Artikolu 7 1.

L-operaturi ta’ sistema ta’ trażmissjoni u n-NEMOs għandhom jorganizzaw b’mod konġunt il-ġestjoni tas-swieq integrati ta’ ġurnata bil-quddiem u tal-istess ġurnata skont r-Regolament (UE) 2015/1222. L-operaturi ta’ sistemi ta’ trażmissjoni u n-NEMOs għandhom jikkooperaw fil-livell tal-Unjoni jew, fejn ikun aktar xieraq, f’livell reġjonali sabiex jimmassimizzaw l-effiċjenza u l-effettività tan-negozjar ta’ ġurnata bil-quddiem u tal-istess ġurnata tal-elettriku tal-Unjoni. L-obbligu ta’ kooperazzjoni għandu jkun mingħajr preġudizzju għall-applikazzjoni tal-liġi tal-Unjoni dwar il-kompetizzjoni. Fil-funzjonijiet tagħhom relatati man-negozjar tal-elettriku, l-operaturi ta’ sistema ta’ trażmissjoni u n-NEMOs għandhom ikunu soġġetti għal sorveljanza regolatorja mill-awtoritajiet regolatorji skont l-Artikolu 59 tad-Direttiva (UE) 2019/944 u mill-ACER skont l-Artikoli 4 u 8 tar-Regolament (UE) 2019/942 u għandhom jiġu soġġetti għal obbligi ta’ trasparenza u s-sorveljanza effettiva kontra l-manipulazzjoni tas-suq kif stabbilit fid-dispożizzjonijiet rilevanti tar-Regolament (UE) Nru 1227/2011.