Artikolu 20 Aġġornament straordinarju tad-deċiżjonijiet konġunti

1.   Meta s-superviżur konsolidant jew awtorità kompetenti rilevanti jagħtu bidu għal talba għal aġġornament straordinarju tad-deċiżjonijiet konġunti dwar il-kapital jew id-deċiżjonijiet konġunti dwar il-likwidità skont l-Artikolu 113(4) tad-Direttiva 2013/36/UE, is-superviżur konsolidant jikkomunika din it-talba lill-awtoritajiet kompetenti rilevanti. L-aġġornament straordinarju jsegwi l-proċess kif stabbilit fl-Artikoli 9 sa 14.

2.   Meta awtorità kompetenti rilevanti titlob biex taġġorna d-deċiżjonijiet konġunti fir-rigward ta' istituzzjoni għajr istituzzjoni prinċipali tal-UE, kumpanija azzjonarja finanzjarja prinċipali tal-UE jew kumpanija azzjonarja finanzjarja mħallta prinċipali tal-UE mas-superviżur konsolidant fuq bażi bilaterali, it-talba ssir bil-miktub u tkun raġunata b'mod sħiħ.

Is-superviżur konsolidant jikkomunika t-talba msemmija fl-ewwel subparagrafu lill-awtoritajiet kompetenti rilevanti kollha. It-talba tinkludi abbozz dokument tad-deċiżjonijiet konġunti dwar il-kapital li jikkonforma mar-rekwiżiti stipulati fl-Artikolu 10 jew abbozz tad-deċiżjonijiet konġunti dwar il-likwidità li jikkonforma mar-rekwiżiti stabbiliti fl-Artikolu 11. Is-superviżur konsolidant jistabbilixxi limitu ta' żmien sabiex l-awtoritajiet kompetenti rilevanti jikkummentaw jekk l-aġġornament għandux jiġi indirizzat fuq bażi bilaterali.

Fejn l-ebda awtorità kompetenti rilevanti titlob biex tindirizza l-aġġornament fuq bażi mhux bilaterali sad-data stipulata speċifikata, is-superviżur konsolidant u l-awtorità kompetenti rilevanti li jkunu talbu aġġornament straordinarju jikkontribwixxu u jilħqu ftehim dwar id-deċiżjonijiet konġunti fuq bażi bilaterali.

3.   Meta awtorità kompetenti rilevanti ma tkunx tixtieq tressaq kontribuzzjoni għad-deċiżjonijiet konġunti aġġornata skont l-Artikolu 9, is-superviżur konsolidant iħejji d-deċiżjonijiet konġunti aġġornati fuq il-bażi tal-kontribuzzjoni l-aktar riċenti għad-dokument tad-deċiżjonijiet konġunti mingħand l-awtorità kompetenti rilevanti.