Artikolu 15 Rappurtar nazzjonali

Sal-31 ta’ Diċembru 2027 u kull sentejn wara dan, kull Stat Membru għandu jippreżenta lill-Kummissjoni rapport nazzjonali awtonomu dwar il-progress rigward l-implimentazzjoni tal-qafas ta’ politika nazzjonali tiegħu. Ir-rapport għandu jiġi abbozzat f’forma li tinqara u tinftiehem faċilment u għandu jitqiegħed għad-dispożizzjoni tal-pubbliku mill-Kummissjoni.

Ir-rapport nazzjonali dwar il-progress għandu jkopri l-informazzjoni elenkata fl-Anness I u għandu, fejn xieraq, jinkludi ġustifikazzjoni rilevanti dwar il-livell tal-kisba tal-miri u l-objettivi nazzjonali msemmija fl-Artikolu 14(2), kif ukoll indikazzjoni tal-miżuri li għandhom jittieħdu biex jinkisbu dawk il-miri u l-objettivi fil-futur.

Sat-30 ta’ Ġunju 2024 u kull tliet snin wara dan, l-Istati Membri għandhom jivvalutaw kif il-varar u l-operazzjoni tal-punti tal-irriċarġjar jistgħu jippermettu lill-vetturi elettriċi jikkontribwixxu aktar għall-flessibbiltà tas-sistema tal-enerġija, inkluża l-parteċipazzjoni tagħhom fis-suq tal-ibbilanċjar, u għall-assorbiment ulterjuri tal-elettriku rinnovabbli. Dik il-valutazzjoni għandha tqis it-tipi kollha ta’ punti tal-irriċarġjar, inklużi dawk li joffru rriċċarġjar intelliġenti u bidirezzjonali u l-potenza tal-outputs kollha, kemm pubbliċi kif ukoll privati, u tipprovdi rakkomandazzjonijiet dwar it-tip ta’ punt tal-irriċarġjar, it-teknoloġija ta’ appoġġ u d-distribuzzjoni ġeografika sabiex tiġi ffaċilitata l-kapaċità tal-utenti li jintegraw il-vetturi elettriċi tagħhom fis-sistema. Dik il-valutazzjoni għandha tidentifika miżuri xierqa li għandhom jiġu implimentati sabiex jiġu ssodisfati r-rekwiżiti stabbiliti f’dan ir-Regolament inklużi dawk biex tiġi żgurata l-konsistenza tal-ippjanar tal-infrastruttura mal-ippjanar tal-grilja korrispondenti. Dik il-valutazzjoni għandha tqis il-kontribut mill-partijiet ikkonċernati kollha u għandha tkun disponibbli għall-pubbliku. Kull Stat Membru jista’ jitlob lill-awtorità regolatorja biex twettaq dik il-valutazzjoni. Abbażi tar-riżultati tal-valutazzjoni, l-Istati Membri għandhom, jekk ikun meħtieġ, jieħdu l-miżuri xierqa għall-varar ta’ punti addizzjonali tal-irriċarġjar u jinkludu dawk il-miżuri fir-rapporti nazzjonali dwar il-progress imsemmija fil-paragrafu 1 ta’ dan l-Artikolu. Il-valutazzjoni u l-miżuri għandhom jitqiesu mill-operaturi tas-sistema fil-pjanijiet ta’ żvilupp tan-network imsemmija fl-Artikolu 32(3) u fl-Artikolu 51 tad-Direttiva (UE) 2019/944.

Abbażi tal-input mill-operaturi tas-sistema ta’ trażmissjoni u mill-operaturi tas-sistema ta’ distribuzzjoni, l-awtorità regolatorja ta’ kull Stat Membru għandha tivvaluta, sat-30 ta’ Ġunju 2024 u kull tliet snin wara dan, il-kontribut potenzjali tal-irriċarġjar bidirezzjonali għat-tnaqqis tal-kostijiet tal-utent u tas-sistema u għaż-żieda tas-sehem tal-elettriku rinnovabbli fis-sistema tal-elettriku. Dik il-valutazzjoni għandha tkun disponibbli għall-pubbliku. Abbażi tar-riżultati tal-valutazzjoni, l-Istati Membri għandhom, jekk ikun meħtieġ, jieħdu l-miżuri xierqa biex jaġġustaw id-disponibbiltà u d-distribuzzjoni ġeografika tal-punti tal-irriċarġjar bidirezzjonali f’żoni privati u jinkluduhom fir-rapporti nazzjonali dwar il-progress imsemmija fil-paragrafu 1.