Artikolu 1 Għanijiet

1.   Din id-Direttiva tistabbilixxi dispożizzjonijiet dwar il-kwalità tal-arja bl-għan li jinkiseb l-għan ta’ tniġġis żero, sabiex il-kwalità tal-arja fl-Unjoni tittejjeb progressivament għal livelli li ma jibqgħux jitqiesu ta’ ħsara għas-saħħa tal-bniedem, għall-ekosistemi naturali u għall-bijodiversità, kif definit mill-aqwa evidenza xjentifika disponibbli u li tkun l-iktar aġġornata, u b’hekk tikkontribwixxi għal ambjent ħieles mis-sustanzi tossiċi sa mhux iktar tard mill-2050.

2.   Din id-Direttiva tistipula valuri limitu, valuri fil-mira, obbligi ta’ tnaqqis tal-esponiment medju, għanijiet tal-konċentrazzjoni tal-esponiment medju, livelli kritiċi, livelli limitu ta’ allert, livelli limitu ta’ informazzjoni u għanijiet fit-tul. Tali standards tal-kwalità tal-arja, li huma stabbiliti fl-Anness I, għandhom jiġu rieżaminati regolarment f’konformità mal-Artikolu 3, skont ir-rakkomandazzjonijiet tal-WHO.

3.   Barra minn hekk, din id-Direttiva tikkontribwixxi għall-kisba tal-għanijiet tal-Unjoni għat-tnaqqis tat-tniġġis, tal-bijodiversità u tal-ekosistemi f’konformità mat-Tmien Programm ta’ Azzjoni Ambjentali, kif ukoll sinerġiji msaħħa bejn il-politika tal-Unjoni dwar il-kwalità tal-arja u politiki rilevanti oħra tal-Unjoni.