Airteagal 23 Na modheolaíochtaí, na samhlacha agus na príomhthoimhdí rátála a úsáidtear i ngníomhaíochtaí rátála ESG a nochtadh don phobal

1.   Nochtfaidh soláthraithe rátála ESG ar a suíomh gréasáin, ar a laghad, na modheolaíochtaí, na samhlacha agus na príomhthoimhdí rátála a úsáideann siad ina ngníomhaíochtaí rátála ESG, lena n-áirítear an fhaisnéis dá dtagraítear i bpointe (d) d’Iarscríbhinn I agus pointe 1 d’Iarscríbhinn III. Déanfar nochtaí den sórt sin ar bhealach soiléir agus trédhearcach agus déanfar iad a shainaithint i roinn ar leith de shuíomh gréasáin an tsoláthraí rátála ESG.

Soláthróidh an soláthraí rátála ESG an fhaisnéis dá dtagraítear i bpointe 1 d’Iarscríbhinn III ar a dhéanaí tráth a thosaíonn sé ag eisiúint rátálacha ESG.

2.   Soláthrófar rátálacha ar leithligh E, S agus G seachas rátáil ESG aonair lena gcomhiomlánaítear fachtóirí E, S agus G. Soláthróidh soláthraithe rátála ESG na nochtaí dá dtagraítear san Airteagal seo agus in Airteagal 24 ar leithligh i leith gach fachtóra.

3.   De mhaolú ar mhír 2 den Airteagal seo, féadfaidh soláthraithe rátála ESG rátáil ESG aonair a sholáthar lena gcomhiomlánaítear fachtóirí E, S agus G má sholáthraíonn siad, gan dochar d’oibleagáidí breise maidir le nochtadh faoin Rialachán seo, an fhaisnéis dá dtagraítear i bpointe (h) de phointe 1 d’Iarscríbhinn III.

4.   Forbróidh ESMA dréachtchaighdeáin theicniúla rialála chun na heilimintí atá le nochtadh i gcomhréir le mír 1, an chéad fhomhír, a shonrú tuilleadh. Ní áireofar sna heilimintí sin aon cheanglais bhreise maidir le nochtadh seachas na ceanglais sin a liostaítear i bpointe 1 d’Iarscríbhinn III.

Cuirfidh ESMA na dréachtchaighdeáin theicniúla rialála dá dtagraítear sa chéad fhomhír den mhír seo faoi bhráid an Choimisiúin faoin 2 Deireadh Fómhair 2025.

Tarmligtear an chumhacht chuig an gCoimisiún chun an Rialachán seo a fhorlíonadh trí na caighdeáin theicniúla rialála dá dtagraítear sa chéad fhomhír den mhír seo a ghlacadh i gcomhréir leis an nós imeachta a leagtar síos in Airteagail 10 go 14 de Rialachán (AE) Uimh. 1095/2010.

5.   Féadfaidh ESMA dréachtchaighdeáin theicniúla cur chun feidhme a fhorbairt chun na caighdeáin sonraí, na formáidí agus na teimpléid a shonrú a úsáidfidh soláthraithe rátála ESG chun an fhaisnéis dá dtagraítear i mír 1 a chur i láthair.

Cuirfidh ESMA na dréachtchaighdeáin theicniúla rialála dá dtagraítear sa chéad fhomhír den mhír seo faoi bhráid an Choimisiúin.

Tugtar an chumhacht don Choimisiún chun na caighdeáin theicniúla cur chun feidhme sin dá dtagraítear sa chéad fhomhír den mhír seo a ghlacadh i gcomhréir leis an nós imeachta a leagtar síos in Airteagal 15 de Rialachán (AE) Uimh. 1095/2010.