Artikolu 6 Applikazzjoni għal awtorizzazzjoni biex wieħed jopera fl-Unjoni

1.   Il-persuni ġuridiċi stabbiliti fl-Unjoni li jixtiequ joperaw fl-Unjoni skont l-Artikolu 2(1), il-punt (a), għandhom japplikaw mal-ESMA għall-awtorizzazzjoni.

2.   Applikazzjoni għall-awtorizzazzjoni kif imsemmi fil-paragrafu 1 għandu jkun fiha l-informazzjoni kollha elenkata fl-Anness I ta’ dan ir-Regolament u għandha tiġi sottomessa bi kwalunkwe waħda mil-lingwi uffiċjali tal-Unjoni. Ir-Regolament tal-Kunsill Nru 1 (37) għandu japplika mutatis mutandis għal kwalunkwe komunikazzjoni oħra bejn l-ESMA u l-fornituri ta’ klassifikazzjonijiet ESG u l-persunal tagħhom.

3.   L-ESMA għandha tiżviluppa abbozzi ta’ standards tekniċi regolatorji biex tispeċifika aktar l-informazzjoni elenkata fl-Anness I.

L-ESMA għandha tissottometti l-abbozzi ta’ standards tekniċi regolatorji msemmija fl-ewwel subparagrafu lill-Kummissjoni sat-2 ta’ Ottubru 2025.

Il-Kummissjoni għandha s-setgħa li tissuplimenta dan ir-Regolament billi tadotta l-istandards tekniċi regolatorji msemmija fl-ewwel subparagrafu ta’ dan il-paragrafu f’konformità mal-proċedura stabbilita fl-Artikoli 10 sa 14 tar-Regolament (UE) Nru 1095/2010.

4.   Fornitur awtorizzat ta’ klassifikazzjonijiet ESG għandu jikkonforma f’kull ħin mar-rekwiżiti skont liema l-awtorizzazzjoni inizjali tkun ingħatat.

5.   Il-fornituri ta’ klassifikazzjonijiet ESG għandhom jinnotifikaw lill-ESMA dwar kwalunkwe bidla materjali fiċ-ċirkostanzi skont liema l-awtorizzazzjoni inizjal tkun ingħatati, inkluż kwalunkwe ftuħ jew għeluq ta’ fergħa fl-Unjoni, mingħajr dewmien żejjed.