Artikolu 26 13.

Abbażi tal-valuri ta’ referenza armonizzati tal-effiċjenza msemmija fl-Anness III, il-punt (d), l-Istati Membri għandhom jiżguraw li l-oriġini tal-elettriku ġġenerat minn koġenerazzjoni ta’ effiċjenza għolja tista’ tiġi ggarantita skont kriterji oġġettivi, trasparenti u nondiskriminatorji stabbiliti minn kull Stat Membru. Dawn għandhom jiżguraw li dik il-garanzija tal-oriġini tikkonforma mar-rekwiżiti stabbiliti fl-Anness XII, u li tkun tinkludi mill-inqas l-informazzjoni speċifikata fih. L-Istati Membri għandhom jirrikonoxxu b’mod reċiproku l-garanziji tal-oriġini tagħhom, esklużivament bħala prova tal-informazzjoni msemmija f’dan il-paragrafu. Kwalunkwe rifjut ta’ rikonoxximent ta’ garanzija tal-oriġini bħala prova ta’ din ix-xorta, b’mod partikolari għal raġunijiet relatati mal-prevenzjoni tal-frodi, għandu jkun ibbażat fuq kriterji oġġettivi, trasparenti u nondiskriminatorji. L-Istati Membri għandhom jinnotifikaw lill-Kummissjoni b’dan ir-rifjut u jistipulaw ir-raġunijiet għalih. Fil-każ ta’ rifjut ta’ rikonoxximent ta’ garanzija tal-oriġini, il-Kummissjoni tista’ tadotta deċiżjoni biex teżiġi li l-parti rifjutanti tirrikonoxxiha, b’mod partikolari b’rabta ma’ kriterji oġġettivi, trasparenti u nondiskriminatorji li abbażi tagħhom ikun dak ir-rikonoxximent.