Artikolu 75 Ftehimiet ma' pajjiżi terzi

1.   F'konformità mal-Artikolu 218 TFUE, il-Kummissjoni tista' tibgħat proposti lill-Kunsill għan-negozjati ma' pajjiż terz, wieħed jew aktar, ta' ftehimiet rigward il-mezzi ta' kooperazzjoni bejn l-awtoritajiet ta' riżoluzzjoni u l-awtoritajiet ikkonċernati tal-pajjiżi terzi, inkluż il-kondiviżjoni tal-informazzjoni b'rabta mal-ippjanar ta' rkupru u ta' riżoluzzjoni fir-rigward tal-impriżi tal-assigurazzjoni u tar-riassigurazzjoni, tal-impriżi tal-assigurazzjoni u tar-riassigurazzjoni tal-pajjiżi terzi, u tal-gruppi.

2.   Il-ftehimiet imsemmijin fil-paragrafu 1 għandu jkollhom il-mira li jiżguraw l-istabbiliment ta' proċessi u ta' arranġamenti bejn l-awtoritajiet ta' riżoluzzjoni u l-awtoritajiet rilevanti ta' pajjiżi terzi għal kooperazzjoni fit-twettiq ta' xi kompiti jew tal-kompiti kollha u għall-eżerċizzju ta' xi setgħat jew tas-setgħat kollha msemmijin fl-Artikolu 79.

3.   L-Istati Membri jistgħu jidħlu fi ftehimiet bilaterali ma' pajjiż terz, sakemm tali ftehimiet bilaterali ma jkunux inkonsistenti ma' dan it-Titolu, rigward il-kwistjonijiet imsemmija fil-paragrafi 1 u 2 sad-dħul fis-seħħ ta' ftehim kif imsemmi fil-paragrafu 1 mal-pajjiż terz rilevanti.