Artikolu 5a 4.

il-PSPs għandhom jieħdu ħsieb li l-pagaturi jkunu jistgħu jagħmlu ordni ta’ pagament għal trasferiment ta’ kreditu istantanju bl-istess mezzi ta’ bidu ta’ pagament, kollha kemm huma, bħal dawk li permezz tagħhom dawk il-pagaturi jkunu jistgħu jagħmlu ordni ta’ pagament għal trasferimenti ta’ kreditu oħra;

minkejja l-Artikolu 83 tad-Direttiva (UE) 2015/2366, minnufih wara l-ħin tar-riċevuta ta’ ordni ta’ pagament għal trasferiment ta’ kreditu istantanju, il-PSP tal-pagatur għandu jivverifika jekk ikunux issodisfati l-kundizzjonijiet meħtieġa kollha għall-ipproċessar tat-tranżazzjoni ta’ pagament u jekk ikunux disponibbli l-fondi meħtieġa, jirriżerva jew jiddebita l-ammont tat-tranżazzjoni ta’ pagament mill-kont tal-pagatur, u minnufih jibgħat it-tranżazzjoni ta’ pagament lill-PSP tal-benefiċjarju;

minkejja l-Artikolu 83 u l-Artikolu 87(2) tad-Direttiva (UE) 2015/2366, il-PSP tal-benefiċjarju għandu, fi żmien 10 sekondi mill-ħin tar-riċevuta tal-ordni ta’ pagament għal trasferiment ta’ kreditu istantanju mill-PSP tal-pagatur, jagħmel l-ammont tat-tranżazzjoni ta’ pagament disponibbli fil-kont ta’ pagament tal-benefiċjarju fil-munita li fiha jkun denominat il-kont tal-benefiċjarju u jikkonferma t-tlestija tat-tranżazzjoni ta’ pagament lill-PSP tal-pagatur;

minkejja l-Artikolu 87(1) tad-Direttiva (UE) 2015/2366, il-PSP tal-benefiċjarju għandu jieħu ħsieb li d-data tal-valur tal-kreditu għall-kont ta’ pagament tal-benefiċjarju tkun l-istess data bħal dik meta l-kont ta’ pagament tal-benefiċjarju jiġi kkreditat mill-PSP tal-benefiċjarju bl-ammont tat-tranżazzjoni ta’ pagament; u

minnufih malli jirċievi l-konferma tat-tlestija msemmija fil-punt (c), jew meta ma tasal ebda konferma tat-tlestija bħal din mill-PSP tal-pagatur fi żmien 10 sekondi mill-ħin tar-riċevuta tal-ordni ta’ pagament għal trasferiment ta’ kreditu istantanju, il-PSP tal-pagatur għandu, mingħajr ħlas, jinforma lill-pagatur, kif ukoll, fejn applikabbli, lill-fornitur ta’ servizz ta’ bidu ta’ pagament, jekk l-ammont tat-tranżazzjoni ta’ pagament ikunx ġie magħmul disponibbli fil-kont ta’ pagament tal-benefiċjarju.