Artikolu 28 Kumpens għal ħsara lis-saħħa tal-bniedem

1.   L-Istati Membri għandhom jiżguraw li l-persuni fiżiċi li jsofru ħsara lis-saħħa tal-bniedem ikkawżata minn ksur tar-regoli nazzjonali li jittrasponu l-Artikolu 19(1) sa (5) u l-Artikolu 20(1) u (2) ta’ din id-Direttiva li jkun twettaq intenzjonalment jew b’negliġenza mill-awtoritajiet kompetenti jkollhom id-dritt li jitolbu u jiksbu kumpens għal dik il-ħsara.

2.   L-Istati Membri għandhom jiżguraw li r-regoli u l-proċeduri nazzjonali relatati mat-talbiet għal kumpens jitfasslu u jiġu applikati b’tali mod li ma jagħmlux impossibbli jew eċċessivament diffiċli l-eżerċizzju tad-dritt għal kumpens għal ħsara kkawżata minn ksur skont il-paragrafu 1.

3.   L-Istati Membri jistgħu jistabbilixxu perjodi ta’ preskrizzjoni biex jitressqu l-azzjonijiet għal kumpens kif imsemmi fil-paragrafu 1. Tali perjodi ma għandhomx jibdew qabel ma l-ksur ikun waqaf u l-persuna li titlob il-kumpens tkun taf, jew raġonevolment tista’ tkun mistennija li tkun taf li hija ġarrbet ħsara minn ksur kif imsemmi fil-paragrafu 1.