1. L-awtorità ta’ riżoluzzjoni tista’ teħtieġ lill-membri tal-ikklirjar mhux inadempjenti sabiex jagħmlu kontribuzzjoni fi flus lis-CCP sa darbtejn l-ammont ekwivalenti għall-kontribuzzjoni tagħhom għall-fond tal-inadempjenza tas-CCP. Dan l-obbligu li ssir kontribuzzjoni fi flus kontanti għandu jiġi inkluż ukoll fir-regoli tas-CCP u arranġamenti kuntrattwali oħrajn bħala sejħa għal flus għal riżoluzzjoni riżervata għall-awtorità ta’ riżoluzzjoni li tieħu azzjoni ta’ riżoluzzjoni. Meta l-awtorità ta’ riżoluzzjoni titlob ammont li jeċċedi l-kontribuzzjoni għall-fond tal-inadempjenza, hija għandha tagħmel dan wara li tivvaluta l-impatt ta’ din l-għodda fuq il-membri tal-ikklirjar mhux inadempjenti u l-istabbiltà finanzjarja tal-Istati Membri, b’kooperazzjoni mal-awtoritajiet ta’ riżoluzzjoni tal-membri tal-ikklirjar mhux inadempjenti.
Meta s-CCP topera diversi fondi tal-inadempjenza u l-għodda tiġi applikata biex jiġi trattat event ta’ inadempjenza, l-ammont tal-kontribuzzjoni fi flus imsemmija fl-ewwel subparagrafu għandu jirreferi għall-kontribuzzjoni tal-membru tal-ikklirjar għall-fond tal-inadempjenza tas-servizz tal-ikklirjar affettwat jew tal-klassi tal-assi affettwata.
Meta s-CCP topera diversi fondi tal-inadempjenza u l-għodda tiġi applikata biex jiġi trattat event mhux ta’ inadempjenza, l-ammont tal-kontribuzzjoni fi flus imsemmija fl-ewwel subparagrafu għandu jirreferi għas-somma tal-kontribuzzjonijiet tal-membru tal-ikklirjar għall-fondi tal-inadempjenza kollha tas-CCP.
L-awtorità ta’ riżoluzzjoni tista’ teżerċita s-sejħa għal flus f’riżoluzzjoni, irrispettivament minn jekk ikunux ġew eżawriti l-obbligi kuntrattwali kollha li jeħtieġu li jsiru kontribuzzjonijiet fi flus minn membri tal-ikklirjar mhux inadempjenti.
L-awtorità ta’ riżoluzzjoni għandha tiddetermina l-ammont ta’ kontribuzzjoni fi flus ta’ kull membru tal-ikklirjar mhux inadempjenti b’mod proporzjonali għall-kontribuzzjoni tiegħu għall-fond tal-inadempjenza sal-limitu msemmi fl-ewwel subparagrafu.
L-awtorità ta’ riżoluzzjoni tista’ titlob lis-CCP tirrimborża lill-membri tal-ikklirjar l-ammont eċċessiv possibbli ta’ sejħa għal flus għal riżoluzzjoni fejn il-livell tas-sejħa għal flus għal riżoluzzjoni applikata bbażata fuq valutazzjoni proviżorja skont l-Artikolu 26(1) jinstab li jaqbeż il-livell meħtieġ ibbażat fuq il-valutazzjoni definittiva msemmija fl-Artikolu 26(2).