Artikolu 9 7a.

Abbażi tal-għanijiet indikattivi għall-ġenerazzjoni ta’ enerġija rinnovabbli lil hinn mill-kosta li għandha tiġi varata f’kull baċir tal-baħar, identifikat f’konformità mal-Artikolu 14 tar-Regolament (UE) 2022/869, l-Istati Membri kkonċernati għandhom jippubblikaw informazzjoni dwar il-volumi ta’ enerġija rinnovabbli lil hinn mill-kosta li jippjanaw li jiksbu permezz ta’ offerti, filwaqt li jqisu l-fattibbiltà teknika u ekonomika għall-infrastruttura tal-grilja u l-attivitajiet li diġà jseħħu. L-Istati Membri għandhom jagħmlu ħilithom biex jallokaw spazju għal proġetti tal-enerġija rinnovabbli lil hinn mill-kosta fil-pjanijiet spazjali marittimi tagħhom, filwaqt li jqisu l-attivitajiet li diġà jseħħu fiż-żoni affettwati. Sabiex jiffaċilitaw il-ħruġ tal-permessi għal proġetti konġunti tal-enerġija rinnovabbli lil hinn mill-kosta, l-Istati Membri għandhom inaqqsu l-kumplessità u jżidu l-effiċjenza u t-trasparenza tal-proċedura għall-ħruġ tal-permessi, għandhom isaħħu l-kooperazzjoni bejniethom u għandhom, meta jkun xieraq, jistabbilixxu punt uniku ta’ kuntatt. Sabiex isaħħu l-aċċettazzjoni tal-pubbliku, l-Istati Membri jistgħu jinkludu l-komunitajiet tal-enerġija rinnovabbli fi proġetti konġunti dwar l-enerġija rinnovabbli lil hinn mill-kosta.