Artikolu 42 Tariffi superviżorji

1.   L-ESMA għandha timponi tariffi proporzjonati fuq il-fornituri ta’ klassifikazzjonijiet ESG f’konformità mal-atti delegati adottati skont il-paragrafu 2. Dawk it-tariffi għandhom ikopru bis-sħiħ in-nefqa meħtieġa tal-ESMA relatata mas-superviżjoni tal-fornituri ta’ klassifikazzjonijiet ESG u r-rimborż ta’ kwalunkwe kost li l-awtoritajiet kompetenti jistgħu jġarrbu fit-twettiq tal-kompiti skont dan ir-Regolament, u b’mod partikolari bħala riżultat ta’ kwalunkwe delega tal-kompiti f’konformità mal-Artikolu 43.

2.   L-ammont ta’ tariffa individwali għandu jkun proporzjonat mal-fatturat nett annwali tal-fornitur ta’ klassifikazzjonijiet ESG ikkonċernat.

Sat-2 ta’ Jannar 2026, il-Kummissjoni għandha tadotta atti delegati f’konformità mal-Artikolu 47 biex jissupplimentaw dan ir-Regolament billi tispeċifika t-tip ta’ tariffi, il-kwistjonijiet li għalihom huma dovuti t-tariffi, l-ammont tat-tariffi u l-ġustifikazzjoni rispettiva, il-mod li bih għandhom jitħallsu u, fejn applikabbli, il-mod li bih l-ESMA għandha tirrimborża lill-awtoritajiet kompetenti fir-rigward ta’ kwalunkwe kost li jistgħu jġarrbu fit-twettiq tal-kompiti skont dan ir-Regolament, b’mod partikolari bħala riżultat ta’ kwalunkwe delega tal-kompiti kif imsemmi fl-Artikolu 43. Dawk l-atti delegati għandhom jistabbilixxu tariffi li jkunu proporzjonati u xierqa għad-daqs tal-fornituri ta’ klassifikazzjonijiet ESG u sal-punt tas-superviżjoni tagħhom, b’mod partikolari meta jiġu kkategorizzati bħala fornituri ta’ klassifikazzjonijiet ESG żgħar.