Artikolu 5 Talbiet ad-hoc ta' informazzjoni ta' awtoritajiet kompetenti

1.   Talbiet għal informazzjoni li mhix meħtieġa biex tiġi skambjata skont ir-Regolament Delegat tal-Kummissjoni (UE) Nru 524/2014 għandhom jiġu trażmessi bil-miktub jew b'forma elettronika lill-persuni ta' kuntatt rilevanti identifikati fil-lista ta' kuntatt imsemmija fl- Artikolu 3(1) ta' dan ir-Regolament.

2.   Awtorità kompetenti li tagħmel talba kif imsemmi fil-paragrafu 1 għandha tispjega kif l-informazzjoni x'aktarx tiffaċilita s-superviżjoni jew il-monitoraġġ ta' istituzzjoni, l-eżami tal-kundizzjonijiet għall-awtorizzazzjoni ta' istituzzjoni jew il-protezzjoni tal-istabbiltà tas-sistema finanzjarja. Dik l-awtorità kompetenti għandha tispeċifika żmien raġonevoli sa meta trid tiġi pprovduta reazzjoni filwaqt li titqies in-natura u l-urġenza tat-talba u l-informazzjoni mitluba.

3.   Awtorità kompetenti li tirċievi talba kif imsemmi fil-paragrafu 1 għandha tipprovdi l-informazzjoni mingħajr dewmien żejjed u għandha tagħmel kull sforz biex twieġeb saż-żmien indikat fit-talba. Jekk l-awtorità kompetenti ma tkunx tista' twieġeb saż-żmien indikat fit-talba, għandha tinforma lill-awtorità kompetenti li tagħmel it-talba mingħajr dewmien żejjed taż-żmien li fih trid tipprovdi l-informazzjoni.

Jekk l-informazzjoni mitluba ma tkunx disponibbli, l-awtorità kompetenti li tirċievi talba msemmija fil-paragrafu 1 għandha tinforma kif xieraq lill-awtorità kompetenti li tagħmel it-talba.