6.2 Informazzjoni dwar il-kejl, il-valutazzjoni u l-aggregazzjoni tar-riskji

Dwar il-kejl, il-valutazzjoni u l-metodoloġiji tal-aggregazzjoni tar-riskji użati fl-ICAAP, l-awtoritajiet kompetenti għandhom jiżguraw li mill-istituzzjonijiet jirċievu dan li ġej:

• a. deskrizzjoni ġenerali tal-karatteristiċi prinċipali tal-metodoloġiji u tal-mudelli ta' kwantifikazzjoni/kejl, inkluż il-metriċi, is-suppożizzjonijiet u l-parametri użati (eż. intervalli ta' kunfidenza, perjodi ta' parteċipazzjoni eċċ.) għall-kategoriji u s-subkategoriji ta' riskju kollha li jintużaw għall-approvazzjoni tal-metodoloġiji u l-mudelli mill-korp tal-ġestjoni tal-istituzzjoni;
• b. speċifikazzjoni tad-data attwali użata, inkluż spjegazzjoni ta' kif id-data użata tirrifletti l-kamp ta' applikazzjoni tal-entitajiet tal-gruppi koperti mill-ICAAP, inkluż it-tul tas-serje taż-żmien;
• c. deskrizzjoni tad-differenzi prinċipali bejn il-metodoloġiji u l-mudelli tal-kwantifikazzjoni/tal-kejl użati għall-iskopijiet tal-ICAAP u dawk użati għall-kalkolu tar-rekwiżiti minimi tal-fondi proprji għar-riskji koperti mir-Regolament (UE) Nru 575/2013 (f'każ li istituzzjoni tkun qed tuża mudelli avvanzati approvati mill-awtoritajiet kompetenti). Din id-deskrizzjoni għandha tingħata fuq bażi riskju b'riskju u tinkludi, inter alia , informazzjoni dwar l-użu differenti tal-minimi tranżitorji ta' Basel I (Artikolu 500 tar-Regolament (UE) Nru 575/2013), supożizzjonijiet differenti rigward il-parametri ta' riskju, intervalli kunfidenzjali eċċ.;
• d. deskrizzjoni tal-approċċ għall-aggregazzjoni tal-istimi tal-kapital intern għall-entitajiet u l-kategoriji ta' riskju koperti, inkluż l-approċċ ta' benefiċċji ta' diversifikazzjoni intrariskju u inter-riskju u/jew konċentrazzjonijiet fejn ikkunsidrati mill-metodoloġija tal-istituzzjoni.

6.2.2 Dokumentazzjoni operazzjonali

Dwar l-evidenzjar tal-implimentazzjoni tal-kejl tar-riskji tal-ICAAP, il-metodoloġiji tal-valutazzjoni u tal-aggregazzjoni, l-awtoritajiet kompetenti għandhom jiżguraw li jirċievu dan li ġej mingħand l-istituzzjonijiet:

• a. stimi tal-kapital intern biex ikopru l-kategoriji u s-subkategoriji ta' riskju kollha, maqsumin skont il-kategorija u s-subkategorija tar-riskju koperti mill-ICAAP. Fejn l-istituzzjonijiet jasserixxu li ċerti kategoriji jew subkategoriji tar-riskju koperti mill-ICAAP huma koperti aħjar permezz ta' miżuri ta' mitigazzjoni kwalitattivi milli bl-allokazzjoni tal-kapital intern, dan għandu jiġi spjegat bix-xieraq;
• b. ir-riżultati tal-kalkolu tal-istimi tal-kapital intern, kif speċifikat hawn fuq għall-kategoriji u s-subkategoriji tar-riskji materjal kollha koperti mill-ICAAP fuq bażi ta' riskju b'riskju. Fejn ċerti subkategoriji ta' riskju jiġu identifikati bħala materjali iżda l-metodoloġiji tal-kalkolu applikati ma ppermettewx il-kalkolu tal-istima tal-kapital interna fil-livell ta' granularità meħtieġ u għal dik ir-raġuni, dawn l-istimi ġew inkorporati bħala parti mill-istima tal-kapital interna għal kategorija ta' riskju rispettiva, l-istituzzjonijiet għandhom jispjegaw kif dawn is-subkategoriji attwalment ġew inklużi fil-kalkoli (eż. xi subkategorija tar-riskju ġiet identifikata bħala materjali, iżda l-istituzzjoni mhix kapaċi tipprovdi stima tal-kapital intern għal dawn ir-riskji u minflok tinkludi kopertura ta' dan ir-riskju fl-istima tal-kapital għall-kategorija ta' riskju prinċipali; f'dak il-każ, l-awtorità kompetenti għandha tiżgura li l-istituzzjoni tispjega kif dan ir-riskju intuża fil-kategorija ta' riskju prinċipali);
• c. minbarra l-informazzjoni riskju b'riskju speċifikata hawn fuq, ir-riżultati tal-aggregazzjoni tal-istimi tal-kapital intern għall-entitajiet u l-kategoriji ta' riskju, inkluż għall-effetti ta' benefiċċji u/jew konċentrazzjonijiet ta' diversifikazzjoni ta' intrariskju u inter-riskju, fejn dawn l-aspetti qed jitqiesu mill-metodoloġija applikata.