Artikolu 6 Miri għall-infrastruttura tar-riforniment tal-idroġenu tal-vetturi tat-triq

Għal dak il-għan, l-Istati Membri għandhom jiżguraw li sal-31 ta’ Diċembru 2030, stazzjonijiet tar-riforniment tal-idroġenu aċċessibbli għall-pubbliku ddisinjati sabiex jippermettu kapaċità kumulattiva minima ta’ tunnellata waħda kuljum u mgħammra b’distributur ta’ mill-inqas 700 bar, jiġu varati b’distanza massima ta’ 200 km bejniethom tul in-network ewlieni TEN-T.

L-Istati Membri għandhom jiżguraw li sal-31 ta’ Diċembru 2030, jiġi varat mill-inqas stazzjon wieħed ta’ riforniment tal-idroġenu aċċessibbli għall-pubbliku f’kull nodu urban. L-Istati Membri għandhom jiżguraw li titwettaq analiżi biex jiġi ddeterminat l-aħjar post għal tali stazzjonijiet tar-riforniment u li l-analiżi teżamina b’mod partikolari l-varar ta’ tali stazzjonijiet ta’ riforniment f’hubs multimodali fejn jistgħu jiġu fornuti wkoll modi oħra ta’ trasport.

L-Istati Membri għandhom jistabbilixxu fl-oqfsa ta’ politika nazzjonali tagħhom trajettorja lineari ċara lejn l-ilħuq tal-miri tal-2030, flimkien ma’ mira indikattiva ċara għall-2027 li tipprovdi kopertura suffiċjenti tan-network ewlieni TEN-T bil-ħsieb li jiġu ssodisfati d-domandi tas-suq li qed jiżviluppaw.

F’każijiet bħal dawn, l-Istati Membri għandhom jiġġustifikaw id-deċiżjonijiet tagħhom lill-Kummissjoni u għandhom jagħmlu disponibbli l-informazzjoni kollha rilevanti fl-oqfsa ta’ politika nazzjonali tagħhom.