Artikolu 21 Sottokuntrattar

1.   Sabiex tħeġġeġ entranti ġodda, negozji ġodda u SMEs mal-Unjoni kollha u l-parteċipazzjoni transfruntiera tagħhom, u biex toffri l-iktar kopertura ġeografika wiesgħa possibbli filwaqt tħares l-awtonomija tal-Unjoni, l-awtorità kontraenti għandha titlob li l-offerent jissottokuntratta parti mill-kuntratt permezz ta’ sejħa għall-offerti kompetittiva fil-livelli xierqa ta’ sottokuntrattar lil kumpaniji oħra għajr dawk li jiffurmaw parti mill-grupp tal-offerent.

2.   Għal kuntratti ’l fuq minn EUR 10 miljun, l-awtorità kontraenti għandha tiżgura li mill-inqas 30 % tal-valur tal-kuntratt jiġi sottokuntrattat permezz ta’ sejħiet għal offerti kompetittivi f’livelli varji ta’ sottokuntrattar lil kumpaniji barra l-grupp tal-offerent ewlieni, b’mod partikolari biex tippermetti l-parteċipazzjoni transfruntiera ta’ SMEs fl-ekosistema spazjali.

3.   L-offerent għandu jipprovdi raġunijiet għaliex ma ssodisfax talba magħmula skont il-paragrafu 1 jew għaliex iddevja mill-perċentwal imsemmi fil-paragrafu 2.

4.   Il-Kummissjoni għandha tinforma lill-Kumitat tal-Programm imsemmi fl-Artikolu 47 bit-twettiq tal-objettivi msemmija fil-paragrafi 1 u 2 ta’ dan l-Artikolu għal kuntratti ffirmati wara l-20 ta’ Marzu 2023.