Airteagal 31 Limistéar muirearaithe agus rátaí aonaid

1.   Socrófar rátaí aonaid in aghaidh na bliana féilire agus le haghaidh gach limistéir mhuirearaithe ar bhonn na gcostas a chinntear agus na réamhaisnéisí tráchta a bhunaítear sna pleananna feidhmíochta chomh maith le coigeartuithe infheidhme a eascraíonn as na blianta roimhe agus as ioncaim eile, go háirithe cistí poiblí, lena n-áirítear tacaíocht airgeadais ó chláir chúnaimh an Aontais.

2.   Gan dochar d’Airteagal 30(5), saineoidh na Ballstáit na limistéir mhuirearaithe le haghaidh seirbhísí aerloingseoireachta roimh thús tréimhse tagartha agus sainaithneoidh siad na soláthraithe seirbhísí aerthráchta a thagann faoi raon feidhme gach limistéir mhuirearaithe. Glacfaidh an Coimisiún gníomh cur chun feidhme chun na coinníollacha a shainiú faoinar féidir leis na Ballstáit limistéar muirearaithe críochfoirt nua a mhodhnú nó a bhunú le linn tréimhse tagartha. Déanfar an gníomh cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 48(3).

3.   Is iad na Ballstáit a shocróidh na rátaí aonaid, faoi réir a bhfíoraithe ag an gCoimisiún go gcomhlíonann siad Airteagal 29, Airteagal 30 agus an tAirteagal seo.

I gcás ina bhfaigheann an Coimisiún nach gcomhlíonann ráta aonaid na ceanglais sin, déanfaidh an Ballstát lena mbaineann athbhreithniú ar an ráta aonaid dá réir, agus leasófar é chun na ceanglais sin a chomhlíonadh.

Foilseofar na rátaí aonaid.

4.   Féadfaidh na Ballstáit limistéir mhuirearaithe choiteanna a shainiú agus, sna cásanna sin, socróidh siad na rátaí aonaid coiteanna do na limistéir mhuirearaithe sin.