IARSCRÍBHINN II DOICIMÉAD CLÁRÚCHÁIN

IARSCRÍBHINN II

DOICIMÉAD CLÁRÚCHÁIN

I.   Cuspóir, daoine atá freagrach, faisnéis tríú páirtí, tuarascálacha ó shaineolaithe agus formheas an údaráis inniúil

Is é is cuspóir don roinn seo faisnéis a sholáthar faoi na daoine atá freagrach as inneachar an doiciméid clárúcháin agus infheisteoirí a chur ar a gcompord maidir le cruinneas na faisnéise a nochtar sa réamheolaire. Thairis sin, soláthraítear faisnéis sa roinn seo maidir le bunús dlí an réamheolaire agus maidir lena fhormheas ag an údarás inniúil.

II.   Straitéis, feidhmíocht agus an timpeallacht ghnó

Is é is cuspóir don roinn seo faisnéis a nochtadh maidir le céannacht an eisitheora, a ghnó, a straitéis agus a chuspóirí. Tríd an roinn seo a léamh, ba cheart tuiscint shoiléir a bheith ag infheisteoirí ar ghníomhaíochtaí an eisitheora agus ar na príomhthreochtaí a dhéanann difear dá fheidhmíocht, dá struchtúr eagraíochtúil agus dá infheistíochtaí ábhartha. I gcás inarb infheidhme, nochtfaidh an t-eisitheoir sa roinn seo meastacháin nó réamhaisnéisí ar a fheidhmíocht amach anseo.

III.   Tuarascáil bhainistíochta, lena n-áirítear tuairisciú inbhuanaitheachta (urrúis chothromais amháin)

Is é is cuspóir don roinn seo an fhaisnéis a leagtar amach sna tuarascálacha bainistíochta agus sna tuarascálacha bainistíochta comhdhlúite dá dtagraítear in Airteagal 4 de Threoir 2004/109/CE, i gcás inarb infheidhme, agus i gCaibidlí 5 agus 6 de Threoir 2013/34/AE a chorprú trí thagairt nó a áireamh le haghaidh na dtréimhsí a chumhdaítear leis an bhfaisnéis airgeadais stairiúil lena n-áirítear, i gcás inarb infheidhme, an tuairisciú inbhuanaitheachta.

IV.   Tosca riosca

Is é is cuspóir don roinn seo tuairisc a thabhairt ar na príomhrioscaí a bhíonn ag an eisitheoir agus ar a dtionchar ar fheidhmíocht an eisitheora amach anseo.

V.   Rialachas corparáideach

Míneofar sa roinn seo riarachán an eisitheora agus ról na ndaoine a bhfuil baint acu le bainistiú na cuideachta. I gcás urrúis chothromais, soláthrófar inti faisnéis freisin faoi chúlra na bainistíochta sinsearaí, faoina luach saothair agus faoin nasc a d’fhéadfadh a bheith aige le feidhmíocht an eisitheora.

VI.   Faisnéis airgeadais

Is é is cuspóir don roinn seo na ráitis airgeadais agus na príomhtháscairí feidhmíochta a shonrú, ráitis is gá a chur san áireamh sa doiciméad lena gcumhdaítear an 2 bhliain airgeadais is déanaí (i gcás urrúis chothromais) nó an bhliain airgeadais deiridh (i gcás urrúis neamhchothromais) nó cibé tréimhse is giorra ar lena linn a bhí an t-eisitheoir ag feidhmiú. Na prionsabail chuntasaíochta agus iniúchóireachta a ghlacfar lena n-úsáid chun na ráitis airgeadais a ullmhú agus iniúchóireacht a dhéanamh orthu, cinnfear iad i gcomhréir le caighdeáin idirnáisiúnta chuntasaíochta agus iniúchóireachta.

VII.   Faisnéis faoin scairshealbhóir agus faoin sealbhóir urrús

Soláthrófar sa roinn seo faisnéis maidir le mór-scairshealbhóirí an eisitheora, maidir le coinbhleachtaí leasa a d’fhéadfadh a bheith ann idir an bhainistíocht shinsearach agus an t-eisitheoir, scairchaipiteal an eisitheora chomh maith le faisnéis maidir le hidirbhearta páirtí ghaolmhair, imeachtaí dlíthiúla agus eadrána agus conarthaí ábhartha.

VIII.   Beartas díbhinní (urrúis chothromais amháin)

Tuairisc ar bheartas an eisitheora maidir le dáileacháin díbhinne agus aon srian reatha orthu, agus maidir le hathcheannaigh scaireanna.

IX.   Na doiciméid atá ar fáil

Is é is cuspóir don roinn seo faisnéis a sholáthar maidir leis na doiciméid a bheidh ar fáil le cigireacht a dhéanamh orthu agus maidir leis an suíomh gréasáin inar féidir cigireacht a dhéanamh orthu.