Artikolu 3 4a.

L-Istati Membri għandhom jistabbilixxu qafas, li jista’ jinkludi skemi ta’ appoġġ u miżuri għall-iffaċilitar tal-adozzjoni ta’ ftehimiet dwar ix-xiri tal-enerġija rinnovabbli, li jippermettu l-varar tal-elettriku rinnovabbli għal livell li jkun konsistenti mal-kontribuzzjoni nazzjonali tal-Istat Membru msemmija fil-paragrafu 2 ta’ dan l-Artikolu u b’pass li jkun konsistenti mat-trajettorji indikattivi msemmija fl-Artikolu 4, il-punt (a)(2), tar-Regolament (UE) 2018/1999. B’mod partikolari, dak il-qafas għandu jindirizza l-ostakli li jifdal għal livell għoli ta’ provvista tal-elettriku rinnovabbli, inklużi dawk relatati mal-proċeduri għall-ħruġ ta’ permessi, u għall-iżvilupp tal-infrastruttura meħtieġa tat-trażmissjoni, tad-distribuzzjoni u tal-ħażna, inkluż il-ħażna ta’ enerġija kolokalizzata. Meta jfasslu dak il-qafas, l-Istati Membri għandhom iqisu l-elettriku rinnovabbli addizzjonali meħtieġ biex tiġi ssodisfata d-domanda fis-setturi tat-trasport, tal-industrija, tal-binjiet u tat-tisħin u t-tkessiħ u għall-produzzjoni ta’ karburanti rinnovabbli ta’ oriġini mhux bijoloġika. L-Istati Membri jistgħu jinkludu sommarju tal-politiki u l-miżuri fl-ambitu tal-qafas u valutazzjoni tal-implimentazzjoni tagħhom, rispettivament, fil-pjanijiet tal-enerġija u tal-klima nazzjonali integrati tagħhom ppreżentata skont l-Artikoli 3 u 14 tar-Regolament (UE) 2018/1999 u fir-rapporti nazzjonali integrati tagħhom dwar il-progress tal-enerġija u l-klima skont l-Artikolu 17 ta’ dak ir-Regolament.