Artikolu 4 Moviment liberu

1.   L-imballaġġ għandu jitqiegħed fis-suq biss jekk jikkonforma ma' dan ir-Regolament.

2.   L-Istati Membri ma għandhomx jipprojbixxu, jirrestrinġu jew jimpedixxu t-tqegħid fis-suq ta' imballaġġ li jikkonforma mar-rekwiżiti ta' sostenibbiltà, tat-tikkettar u tal-informazzjoni stabbiliti fi jew skont l-Artikoli 5 sa 12.

3.   Jekk l-Istati Membri jagħżlu li jżommu jew jintroduċu rekwiżiti tas-sostenibbiltà nazzjonali, jew rekwiżiti tal-informazzjoni addizzjonali ma' dawk stabbiliti f'dan ir-Regolament, dawk ir-rekwiżiti ma għandhomx ikunu f'kunflitt ma' dawk stabbiliti f'dan ir-Regolament u l-Istati Membri ma għandhomx jipprojbixxu, jirrestrinġu jew jimpedixxu t-tqegħid fis-suq tal-imballaġġ li jikkonforma ma' dan ir-Regolament minħabba raġunijiet ta' nuqqas ta' konformità ma' dawk ir-rekwiżiti nazzjonali.

4.   F'fieri kummerċjali, wirjiet jew avvenimenti simili, l-Istati Membri ma għandhomx jipprevjenu l-wiri tal-imballaġġ li ma jkunx konformi ma' dan ir-Regolament, dment li jkun hemm sinjal viżibbli li jindika b'mod ċar li imballaġġ bħal dan ma jikkonformax ma' dan ir-Regolament u li ma huwiex għall-bejgħ sakemm isir konformi.