Artikolu 1 Suġġett

1.   Dan ir-Regolament jistabbilixxi rekwiżiti għaċ-ċiklu tal-ħajja kollu tal-imballaġġ fir-rigward tas-sostenibbiltà ambjentali u t-tikkettar, biex jippermetti t-tqegħid tiegħu fis-suq. Jistabbilixxi wkoll rekwiżiti għar-responsabbiltà estiża tal-produtturi, il-prevenzjoni tal-iskart mill-imballaġġ, bħat-tnaqqis ta' imballaġġ mhux meħtieġ u l-użu mill-ġdid jew il-mili mill-ġdid tal-imballaġġ, kif ukoll il-ġbir u t-trattament, inkluż ir-riċiklaġġ, tal-iskart mill-imballaġġ.

2.   Dan ir-Regolament jikkontribwixxi għall-funzjonament effiċjenti tas-suq intern billi jarmonizza l-miżuri nazzjonali dwar l-imballaġġ u l-iskart mill-imballaġġ sabiex jiġu evitati l-ostakli għall-kummerċ u d-distorsjoni u r-restrizzjoni tal-kompetizzjoni fl-Unjoni, filwaqt li jipprevjeni jew inaqqas l-impatti negattivi tal-imballaġġ u tal-iskart mill-imballaġġ fuq l-ambjent u fuq is-saħħa tal-bniedem, abbażi ta' livell għoli ta' protezzjoni ambjentali.

3.   Dan ir-Regolament jikkontribwixxi għat-tranżizzjoni lejn ekonomija ċirkolari u għall-kisba tan-newtralità klimatika sa mhux aktar tard mill-2050, kif previst fir-Regolament (UE) 2021/1119 tal-Parlament Ewropew u tal-Kunsill (53), billi jistabbilixxi miżuri f'konformità mal-ġerarkija tal-iskart stipulata fl-Artikolu 4 tad-Direttiva 2008/98/KE (“ġerarkija tal-iskart”).