Linji Gwida Finali (JC 2019 81)

5.1 Is-superviżur ewlieni għandu dejjem jistieden lill-awtoritajiet li ġejjin biex jipparteċipaw fil-kulleġġ AML/CFT bħala membri permanenti:

• (a) l-awtoritajiet kompetenti kollha responsabbli għas-superviżjoni AML/CFT tal-istabbilimenti transkonfinali kollha tad-ditta li topera fuq bażi transkonfinali;
• (b) l-awtoritajiet kompetenti responsabbli għas-superviżjoni AML/CFT tal-istabbilimenti kollha tal-UE;
• (c) l-ASE xierqa (l-EBA, l-ESMA jew l-EIOPA).

5.2 Is-superviżur ewlieni għandu jkun responsabbli għall-identifikazzjoni tal-membri permanenti msemmija fil-Linja Gwida 5.1 u jirreġistra l-ismijiet u d-dettalji ta’ kuntatt tagħhom fil-lista ta’ kuntatt tal-kulleġġ AML/CFT rilevanti f’konformità mal-Linja Gwida 6. Sabiex jiġu identifikati l-awtoritajiet kompetenti, is-superviżur ewlieni jista’ jirreferi għar-reġistru tal-awtoritajiet kompetenti ppubblikati mill-Kummissjoni Ewropea f’konformità mal-Artikolu 48(1a) tad-Direttiva (UE) 2015/849.

5.3 Mal-wasla tal-istedina biex jipparteċipaw fil-kulleġġ AML/CFT, il-membri permanenti għandhom jikkonfermaw il-parteċipazzjoni tagħhom bil-miktub lis-superviżur ewlieni fi żmien 10 ijiem ta’ xogħol.

5.4 Is-superviżur ewlieni għandu jistieden biex jipparteċipaw fil-kulleġġ AML/CFT bħala osservaturi, is-superviżuri prudenzjali ta’ ditti li joperaw fuq bażi transkonfinali, l-istabbilimenti transkonfinali u tal-UE u l-awtoritajiet AML/CFT ta’ pajjiżi terzi fejn joperaw stabbilimenti transkonfinali. Huwa jista’ wkoll jistieden is-superviżuri prudenzjali ta’ pajjiżi terzi fejn joperaw stabbilimenti transkonfinali u l-Unità tal-Intelligence Finanzjarja (UIF) tal-Istat Membru fejn jinsab is-superviżur ewlieni biex jipparteċipaw.

5.5 Is-superviżur ewlieni għandu jkun responsabbli biex jidentifika l-osservaturi msemmija fil-Linja Gwida 5.4 u jirreġistra l-ismijiet u d-dettalji ta’ kuntatt tagħhom fil-lista ta’ kuntatt tal-kulleġġ AML/CFT rilevanti f’konformità mal-Linja Gwida 6. Sabiex jiġu identifikati l-awtoritajiet rilevanti, is-superviżur ewlieni jista’ jikkonsulta lill-awtoritajiet superviżorji Ewropej.

5.6 Meta jkun qed jiddeċiedi jekk għandux jistieden osservatur partikolari, is-superviżur ewlieni għandu jfassal lista ta’ osservaturi potenzjali skont il-Linja Gwida 5.5. Meta jagħmel dan, is-superviżur ewlieni għandu jqis il-proposti kollha li jirċievi mingħand il-membri permanenti bil-miktub fi żmien raġonevoli u l-ġustifikazzjoni tagħhom għall-istedina ta’ osservatur partikolari lill-kulleġġ AML/CFT. Sabiex jiġi propost osservatur, is-superviżur ewlieni jew il-membru permanenti li jipproponi l-istedina tal-osservatur għandhom iwettqu dan li ġej:

• (a) Valutazzjoni tal-ekwivalenza tar-reġim ta’ kunfidenzjalità applikabbli għal AML/CFT ta’ pajjiż terz jew awtorità superviżorja prudenzjali. Bħala parti minn din il-valutazzjoni, is-superviżur ewlieni jew membru permanenti jistgħu jirreferu għar-rakkomandazzjoni dwar l-ekwivalenza ta’ awtoritajiet mhux tal-UE għall-parteċipazzjoni f’kulleġġi superviżorji ppubblikati fuq is-sit web tal-EBA, li tista’ tkun kontribut importanti fil-valutazzjoni tal-ekwivalenza ġenerali tal-awtorità ta’ pajjiż terz. Barra minn hekk, id-deċiżjonijiet ta’ ekwivalenza tal-Kummissjoni Ewropea fil-qasam tad-Direttiva dwar is-Solvenza II⁴ u d-deċiżjonijiet dwar l-adegwatezza fil-qasam tal-protezzjoni tad- data jistgħu wkoll jiġu kkonsultati,⁵ kif xieraq.
• (b) Valutazzjoni tal-impatt li l-attendenza ta’ osservatur jista’ jkollha fuq il-funzjonament tal-kulleġġ AML/CFT.
• (c) Valutazzjoni tal-kapaċità u l-istat ta’ tħejjija tal-AML/CFT ta’ pajjiż terz jew tas-superviżur prudenzjali ta’ pajjiż terz li jiffirmaw ftehimiet ta’ kooperazzjoni bilaterali mal-membri permanenti kollha skont l-Artikolu 57(a)(5) tal-AMLD.

5.7 Is-superviżur ewlieni għandu jikkondividi lista ta’ osservaturi potenzjali flimkien mar-riżultat tal-valutazzjoni mwettqa skont il-Linja Gwida 5.6 mal-membri permanenti kollha tal-kulleġġ AML/CFT u l-osservaturi eżistenti.

5.8 Il-membri permanenti għandhom iqajmu kwalunkwe osservazzjoni u oġġezzjoni dwar l-osservaturi proposti li jkunu qed jiġu mistiedna jieħdu sehem fil-kulleġġ AML/CFT fi żmien l-iskadenza stabbilita mis-superviżur ewlieni. Dawn l-osservazzjonijiet u oġġezzjonijiet għandhom jiġu akkumpanjati minn raġunament bil-miktub li jistabbilixxi l-bażi għal dawn l-osservazzjonijiet u oġġezzjonijiet, u kif, fil-fehma tal-membri permanenti, il-parteċipazzjoni ta’ osservatur propost fil-kulleġġ AML/CFT jista’ jaffettwa l-proċedimenti tal-kulleġġ.

5.9 Is-superviżur ewlieni jista’ jistieden lil osservatur biex jipparteċipa fl-kulleġġ AML/CFT biss meta l-ebda membru permanenti ma joġġezzjona u fejn l-osservatur jaqbel li josserva t-termini tal-parteċipazzjoni tal-osservaturi, li għandhom jiġu abbozzati b’mod individwali mis-superviżur ewlieni, u li jkun hemm qbil dwaru mal-awtoritajiet rilevanti, fir-rigward ta’ kull osservatur.

5.10 L-EBA tista’ tiġi kkonsultata jew taġixxi fuq inizjattiva proprja biex tikkonċilja jew timmedja kwalunkwe kwistjoni li tirriżulta fir-rigward tal-istedina u l-parteċipazzjoni tal-osservaturi.

⁴ Id-Direttiva 2009/138/KE tal-Parlament Ewropew u tal-Kunsill tal-25 ta’ Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni.

⁵ Ara l-Artikolu 45(3) tar-Regolament (UE) 2016/679 jew l-Artikolu 36(3) tad-Direttiva (UE) 2016/680.

5.11 Is-superviżur ewlieni, jew fuq inizjattiva proprja jew fuq talba minn membru permanenti, jista’ jikkunsidra li jistieden parteċipanti rilevanti oħrajn biex jattendu sessjoni partikolari tal-laqgħa tal-kulleġġ AML/CFT fejn:

• (a) l-attendenza ta’ dawn il-parteċipanti tibbenefika l-kulleġġ AML/CFT; dawn il-parteċipanti jistgħu jinkludu, iżda mhumiex limitati għal, id-ditta, l-UIF minbarra l-UIF stabbilita fil-Linja Gwida 5.4, awdituri jew konsulenti;
• (b) kwistjonijiet partikolari diskussi fil-kulleġġ AML/CFT jista’ jkollhom impatt fuq ix-xogħol imwettaq mill-parteċipant mistieden; parteċipanti bħal dawn jistgħu jinkludu b’mod indikattiv awtoritajiet ta’ riżoluzzjoni, il-Bord Uniku ta’ Riżoluzzjoni jew skemi ta’ garanzija tad-depożiti

5.12 Is-superviżur ewlieni għandu jikkunsidra l-proposti kollha bil-miktub minn membri permanenti dwar il-parteċipanti potenzjali u l-ġustifikazzjoni tagħhom biex jiġu mistiedna. Is-superviżur ewlieni għandu jikkonsulta u jirċievi l-approvazzjoni mill-membri permanenti kollha qabel ma jistieden lil dawn il-parteċipanti biex jattendu sessjoni partikolari tal-laqgħa tal-kulleġġ AML/CFT, u jinforma lill-osservaturi dwar tali deċiżjoni.

5.13 Il-membri permanenti għandhom iqajmu kwalunkwe tħassib jew oġġezzjoni dwar il-parteċipanti proposti, fi żmien l-iskadenza stabbilita mis-superviżur ewlieni u għandhom jappoġġjawhom b’raġunament bil-miktub li jistabbilixxi l-bażi għal dawn il-punti ta’ tħassib jew oġġezzjonijiet. Linja Gwida 6: Listi ta’ kuntatti

6.1 Is-superviżur ewlieni għandu jżomm lista ta’ kuntatti tal-membri permanenti u l-osservaturi kollha billi jimla mudell mehmuż mal-ftehim dwar il-kooperazzjoni u l-iskambju ta’ informazzjoni fl-Anness II u jeżaminah b’mod regolari.

6.2 Is-superviżur ewlieni għandu jaqsam il-lista kkompilata skont il-Linja Gwida 6.1 mal-membri permanenti u l-osservaturi kollha.

6.3 Il-membri permanenti u l-osservaturi għandhom jipprovdu d-dettalji ta’ kuntatt tagħhom lis-superviżur ewlieni u għandhom jinfurmawh b’kull tibdil mingħajr dewmien żejjed.

Linja Gwida 7: Laqgħat tal-kulleġġ AML/CFT

7.1 Is-superviżur ewlieni, f’konsultazzjoni mal-membri permanenti, għandu jiddetermina l-forma u l-frekwenza tal-laqgħat tal-kulleġġ AML/CFT/CFT, filwaqt li tal-inqas iqis il-fatturi li ġejjin:

• (a) il-valutazzjoni tas-superviżur ewlieni tar-riskju ML/TF assoċjat mad-ditta u l-istabbilimenti transkonfinali tagħha jew l-istabbilimenti tal-UE li għalihom huwa stabbilit il-kulleġġ AML/CFT, li s-superviżur ewlieni jkun iddetermina skont il-Linji Gwida dwar is-Superviżjoni bbażata fuq ir-Riskju tal-ASE u l-Linji Gwida dwar il-Fatturi tar-Riskju;
• (b) il-fehmiet tal-membri permanenti;
• (c) l-urġenza u l-puntwalità tal-kwistjoni;
• (d) id-disponibbiltà ta’ membri permanenti;
• (e) l-impatt fuq l-effettività u l-funzjonament tal-kulleġġ AML/CFT; u
• (f) kwalunkwe tibdil sinifikanti għal-livell ta’ riskju ML/TF assoċjat mad-ditti jew l-istabbilimenti transkonfinali jew tal-UE tagħhom li għalihom huwa stabbilit il-kulleġġ AML/CFT.

7.2 L-ewwel laqgħa ta’ kwalunkwe kulleġġ AML/CFT li jkun għadu kif ġie stabbilit għandha tkun laqgħa fiżika, sakemm il-membri permanenti u s-superviżur ewlieni ma jaqblux li tkun xierqa forma differenti għal-laqgħa, filwaqt li jitqiesu l-fatturi stabbiliti fil-punti (a) sa (e) tal-Linja Gwida 7.1 ta’ hawn fuq.

7.3 Meta s-superviżur ewlieni jiddetermina, wara li jqis il-fehmiet espressi mill-membri permanenti, li d-ditta li topera fuq bażi transkonfinali jew l-istabbilimenti tal-UE tippreżenta riskju ML/TF għoli, is-superviżur ewlieni għandu jsejjaħ mill-inqas laqgħa waħda fiżika tal-kulleġġ AML/CFT kull sena, sakemm il-membri permanenti ma jaqblux dwar frekwenza jew forma differenti tal-laqgħa, filwaqt li jitqiesu l-fatturi stipulati fil-Linja Gwida 7.1.

7.4 Sa fejn dan ikun rilevanti u possibbli, is-superviżur ewlieni, f’konsultazzjoni mal-membri permanenti, għandu jorganizza laqgħa fiżika tal-kulleġġ AML/CFT immedjatament qabel, wara jew fl-istess ħin tal-laqgħa tal-kulleġġ tas-superviżuri prudenzjali biex jiffaċilita l-iskambju ta’ informazzjoni bejn l-awtoritajiet kompetenti u s-superviżuri prudenzjali.

7.5 Fil-każijiet kollha mhux indirizzati fil-Linja Gwida 7.3, is-superviżur ewlieni għandu, f’konsultazzjoni mal-membri permanenti, jaqbel dwar il-frekwenza jew il-forma tal-laqgħa, filwaqt li jitqiesu l-fatturi stipulati fil-Linja Gwida 7.1.

7.6 Is-superviżur ewlieni għandu jiżgura li l-laqgħat skedati tal-kulleġġ AML/CFT jinkludu mill-inqas:

• (a) skambju ta’ informazzjoni dwar id-ditta li topera fuq bażi transkonfinali u l-istabbilimenti transkonfinali tagħha jew l-istabbilimenti tal-UE, inklużi:
• (i) valutazzjoni tal-membri permanenti tal-profil tar-riskju ML/TF tad-ditta li topera fuq bażi transkonfinali jew l-istabbilimenti tal-UE;
• (ii) twissijiet bikrija ta’ riskji ML/TF emerġenti;
• (iii) riskji ML/TF stabbiliti u sejbiet superviżorji usa’ (jew sejbiet provviżorji fejn ikun ġie identifikat ksur serju) relatati mal-politiki u l-proċeduri AML/CFT, inkluża l-applikazzjoni ta’ politiki u proċeduri tal-grupp kollu, mid-ditta li topera fuq bażi transkonfinali jew stabbilimenti tal-UE, inklużi numru u analiżi ta’ rapporti ta’ tranżazzjonijiet suspettużi ppreżentati, fejn tali informazzjoni tkun disponibbli;
• (iv) azzjonijiet ta’ superviżjoni AML/CFT ippjanati jew reċentement imlestija inklużi spezzjonijiet fuq il-post u mhux fuq il-post;
• (v) sanzjonijiet jew azzjonijiet korrettivi oħrajn jew miżuri li tqiesu jew li ġew imposti għal ksur tal-obbligi AML/CFT;
• (vi) miżuri oħrajn superviżorji jew ta’ infurzar, inklużi miżuri applikati minn superviżuri prudenzjali, fejn rilevanti, bħal żieda kapitali bbażata fuq ir-riskju ML/TF, jew miżuri u deċiżjonijiet meħuda abbażi tar-riskju ML/TF fir-rigward tal-awtorizzazzjoni, il-parteċipazzjonijiet kwalifikanti, il-governanza, il-kontrolli interni, u l-adegwatezza u l-proprjetà;
• (b) kunsiderazzjoni tal-ħtieġa għal approċċ komuni u azzjonijiet ikkoordinati skont il-Linji Gwida 12 u 13.