Artikolu 2 Definizzjonijiet

“sistema tal-informazzjoni” tfisser tagħmir jew grupp ta’ tagħmir interkonness jew relatat, li minnhom, wieħed jew aktar, skont programm, jipproċessaw awtomatikament data tal-kompjuter, kif ukoll data tal-kompjuter maħżuna, ipproċessata, irkuprata jew trasmessa b’dak it-tagħmir jew grupp ta’ tagħmir għall-finijiet tal-operazzjoni, użu, protezzjoni u manutenzjoni tiegħu jew tagħhom;

“data tal-kompjuter” tfisser ir-rappreżentazzjoni ta’ fatti, informazzjoni jew kunċetti f’forma adatta għall-ipproċessar f’sistema tal-informazzjoni, inkluż programm adatt biex iġiegħel sistema tal-informazzjoni twettaq funzjoni;

“persuna ġuridika” tfisser entità li jkollha l-istatus ta’ persuna ġuridika taħt il-liġi applikabbli, iżda ma tinkludix Stati jew korpi pubbliċi li jaġixxu fl-eżerċizzju ta’ awtorità Statali, jew organizzazzjonijiet internazzjonali pubbliċi;

“mingħajr dritt” tfisser aġir imsemmi f’din id-Direttiva, li jinkludi aċċess, interferenza jew interċettazzjoni, li ma jkunux awtorizzati mis-sid jew minn detentur ieħor tad-dritt tas-sistema jew ta’ parti minnha, jew li ma jkunux permessi taħt il-liġi nazzjonali.