. Beidh an fhaisnéis infheicthe go soiléir, inléite agus doscriosta. Is i dteangacha oifigiúla na mBallstát ina gcuirtear na millíní plaisteacha ar an margadh a bheidh an téacs, mura bhforálann na Ballstáit lena mbaineann a mhalairt. Féadfaidh an monaróir, an t-allmhaireoir, an t-úsáideoir iartheachtach nó an dáileoir an fhaisnéis sin a sholáthar agus na hoibleagáidí de bhun iontráil 78, mír 7, d’Iarscríbhinn XVII a ghabhann le Rialachán (CE) Uimh. 1907/2006 á gcomhlíonadh aige.